ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ପାରଳାଖେମୁଣ୍ଡି ସ୍ଥିତ ଜିଲ୍ଲା ଶିଶୁ ସୁରକ୍ଷା ୟୁନିଟ୍ ସଭା ଗୃହ ଠାରେ ମିଳିତ ଜାତିସଂଘ ଶିଶୁ ସୁରକ୍ଷା ଅଧିକାର ସନନ୍ଦର ୩୦ ବର୍ଷ ପୂର୍ତ୍ତୀ ପାଳନ ଅବସରରେ ଏକ ଜିଲ୍ଲା ସ୍ତରୀୟ କର୍ମଶାଳା ସଂଯୋଗ (କଟକ) ଏବଂ ଗଜପତି ଜିଲ୍ଲା ଶିଶୁ ସୁରକ୍ଷା ୟୁନିଟ୍ ମିଳିତ ସହଯୋଗରେ ଆୟୋଜିତ ହୋଇଥିଲା ।
ଏହି କର୍ମଶାଳା କାର୍ଯ୍ୟକ୍ରମରେ ଅନ୍ୟ ମାନଙ୍କ ମଧ୍ୟରେ କିଶୋର ନ୍ୟାୟ ପରିଷଦର ପ୍ରିନ୍ସିପାଲ୍ ମାଜିଷ୍ଟ୍ରେଟ ଶୁଶ୍ରୀ ଶୁଭଶ୍ରୀ ପ୍ରଧାନ , ଜିଲ୍ଲା ଶିଶୁ କଲ୍ୟାଣ ସମିତିର ଅଧ୍ୟକ୍ଷ ପ୍ରମୋଦ କୁମାର ରାଉଳ , ଜିଲ୍ଲା ଶିକ୍ଷା ଅଧିକାରୀ ପ୍ରଦୀପ କୁମାର ନାଗ , ଜିଲ୍ଲା ଶିଶୁ ସୁରକ୍ଷା ୟୁନିଟ୍ ଅଧିକାରୀ ଅରୁଣ କୁମାର ତ୍ରିପାଠୀ , ଜିଲ୍ଲା ସମାଜ ମଙ୍ଗଳ ସୁରକ୍ଷା ଅଧିକାରୀ ଯଶୋବନ୍ତି ବେହେରା ପ୍ରମୁଖ ମଞ୍ଚାସୀନ ଅତିଥି ଭାବେ ଯୋଗ ଦେଇଥିଲେ ।
ମୁଖ୍ୟତଃ ୟୁନିସେଫ୍ ସହାୟତାରେ ଗଜପତି ଜିଲ୍ଲାର ଗୋଷାଣୀ ବ୍ଲକ ଅନ୍ତର୍ଗତ ୩ ଟି ପଞ୍ଚାୟତର (ଲାବଣ୍ୟଗଡ଼ , ଶୋବରା ଏବଂ ଗାରବନ୍ଧ) ୬ ଜଣ ଶିଶୁ ଗବେଷକଙ୍କ ଦ୍ୱାରା ସ୍ଥାନୀୟ ଅଞ୍ଚଳରେ ଶିଶୁମାନେ ପାଉଥିବା ମୌଳିକ ସୁବିଧା ଗୁଡିକ ଯଥା--ଜଳ ଓ ପରିମଳ , ପୁଷ୍ଟି , ସ୍ବାସ୍ଥ୍ୟ , ସୁରକ୍ଷା ଏବଂ ଶିକ୍ଷାରେ ପ୍ରଭୃତି ସମ୍ପର୍କରେ ପାଇଥିବା ତଥ୍ୟ ସବୁର ବିବରଣୀ ପ୍ରଦାନ କରାଯାଇଥିଲା ।
ଏହି କର୍ମଶାଳାରେ ଜିଲ୍ଲା ଶିଶୁ କଲ୍ୟାଣ କମିଟି , ଜିଲ୍ଲା କିଶୋର ନ୍ୟାୟ ପରିଷଦ, ଜିଲ୍ଲା ଶିଶୁ ସୁରକ୍ଷା ୟୁନିଟ୍ ର କର୍ମକର୍ତ୍ତା , ଜିଲ୍ଲା ସମନ୍ୱିତ ଶିଶୁ ବିକାଶ ଯୋଜନାର ପ୍ରତିନିଧି ଏବଂ ଜିଲ୍ଲା ଚାଇଲଡ଼ ଲାଇନର କର୍ମକର୍ତ୍ତା ମାନେ ଉପସ୍ଥିତ ଥିଲେ ।
କର୍ମଶାଳା କାର୍ଯ୍ୟକ୍ରମରେ ସଂଯୋଗ ର ମଣ୍ଡଳ ପ୍ରକଳ୍ପ ସଂଯୋଜକ ଜଗନ୍ନାଥ ସାହୁ ଯୋଗଦେଇ ସ୍ୱାଗତ ଭାଷଣ ଦେଇଥିବା ବେଳେ ଜିଲ୍ଲା ଶିଶୁ କଲ୍ୟାଣ ସମିତିର ସଦସ୍ୟ ହୀରଣ୍ୟ ରାୟ ଉପସ୍ଥିତ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।
ଶେଷରେ ଶିଶୁ ମାନଙ୍କ ସହ ଉପସ୍ଥିତ ସମସ୍ତ ଅଧିକାରୀ ଶିଶୁମାନଙ୍କ ସୁରକ୍ଷା ଏବଂ ଅଧିକାରକୁ ଶତ ପ୍ରତିଶତ ସୁନିଶ୍ଚିତ କରିବା ପାଇଁ କର୍ମଶାଳା କାର୍ଯ୍ୟକ୍ରମରେ ଶପଥ ପାଠ ନେଇଥିଲେ ।
