ଉପଜିଲ୍ଲାପାଳ କାର୍ଯ୍ୟାଳୟ ଆଗରେ ହଜାର ହଜାର ଲୋକଙ୍କ ଶାନ୍ତିପୂର୍ଣ୍ଣ ବିକ୍ଷୋଭ; ତୁରନ୍ତ ନ୍ୟାୟ ଓ ହସ୍ତକ୍ଷେପ ଦାବି
ଟିଟିଲାଗଡ଼, ୦୯.୦୬: ବଲାଙ୍ଗିର ଜିଲ୍ଲା ଟିଟିଲାଗଡ଼ ସହର ଦଳିତ ସ୍ୱାଭିମାନ, ସାମାଜିକ ନ୍ୟାୟ ଏବଂ ଅସ୍ପୃଶ୍ୟତା ବିରୋଧୀ ସ୍ଲୋଗାନରେ ଆଜି ପ୍ରକମ୍ପିତ ହୋଇଉଠିଥିଲା। ଘୁଷୁରାମୁଣ୍ଡା ଗ୍ରାମରେ ଜଣେ ଦଳିତ ଅଙ୍ଗନୱାଡ଼ି ସହାୟିକାଙ୍କ ସହ କଥିତ ଜାତିଗତ ବୈଷମ୍ୟ ଘଟଣାକୁ ନେଇ ହଜାର ହଜାର ଦଳିତ ସମ୍ପ୍ରଦାୟର ଲୋକ, ସାମାଜିକ କର୍ମୀ ଏବଂ ବିଭିନ୍ନ ସଂଗଠନର ସଦସ୍ୟ ଏକତ୍ରିତ ହୋଇ ବିଶାଳ ଦଳିତ ସ୍ୱାଭିମାନ ମହାରାଲି ଆୟୋଜନ କରିଥିଲେ।
ଆୟୋଜକଙ୍କ ସୂଚନା ଅନୁସାରେ ପ୍ରାୟ ୫ ହଜାରରୁ ଅଧିକ ଦଳିତ ସମ୍ପ୍ରଦାୟର ଲୋକ ଏହି ମହାରାଲିରେ ଯୋଗଦେଇଥିଲେ। ଏଲ. ଡି. ଏ, ଭୀମ ଆର୍ମି ଏବଂ ବିଭିନ୍ନ ଦଳିତ ସଂଗଠନ ଏହି ଆନ୍ଦୋଳନର ନେତୃତ୍ୱ ନେଇଥିଲେ। ଟିଟିଲାଗଡ଼ ବାଳକ ହାଇସ୍କୁଲ ପଡ଼ିଆରେ ଲୋକଙ୍କ ସମାଗମ ଆରମ୍ଭ ହୋଇଥିଲା। ପରେ ସେଠାରୁ ଏକ ବିଶାଳ ରାଲି ବାହାରି ସହରର ମୁଖ୍ୟ ରାସ୍ତା ଦେଇ ଉପଜିଲ୍ଲାପାଳ କାର୍ଯ୍ୟାଳୟ ପର୍ଯ୍ୟନ୍ତ ପହଞ୍ଚିଥିଲା। ରାଲି ସମୟରେ ଅଂଶଗ୍ରହଣକାରୀମାନେ “ଅସ୍ପୃଶ୍ୟତା ବନ୍ଦ କର”, “ସମ୍ବିଧାନକୁ ସମ୍ମାନ ଦିଅ”, “ଜାତିଗତ ବୈଷମ୍ୟ ଚାଲିବ ନାହିଁ”, “ଦଳିତଙ୍କୁ ନ୍ୟାୟ ଦିଅ” ଆଦି ବିଭିନ୍ନ ସ୍ଲୋଗାନ ଦେଇ ସହର ପରିକ୍ରମା କରିଥିଲେ। ରାଲି ପରେ ଉପଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଏକ ଶାନ୍ତିପୂର୍ଣ୍ଣ ଧାରଣା ଓ ପ୍ରତିବାଦ ସଭା ଅନୁଷ୍ଠିତ ହୋଇଥିଲା।
ଆନ୍ଦୋଳନକାରୀମାନେ ଅଭିଯୋଗ କରିଛନ୍ତି ଯେ ଘୁଷୁରାମୁଣ୍ଡା ଗ୍ରାମର ଅଙ୍ଗନୱାଡ଼ି ସହାୟିକା ପୁଣ୍ୟା ହରିପାଳଙ୍କୁ କେବଳ ତାଙ୍କ ଜାତିଗତ ପରିଚୟ ଆଧାରରେ ରନ୍ଧନ କାର୍ଯ୍ୟ କରିବା ଓ ନିଜର ସରକାରୀ ଦାୟିତ୍ୱ ପାଳନ କରିବାରୁ ବଞ୍ଚିତ କରାଯାଇଥିଲା। ଗ୍ରାମର କିଛି ଲୋକ ତାଙ୍କୁ ବିରୋଧ କରି ଅଙ୍ଗନୱାଡ଼ି କେନ୍ଦ୍ରକୁ ବନ୍ଦ କରିବାକୁ ବାଧ୍ୟ କରିଥିବା ଅଭିଯୋଗ ମଧ୍ୟ କରାଯାଇଛି। ଏହା ଭାରତୀୟ ସମ୍ବିଧାନର ସମାନତା ଓ ଅସ୍ପୃଶ୍ୟତା ନିଷେଧ ସମ୍ବନ୍ଧୀୟ ବ୍ୟବସ୍ଥାର ବିରୋଧୀ ବୋଲି ବକ୍ତାମାନେ କହିଥିଲେ। ପ୍ରତିବାଦ ସଭାରେ ବକ୍ତାମାନେ ଆହୁରି ଅଭିଯୋଗ କରିଥିଲେ ଯେ ଘଟଣାର ସମାଧାନ ପାଇଁ ପ୍ରଶାସନିକ ସ୍ତରରେ ଉଦ୍ୟମ କରାଯାଇଥିବା ବେଳେ ମଧ୍ୟ ପୁଣ୍ୟା ହରିପାଳଙ୍କୁ ପୁନର୍ବାର ରନ୍ଧନ କାର୍ଯ୍ୟରେ ନିୟୋଜିତ କରାଯାଇନଥିଲା। ସେମାନଙ୍କ ଅଭିଯୋଗ ଯେ ଉପଜିଲ୍ଲାପାଳ ଶ୍ରୀ ପଦ୍ମନାଭ ବେହେରା ଗ୍ରାମବାସୀଙ୍କ ଦାବିକୁ ଗ୍ରହଣ କରି ପୁଣ୍ୟା ହରିପାଳଙ୍କୁ ଖାଦ୍ୟ ରନ୍ଧନ ଓ ବଣ୍ଟନ କରିବାକୁ ଅନୁମତି ଦେଇନଥିଲେ ଏବଂ ମାତୃଶକ୍ତି କମିଟି ମାଧ୍ୟମରେ ଶୁଖିଲା ଖାଦ୍ୟ ବଣ୍ଟନ ବ୍ୟବସ୍ଥା କରାଯାଇଥିଲା। ଆନ୍ଦୋଳନକାରୀମାନେ ଏହାକୁ ଅସ୍ପୃଶ୍ୟତାକୁ ସାଧାରଣ ଘଟଣା ଭାବେ ଗ୍ରହଣ କରିବା ସହ ସମାନ ବୋଲି ଅଭିଯୋଗ କରିଥିଲେ। ସଭାରେ ଉପସ୍ଥିତ ବକ୍ତାମାନେ କହିଥିଲେ ଯେ ଘୁଷୁରାମୁଣ୍ଡା ଘଟଣା କୌଣସି ବିଚ୍ଛିନ୍ନ ଘଟଣା ନୁହେଁ। ସମ୍ପ୍ରତି ବରଗଡ଼ ଜିଲ୍ଲାର ଝାରବନ୍ଧ ବ୍ଲକ ଅନ୍ତର୍ଗତ ଦିୱାନପାଲି, କେନ୍ଦ୍ରାପଡ଼ା ଜିଲ୍ଲାର ରାଜନଗର ଏବଂ ନୂଆପଡ଼ା ସମେତ ରାଜ୍ୟର ବିଭିନ୍ନ ସ୍ଥାନରେ ମଧ୍ୟ ଜାତିଗତ ବୈଷମ୍ୟ ଓ ଅସ୍ପୃଶ୍ୟତା ସମ୍ପର୍କିତ ଅଭିଯୋଗ ସାମ୍ନାକୁ ଆସିଥିବା ସେମାନେ ଦାବି କରିଥିଲେ। ଏପରି ଘଟଣା ଦଳିତ ସମ୍ପ୍ରଦାୟ ମଧ୍ୟରେ ଅସନ୍ତୋଷ ଓ ଅସୁରକ୍ଷାର ଭାବନା ସୃଷ୍ଟି କରୁଥିବା ବକ୍ତାମାନେ କହିଥିଲେ।ମହାରାଲି ଶେଷରେ ଏକ ପ୍ରତିନିଧି ଦଳ ଉପଜିଲ୍ଲାପାଳଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରିଥିଲେ। ସ୍ମାରକପତ୍ରରେ ଘୁଷୁରାମୁଣ୍ଡା ଘଟଣାର ନିରପେକ୍ଷ ତଦନ୍ତ, ପୁଣ୍ୟା ହରିପାଳଙ୍କୁ ତାଙ୍କ କର୍ତ୍ତବ୍ୟ ପାଳନରେ ସୁଯୋଗ ପ୍ରଦାନ, ଦୋଷୀଙ୍କ ବିରୋଧରେ ଆଇନଗତ ପଦକ୍ଷେପ ଏବଂ ରାଜ୍ୟରେ ବଢ଼ୁଥିବା କଥିତ ଅସ୍ପୃଶ୍ୟତା ଘଟଣା ରୋକିବା ପାଇଁ ସରକାରଙ୍କ ତୁରନ୍ତ ହସ୍ତକ୍ଷେପ ଦାବି କରାଯାଇଥିଲା।
ବକ୍ତାମାନେ ସତର୍କ କରି କହିଥିଲେ ଯେ ଯଦି ଦାବିଗୁଡ଼ିକର ସମାଧାନ ନ ହୁଏ, ତେବେ ଆଗାମୀ ଦିନରେ ଆନ୍ଦୋଳନକୁ ରାଜ୍ୟବ୍ୟାପୀ ଭାବେ ତୀବ୍ର କରାଯିବ। ତେବେ ସମଗ୍ର କାର୍ଯ୍ୟକ୍ରମ ଶାନ୍ତିପୂର୍ଣ୍ଣ ଭାବେ ସମ୍ପନ୍ନ ହୋଇଥିବା ବେଳେ ସହରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିଲା।
