ସପ୍ତମ ବେତନ କମିସନ ଆଧାରରେ ଦରମା ଦେବାକୁ ଦାବି
ଭୁବନେଶ୍ୱର(ଚକ୍ରଧର ମାଝି) : ଉତ୍କଳ ବିଶ୍ୱବିଦ୍ୟାଳୟ ଅଣ ଶିକ୍ଷକ କର୍ମଚାରୀ ସଂଘ ପକ୍ଷରୁ ସୋମବାର କୁଳପତିଙ୍କ କାର୍ୟ୍ୟାଳୟ ସାମ୍ନାରେ ଧାରଣା ଦିଆଯାଇଛି । ସପ୍ତମ ବେତନ କମିସନ ଆଧାରରେ ବିଶ୍ୱବିଦ୍ୟାଳୟ କର୍ମଚାରୀଙ୍କୁ ତୁରନ୍ତ ଦରମା ପ୍ରଦାନ କରିବାକୁ ଦାବି ରଖାଯାଇଛି । ଏହାସହ ସଚିବାଳୟରେ ପ୍ରଚଳିତ କ୍ୟାଡର ରୁଲ୍କୁ ବିଶ୍ୱବିଦ୍ୟାଳୟ କର୍ମଚାରୀଙ୍କ କ୍ଷେତ୍ରରେ ଲାଗୁ କରିବା, ଓଡ଼ିଶା ବିଶ୍ୱବିଦ୍ୟାଳୟ ନିଯୁକ୍ତି ଓ ପଦୋନ୍ନତି ଆଇନ ୧୯୯୧ରେ ଆବଶ୍ୟକ ସଂଶୋଧନ ଆଣିବାକୁ ଦାବି କରାଯାଇଛି । ଏହି ଧାରଣାରେ ବିଶ୍ୱବିଦ୍ୟାଳୟ କର୍ମଚାରୀ ସଂଘର ସଭାପତି ଦେବୀପ୍ରସନ୍ନ ତ୍ରିପାଠୀ, ସମ୍ପାଦକ ବିଜୟ ଆଚାର୍ୟ୍ୟ, ବୈଷୟିକ କର୍ମଚାରୀ ସଂଘର ସଭାପତି ନିରଞ୍ଜନ ତ୍ରିପାଠୀ, ସମ୍ପାଦକ ମୁରଲୀଧର ପାଣିଗ୍ରାହୀ, ଅଫିସର ଆଶୋସିଏସନ୍ ସଭାପତି ଲଲାଟେନ୍ଦୁ ମହାପାତ୍ର, ସମ୍ପାଦକ ବିରଞ୍ଚି ନାରାୟଣ ରାୟ, ଚତୁର୍ଥ ଶ୍ରେଣୀ କର୍ମଚାରୀ ସଂଘର ସମ୍ପାଦକ ପ୍ରକାଶ ଚନ୍ଦ୍ର ଦାସ, ରବିନ୍ଦ୍ରନାଥ ବାରିକ ପ୍ରମୁଖ ଯୋଗ ଦେଇଥିଲେ । ରାଜ୍ୟ ସରକାର ରାଜ୍ୟର ସମସ୍ତ ବର୍ଗର କର୍ମଚାରୀଙ୍କ ନିମନ୍ତେ ସପ୍ତମ ବେତନ କମିସନ ଆଧାରରେ ଦରମା ପ୍ରଦାନ କରି ୪୦ ପ୍ରତିଶତ ବକେୟା ପ୍ରାପ୍ୟ ପାଇ ସାରିଥିଲେ ମଧ୍ୟ ଅଦ୍ୟାବଧି ବିଶ୍ୱବିଦ୍ୟାଳୟ କର୍ମଚାରୀଙ୍କ ନିମନ୍ତେ ଏହା ଲାଗୁ ହୋଇ ନ ଥିବାରୁ ବିଶ୍ୱବିଦ୍ୟାଳୟ କର୍ମଚାରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।
