ବରଗଡ :- ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡ ଝାରବନ୍ଧ ଥାନା ଅନ୍ତର୍ଗତ ପଗାରପାଣି ଗ୍ରାମର ଏକ ବିଲରୁ ଉକ୍ତ ଗ୍ରାମର ଘନଶ୍ୟାମ ବେହେରା (35) ଙ୍କର ଅର୍ଧ ଝୁଲନ୍ତା ମୃତଦେହ ଏକ ମହୁଲ ଗଛରେ ଝୁଲୁଥିବା ଦେଖାଯାଇଛି । ମୃତଦେହର ଅଣ୍ଟାରୁ ଉପରଭାଗ ଝୁଲୁଥିବା ବେଳେ ଅଣ୍ଟା ତଳକୁ ମାଟିରେ ଲାଗିଛି । ବେକରେ ପାଟି ତଳୁ କାନ ଉପର ଦେଇ ଏକ ଶାଢୀ ଏକ ମହୁଲ ଗଛର ଡାଳରେ ବନ୍ଧା ହେଇଛି । ମୃତଦେହ କୁ ପ୍ରଥମେ ଗ୍ରାମର କିଛି ଲୋକ ଶୌଚ କରି ଯିବା ସମୟରେ ଦେଖିଥିଲେ। ମୃତଦେହଟି ଘନଶ୍ୟାମ ର ଜାଣିବା ପରେ ଲୋକମାନେ ଘନଶ୍ୟାମ ର ମାଁ କୁ ଖବର ଦେଇଥିଲେ । ଘଟଣା ସ୍ଥଳରୁ ଘନଶ୍ୟାମ ର ଘର ମାତ୍ର ତିରିଶ ରୁ ଚାଳିଶ ଫୁଟ ଦୂର । ରାତ୍ରିରେ ଘନଶ୍ୟାମ ଘରକୁ ଫେରିନଥିଲା । ଘରେ ତାର ମାଁ  ତାର ପୁଅ ଓ ଜଣେ ଭାନଜି ଥିଲେ । ଆଜି ଘଟଣାର ଖବର ପାଇବା ପରେ ଘନଶ୍ୟାମଙ୍କ  ସ୍ତ୍ରୀ ଘରକୁ ଫେରିଥିଲେ । ଝାରବନ୍ଧ ଥାନା ଅଧିକାରୀ ଶ୍ରୀ ଠାକୁର ଦାସ ମୁର୍ମୁ ଏହି ଘଟଣାର ଖବର ପାଇବା ପରେ ତୁରନ୍ତ ଘଟଣା ସ୍ଥଳକୁ ପହଂଛି ଘଟଣାର ତଦନ୍ତ ଆରମ୍ଭ କରିଥିବା ସହିତ ମୃତକ ଙ୍କର ପରିବାର ସହିତ ଘଟଣା ବାବଦରେ ଆଲୋଚନା କରିଛନ୍ତି । ତେବେ ଗ୍ରାମବାସୀ ମାନଙ୍କର ସନ୍ଦେହ ଯେ ଏହା ଏକ ହତ୍ୟା କାଣ୍ଡ ଅଟେ । ଘନଶ୍ୟାମଙ୍କୁ  ଅନ୍ୟତ୍ର ମାରି ଏଠାକୁ ଆଣି ମୃତଦେହକୁ ଝୁଲେଇ ଦିଆଯାଇଛି । ତେବେ ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଯାଇ ଆଇନ ଅନୁସାରେ  ସମସ୍ତ ପଦକ୍ଷେପ ଗ୍ରହଣ କରାଯିବ ବୋଲି ଝାରବନ୍ଧ ଥାନା ଅଧିକାରୀ ଶ୍ରୀ ମୁର୍ମୁ ଜଣାଇଛନ୍ତି ।