ବଲାଙ୍ଗୀର/ସ୍ୱତନ୍ତ୍ର ପ୍ରତିନିଧି : ଆମ ଦେଶରେ ଚାଲିଥିବା COVID-19 ତାଲା ବନ୍ଦ ଯୋଗୁଁ ଜନସଂଖ୍ୟା ର ଏକ ବୃହତ୍ ଭାଗ ପ୍ରବାସୀ ଶ୍ରମିକ ମାନେ ଦେଶର ବିଭିନ୍ନ ସ୍ଥାନରେ ଅଟକି ରହିଛନ୍ତି | ସେମାନେ ଦୈନନ୍ଦିନ ଭୋଜନ ପାଇବା ପାଇଁ ସଂଘର୍ଷ କରୁଛନ୍ତି | ଯଦିଓ ଏହି ସମସ୍ୟାର ସମାଧାନ ପାଇଁ କେନ୍ଦ୍ର ଓ ରାଜ୍ୟ ସରକାର ଯଥାସମ୍ଭବ ଉଦ୍ୟମ କରୁଛନ୍ତି, ତଥାପି ବହୁ ପ୍ରବାସୀଙ୍କ ପାଖକୁ ସରକାରି ସାହାଯ୍ୟ ପହଞ୍ଚି ପାରୁନାହିଁ। ତେଣୁ ବହୁ ସ୍ୱେଚ୍ଛାସେବି ଓ ସଂଗଠନ ମାନେ ପ୍ରବାସୀ ଶ୍ରମିକଙ୍କ ପାଇଁ ଖାଦ୍ୟ ଏବଂ ଖାଦ୍ୟ ସାମଗ୍ରୀ ଯୋଗାଇବା ପାଇଁ ଆଗେଇ ଆସିଛନ୍ତି।
ଆମେ ଏହାକୁ ଆମର ମୁଖ୍ୟ ଦାୟିତ୍ଵ ରୂପେ ଗ୍ରହଣ କରିଛୁ ବୋଲି କୁହନ୍ତି ସ୍ବେଚ୍ଛାସେବୀ ସୁଦୀପ୍ତ ରଞ୍ଜନ ସୁଆର। ପ୍ରଥମ ପର୍ଯ୍ୟାୟ ରେ ଭୋପାଳ ର ସମ୍ବଲପୁରୀ ପରିବାର ର ସହଯୋଗ ରେ ମଧ୍ୟପ୍ରଦେଶ ର ଶାମଗଡ ଠାରେ ୧୨ ଜଣ ଶ୍ରମିକଙ୍କ ପାଇଁ ଖାଦ୍ୟ ସାମଗ୍ରୀ ର ବ୍ୟବସ୍ଥା କରା ଯାଇଥିଲା, ପରେ ଏହି କାର୍ଯ୍ୟ ଏକ ମିଶନରେ ପରିଣତ ହେଲା | ଚେନ୍ନାଇରେ ଅବସ୍ଥାପିତ ବଲାଙ୍ଗିର ମାଟିର ଜଣେ ସୁପୁତ୍ର ବରିଷ୍ଠ ବ୍ୟାଙ୍କ କାର୍ଯ୍ୟନିର୍ବାହୀ ତଥା ଭୋପାଳ ସମ୍ବଲପୁରୀ ପରିବାରର ଅନ୍ୟତମ ପ୍ରତିଷ୍ଠାତା ସିଦ୍ଧାର୍ଥ ବାବୁଙ୍କ ନେତୃତ୍ୱରେ , ଭୋପାଳ ସମ୍ବଲପୁରୀ ପରିବାରର ସାଧାରଣ ସମ୍ପାଦକ ସମ୍ବଲପୁର ଜନ୍ମିତ ସଞ୍ଜୀବ ନନ୍ଦ, ବଲାଙ୍ଗିର ମୂଳ ନିବାସୀ ବର୍ତମାନ ଚେନ୍ନାଇ ରେ କାର୍ଯ୍ୟରତ ଜଣେ ରେଳ କର୍ମଚାରୀ ରମଣୀ ରଞ୍ଜନ ନେପାକ ଏବଂ ପାଟଣାଗଡ଼ ବାଙ୍କିବାହାଲ ନିବାସୀ ସ୍ଵେଚ୍ଛାସେବୀ ସୁଦୀପ୍ତ ରଞ୍ଜନ ସୁଆର, ଦେଶର ବିଭିନ୍ନ ଭାଗରେ ଫସି ରହିଥିବା ପ୍ରବାସୀ ଶ୍ରମିକମାନଙ୍କୁ ସାହାଯ୍ୟ କରିବା ପାଇଁ ଏକ ଗୋଷ୍ଠୀ ଗଠନ କରିଥିଲେ। ମିଶନକୁ ଅଧିକ ପ୍ରଭାବଶାଳୀ ଭାବରେ କାର୍ଯ୍ୟକାରୀ କରିବାପାଇଁ ଭୋପାଳ ସମ୍ବଲପୁରୀ ପରିବାର ର ସଦସ୍ୟମାନେ ଉଭୟ ନୈତିକ ଏବଂ ଆର୍ଥିକ ସହାୟତା ପ୍ରଦାନ କରିଛନ୍ତି |
ଦେଶର ବିଭିନ୍ନ ଭାଗ ଯଥା ତାମିଲନାଡୁର ଚେନ୍ନାଇ, ତିରୁପୁର, ମହାରାଷ୍ଟ୍ର ର ମୁମ୍ବାଇ, ତେଲେଙ୍ଗାନା ର ହାଇଦ୍ରାବାଦ୍, ଆନ୍ଧ୍ର ପ୍ରଦେଶର ବିଶାଖାପାଟଣା, କର୍ଣ୍ଣାଟକ ର ବାଙ୍ଗାଲୋର ତଥା ଡାମନ୍ ଓ ଡିଉ ଭଳି ସ୍ଥାନରେ ସେଠାକାର ଜିଲ୍ଲା ପ୍ରଶାସନ ଯଥେଷ୍ଟ ସହଯୋଗ କରିଛନ୍ତି। ଏହା ଛଡା ଯୁବ କଂଗ୍ରେସ, ବିଜେପି ଯୁବମୋର୍ଚ୍ଚା ଭଳି ରାଜନୈତିକ ସଂଗଠନ ତଥା ଦେଶର ବିଭିନ୍ନ ପ୍ରାନ୍ତ ରେ ରାଷ୍ଟ୍ରୀୟ ସ୍ଵୟଂସେବକ ସଂଘ, ସେବା ଭାରତୀ, ତେଲେଙ୍ଗାନା ଓ ଆନ୍ଧ୍ରରେ ଜନସେନା ପାର୍ଟି, ଚେନ୍ନାଇରେ ଗୁଜୁରାତି ସମାଜ ଚେନ୍ନାଇ ଭଳି ସାମାଜିକ ସଂଗଠନ ଏବଂ ଅନେକ କ୍ଷେତ୍ର ରେ CSB ବ୍ୟାଙ୍କ୍ ସହାୟତାରେ ଆମେ ଖାଦ୍ୟ ଏବଂ ଖାଦ୍ୟ ସାମଗ୍ରୀ ଯୋଗାଇବା ସମ୍ଭବ କରିଛୁ। ବିଶେଷ ପରିସ୍ଥିତିରେ କୌଣସି ଲୋକଙ୍କୁ ଯଦି ଅନ୍ୟ କୌଣସି ଉତ୍ସ ରୁ ସାହାଯ୍ୟ ପହଞ୍ଚି ନ ପାରିଲେ ସମ୍ବଲପୁରୀ ପରିବାର ଭୋପାଳ ତରଫରୁ ସଞ୍ଜୀବ ନନ୍ଦଙ୍କ ମାଧ୍ୟମରେ ଆର୍ଥିକ ସହାୟତା ପ୍ରଦାନ ମଧ୍ୟ କରାଯାଇଥାଏ।
ଏପର୍ଯ୍ୟନ୍ତ ୧୦୦ ରୁ ଅଧିକ ଗୋଷ୍ଠୀ ରେ ୨୦୦୦ ରୁ ଅଧିକ ନିରାଶ୍ରୟ ଲୋକଙ୍କୁ ସାହାଯ୍ୟ ମିଳି ସାରିଲାଣି ବୋଲି ସିଦ୍ଧାର୍ଥ ବାବୁ ପ୍ରକାଶ କରିଛନ୍ତି। ଏହାକୁ ବର୍ତ୍ତମାନ ଆମର ମୁଖ୍ୟ ଦାୟିତ୍ଵ ଭାବରେ ଗ୍ରହଣ କରି ଆମେ ଯଥାସମ୍ଭବ ପ୍ରବାସୀ ଶ୍ରମିକଙ୍କ ସହ ଯୋଗାଯୋଗ କରୁଛୁ ଏଥିପାଇଁ ଦିନରେ ୧୨ରୁ ୧୪ ଘଣ୍ଟା ସମୟ ଦେବାକୁ ପଡ଼ୁଛି ବୋଲି କହିଛନ୍ତି ରମଣୀ ଓ ସୁଦୀପ୍ତ |
ଏକ ସକରାତ୍ମକ ଟିପ୍ପଣୀ ସହିତ ଆରକ୍ଷୀ ଅଧିକ୍ଷକ ବଲାଙ୍ଗିର, ତଥା ବଲାଙ୍ଗିର ର ପୂର୍ବତନ ସାଂସଦ କଲିକେଶ ନାରାୟଣ ସିଂଦେଓ, ଲୋଇସିଂହା ବିଧାୟକ ଡକ୍ଟର ମୁକେଶ ମହାଲିଙ୍ଗ, ବିଜେପି ର ଭୃଗୁ ବକ୍ସିପାତ୍ର ଙ୍କ ସହ ତଥାଗତ ଶତପଥୀ ଭଳି ବହୁ ରାଜନୈତିକ ବ୍ୟକ୍ତିତ୍ଵ ଏଭଳି ମହାନ୍ କାର୍ଯ୍ୟ ପାଇଁ ଏହି ସଂଗଠନ ର ପ୍ରଶଂସା କରିଛନ୍ତି।
