ବିକାଶର ଦଶ ପାହୁଣ୍ଡ ପଛରେ, ଜୁଆଙ୍ଗ ଏବେବି ରହୁଛନ୍ତି ଚାଳଛପର ଭଙ୍ଗା ଘରେ।
କେନ୍ଦୁଝର,ତା୨୮/୮- ସରକାରଙ୍କ ନାରା ଅଛି କି “ସବୁ ମୁଣ୍ଡ ଉପରେ ପକ୍କା ଛାତ"- “ସବ୍ କା ବିକାଶ୍”। ପୁଣି ଶୁଣିବାକୁ ମିଳେ ଯେ ଡବଲ ଇଂଜିନ ସରକାରରେ ବିକାଶ ନୂଆ ଶିଖର ଛୁଇଁବ। କେନ୍ଦୁଝର ଜିଲ୍ଲାର ବାଂଶପାଳ ବ୍ଳକ୍ ଅନ୍ତର୍ଗତ କୁଣ୍ଢେଇ ଗ୍ରାମର ପଞ୍ଚୁ ଜୁଆଙ୍ଗର ଭଙ୍ଗା ଛପର ଘର ଏସବୁ ନାରା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଏସବୁ ନାରା ପଞ୍ଚୁ ଜୁଆଙ୍ଗ କାନରେ ପଡ଼ିଛି କି ନାହିଁ ଜଣା ନାହିଁ, ତଥାପି ସମସ୍ତଙ୍କ ଭିତରେ ସେ ଜଣେ କି ନାହିଁ, ଏସବୁ ଯୋଜନା ପାଇଁ ସେ ବା ତା' ପରିବାର ଯୋଗ୍ୟ କି ନାହିଁ, ସେ ବି ପଞ୍ଚୁର ଏକ ପ୍ରଶ୍ନ । କେବଳ ପଞ୍ଚୁ ନୁହେଁ, ଗାଁର ଅନେକ ଆଦିବାସୀ ପରିବାରଙ୍କ ମନରେ ଏହିପରି ଯକ୍ଷ ପ୍ରଶ୍ନ ଉଙ୍କି ମାରେ ଏହାର ଉତ୍ତର କିନ୍ତୁ ମିଳେନି। ସ୍ତ୍ରୀ ଓ ତିନି ଝିଅଙ୍କୁ ନେଇ ପଞ୍ଚୁ ଜୁଆଙ୍ଗର ପରିବାର ଆଦିମ ବିରଳ ଜନଜାତି ଜୁଆଙ୍ଗ ବର୍ଗର ସେ। ଦିନ ମଜୁରୀ କରି ଘର ଚଳାନ୍ତି ଊଭୟ ସ୍ଵାମୀ ଓ ସ୍ତ୍ରୀ। ତେବେ ଗାଁ ପାଖରେ ନିତିଦିନ କାମ ନ ମିଳିବାରୁ ପଞ୍ଚୁ ଏବେ କଟକରେ କାମ କରୁଛି। ସ୍ତ୍ରୀ କାଶିଦି ଘର ସମ୍ଭାଳୁଛି। ଏଠାରେ ମନରେଗା ଯୋଜନା ମଧ୍ଯ ଦିଗହରା ହୋଇଯାଇ ଅଛି ବର୍ଷକୁ ଏମାନେ ଶହେ ଦିନ କାମ ପାଇବା ସାତସପନ।କୌଣସି ସରକାରୀ ଯୋଜନାରେ ତାକୁ ଘର ଏଯାଏ ମିଳି ନାହିଁ ଏବେ ରହୁଥିବା ଘର ଖଣ୍ଡିକର ଛପର ଭାଙ୍ଗି ଯାଇଛି। ଜରି ପାଲ ଘୋଡେଇ ତଳେ ରହୁଛନ୍ତି ପୁରା ପରିବାର। ନିଜ ତାକତରେ ମରାମତି କରିପାରିଲା ନାହିଁ ସେ, ପଞ୍ଚାୟତ ଠାରୁ ଆରମ୍ଭ କରି କେତେ କାହାକୁ କହିଲା, ନେହୁରା ହେଲା କେହି ଶୁଣିଲେ ନାହିଁ ତା' ହାରି ଗୁହାରି। କର୍ମକୁ ଆଦରି ପଡିରହିଛି ସେ ଆଉ ଚାରା ନାହିଁ ଏତେ ସବୁ ସ୍ଲୋଗାନ ତାକୁ ଶୁଭୁନି। ଏ ବର୍ଷ ମଇ ମାସରୁ ଆଜି ପର୍ଯ୍ୟନ୍ତ ହେଉଥିବା ଲଗାତାର ବର୍ଷାରେ କେମିତି ସେମାନେ ରହୁଥିବେ, ସେ କଥା ତାଙ୍କ ବ୍ୟତୀତ ଅନ୍ୟ କେହି କହିବ କେମିତି। କିନ୍ତୁ ସେ ରହୁଥିବା ଘରର ଫୋଟୋ ବେଶ୍ କିଛି କହୁଛି। ଘର ଭିତର ବର୍ଷାରେ ଭିଜୁଛି ସାପ ବେଙ୍ଗ ଭୟ ପାହାଡି ଚିତି ଅଂଚଳରେ ଭର୍ତ୍ତି। ଏହି ସବୁ ଯାବତୀୟ ସମସ୍ଯା ପଞ୍ଚୁ ଜୁଆଙ୍ଗ ପାଖରେ ଅଟକି ଯାଇ ନାହିଁ। କୁଣ୍ଢେଇ ଜୁଆଙ୍ଗ ସାହିର ଅଧିକାଂଶ ଲୋକଙ୍କର ଏବେବି କଚ୍ଚା ଘର ରହିଛି ଅଶୀ ଦଶକରେ କିଛି ଭାଗ୍ୟବାନ ଟାଇଲି ଘର ପନ୍ଦର ହଜାର ଟଙ୍କାରେ ପାଇଥିଲେ ଇନ୍ଦିରା ଆବାସ ଯୋଜନାରେ। କିନ୍ତୁ ବର୍ତ୍ତମାନ ନା ବିଜୁ କୁଡ଼ିଆ ଯୋଜନାରେ ମିଳିଛି ନା ପ୍ରଧାନମନ୍ତ୍ରୀ ଆବାସ ଯୋଜନାରେ ଏମାନେ ସାମିଲ ହୋଇଛନ୍ତି। କାହାର ଚାଳ ଭାଙ୍ଗି ଯାଇଛି ତ ଆଉ କାହାର କାନ୍ଥ ଭାଙ୍ଗି ଯାଇଛି ପୁଣି କାହାର କବାଟ ନାହିଁ। ନିକଟବର୍ତ୍ତୀ ସାହି ଓ ଗାଁରେ ଘରେ ଘରେ ପକ୍କା ଘର ଯୋଜନା ପହଞ୍ଚିଥିବା ବେଳେ, ଏଠି ପୁଣି ଆଦିମ ଜନଜାତି ଜୁଆଙ୍ଗ ମାନଙ୍କ ପାଖରେ ନ ପହଞ୍ଚିବାର କାରଣ ଅସ୍ପଷ୍ଟ। ହୁଏତ ଏହା ହୋଇପାରେ ଯେ ଆଦିବାସୀ, ସରଳ,ନିରୀହ, ନିରକ୍ଷର, ଅସଚେତନତାର ମଉକା ନେଇ କେହି ଏମାନଙ୍କ ନ୍ୟାର୍ଯ୍ୟ ହକକୁ ଛଡାଇ ନେଇଛି। କେନ୍ଦୁଝର ସଦର ମହକୁମା ଠାରୁ ମାତ୍ର ଅଠର କିଲୋମିଟର ଦୂରରେ ଏ କୁଣ୍ଢେଇ ଗାଁ। ସଦର ନିର୍ବାଚନମଣ୍ଡଳୀ ମଧ୍ୟରେ ଆସୁଛି ଏ ଇଲାକା ଲୋକଙ୍କ କହିବା ଅନୁଯାୟୀ ନା ବ୍ଲକ୍ ଉନ୍ନୟନ ଅଧିକାରୀ ନା ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ନିର୍ଦ୍ଦେଶକ ନା ଅନ୍ୟ କୌଣସି ପ୍ରଶାସନିକ ଅଧିକାରୀଙ୍କ ପାଦ ପଡ଼େ ଏଠି। କେବଳ ସେତିକି ନୁହେଁ ବିଗତ ବର୍ଷ ମନ୍ତ୍ରୀ ଶ୍ରୀଯୁକ୍ତ ନିତ୍ୟାନନ୍ଦ ଗଣ୍ଡ ଆସି ମିଛ ପ୍ରତିଶୃତି ଦେଇ ଚାଲିଯାଇ ଥିବା କହୁଛନ୍ତି ସରଳ ଲୋକେ। ନେତା ଆସନ୍ତି କେବଳ ନିର୍ବାଚନ ସମୟରେ ଭୋଟ ମାଗିବାକୁ। କେତେ କ'ଣ ସ୍ଵପ୍ନ ଦେଖାଇ ଦେଇ ଯାଆନ୍ତି। ଶୁକ୍ରା ଜୁଆଙ୍ଗ କହିବା ଅନୁଯାୟୀ ସେମାନଙ୍କ ମଧ୍ୟରୁ ଅନେକ ଘର ପାଇଁ ବାରମ୍ବାର ଦରଖାସ୍ତ କରୁଛନ୍ତି। ପଞ୍ଚାୟତ ଅଧିକାରୀ କୁହନ୍ତି କି ଘର ଆସିଛି, ଏବେ ପାଇବ ଟିକେ ଥୟ ଧର। ଭରଷା କରି ଅପେକ୍ଷା କରନ୍ତି ଏମିତି ବର୍ଷ ପରେ ବର୍ଷ ଗଡ଼ି ଯାଏ ଯେଉଁ ଅବସ୍ଥାକୁ ସେହି ଅବସ୍ଥା ଶୁଣିବାକୁ, ଦେଖିବାକୁ କେହି ନାହିଁ। ପାଖ ଗାଁର କିଛି ଶିକ୍ଷିତ ଯୁବକ ମାନଙ୍କ କହିବା ଅନୁସାରେ କିଛି ଗୋଟେ ଘୋଟାଲା ନିଶ୍ଚିତ ହୋଇଛି ଏଠି ଅଧିକାର ହରିଲୁଟ ହୋଇଛି। ଗ୍ରାମ ସଭା ସ୍ଥିର କରେ ହିତାଧିକାରୀଙ୍କ ତାଲିକା। ତାହା ପୁଣି ପରିବାରର ଅବସ୍ଥା ଆଧାରରେ ତେବେ ଏ ପଞ୍ଚୁ ଜୁଆଙ୍ଗ ପାଇଲା ନାହିଁ କେମିତି ସରକାରୀ ଘର ବୋଲି ସେମାନେ ପ୍ରଶ୍ନ କରିଛନ୍ତି। ବ୍ଲକ ଅଫିସ ବା ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାରେ ଅନୁସନ୍ଧାନ କଲେ ଏହା ନିଶ୍ଚିତ ସ୍ପଷ୍ଟ ହେବ। କୁଣ୍ଢେଇ ଗ୍ରାମର କେତେ ଓ କେଉଁ କେଉଁ ହିତାଧିକାରୀଙ୍କ ସପକ୍ଷରେ କେବେ ଓ କେତେ ପକ୍କା ଘର ମଞ୍ଜୁର ହୋଇଥିଲା । ଗ୍ରାମ ପଞ୍ଚାୟତ ଅଧିକାରୀଙ୍କ ହାତ ସଫେଇକୁ ଏଡାଇ ଦିଆଯାଇ ନପାରେ ବୋଲି ମଧ୍ୟ ସନ୍ଦେହ କରିଛନ୍ତି କେତେକ। ଦେଖାଯାଉ, ଏସବୁ ଲୋକଲୋଚନକୁ ଆସିବା ପରେ କ'ଣ କରୁଛନ୍ତି ସରକାର। ପଞ୍ଚୁ ଜୁଆଙ୍ଗର ମୁଣ୍ଡ ଉପରକୁ କେବେ ମିଳିବ ପକ୍କା ଘର। କେବେ ତାର ଗାଁର ଅନ୍ୟ ଅଭାବୀ ହିତାଧିକାରୀ ପାଇବେ ପକ୍କା ଘର। ଏମାନେ ସମସ୍ତଙ୍କ ସହିତ ଜଣେ ଜଣେ ବୋଲି ଗଣା ହେବେ କେବେ । ସବ୍ କା ବିକାଶ କେବେ ହେବ ଓ ସବ୍ କା ଭରଷା କେବେ ଫେରିବ, ଦେଖିବାକୁ ଅପେକ୍ଷା ରହିଲା। ଘର ପାଇବାକୁ ଏହି ଗାଁର ଅନାଇ ବସିଥିବା କିଛି ହିତାଧିକାରୀଙ୍କ ନାମ ଏଠାରେ ପ୍ରକାଶ କରାଯାଉଛି ଦେଖିବା କେବେ ଆବାସ ଘର ମିଳୁଛି। ସେମାନେ ହେଲେ ବେଲ ଜୁଆଙ୍ଗ,ରଣଜିତ ଜୁଆଙ୍ଗ, ବୈରୁ ଜୁଆଙ୍ଗ,କ୍ଷୀରୋଦ ଜୁଆଙ୍ଗ, ଚନ୍ଦ୍ରଭାନୁ ଜୁଆଙ୍ଗ,ଲତା ଜୁଆଙ୍ଗ, ଦୋଳଗୋବିନ୍ଦ ଜୁଆଙ୍ଗ,ଡାକ୍ତର ଜୁଆଙ୍ଗ, କରୁଣାକର ଜୁଆଙ୍ଗ,ଜୟକୃଷ୍ଣ ଜୁଆଙ୍ଗ, ବୁଦ୍ଧିଆ ଜୁଆଙ୍ଗ, ଟିର ଜୁଆଙ୍ଗ,ହରି ଜୁଆଙ୍ଗ, ତରଣୀସେନ ଜୁଆଙ୍ଗ,ବିଦ୍ୟା ଜୁଆଙ୍ଗ, ମହେଶ୍ୱର ଜୁଆଙ୍ଗ,ଶିବାନନ୍ଦ ଜୁଆଙ୍ଗ, ପ୍ରକାଶ ଜୁଆଙ୍ଗ,ମଙ୍ଗୁଳି ଜୁଆଙ୍ଗ, ବ୍ରହ୍ମା ଜୁଆଙ୍ଗ,ଶ୍ରୀକାନ୍ତ ଜୁଆଙ୍ଗ, ସାନୁ ଜୁଆଙ୍ଗ,ଅଭିମନ୍ୟୁ ଜୁଆଙ୍ଗ, ସଙ୍କୁରୁ ଜୁଆଙ୍ଗ,ନାଗର ଜୁଆଙ୍ଗ, ବସନ୍ତ ଜୁଆଙ୍ଗ, ଅମିନ ଜୁଆଙ୍ଗ,ସୁନନ୍ଦୀ ଜୁଆଙ୍ଗ, ସୁକାନ୍ତି ଜୁଆଙ୍ଗ,ପଦ୍ମିନୀ ଜୁଆଙ୍ଗ,ସବିତା ଜୁଆଙ୍ଗ,
ଚନ୍ଦନି ଜୁଆଙ୍ଗ,ଗୀତାଞ୍ଜଳି ଜୁଆଙ୍ଗ,ଦମୟନ୍ତୀ ଜୁଆଙ୍ଗ, ଅଙ୍କିତା ଜୁଆଙ୍ଗ,ରାଧିକା ଜୁଆଙ୍ଗ,କଳିକା ଜୁଆଙ୍ଗ,ବୈଶାଖୀ ଜୁଆଙ୍ଗ,ରଜନୀ ଜୁଆଙ୍ଗ,
ସୁମିତ୍ରା ଜୁଆଙ୍ଗ, ସବିତା ଜୁଆଙ୍ଗ,ଗୁଲାଣି ଜୁଆଙ୍ଗ, ପ୍ରମିଳା ଜୁଆଙ୍ଗ,ଫୁଲମଣି ଜୁଆଙ୍ଗ,ନବତୀ ଜୁଆଙ୍ଗ ଏବଂ
ରମା ଜୁଆଙ୍ଗ।
