• ଛଅଟି ସର୍କଲରେ ମୁତୟନ ଅଛନ୍ତି ୫,୯୨୫ ଜଣିଆ ଉତ୍ସର୍ଗୀକୃତ ଦଳ

• ରଣନୀତିକ ସ୍ତରରେ ମହଜୁଦ ରହିଛି ଜରୁରୀକାଳୀନ ସାମଗ୍ରୀ ଏବଂ ଉପକରଣ\

• ତ୍ୱରିତ ପଦକ୍ଷେପ ପାଇଁ ଛଅଟି ମୋବାଇଲ୍ ସବଷ୍ଟେସନ୍ ଏବଂ ଦୁଇଟି ଟାୱାର ୱାଗନ୍ ରଖାଯାଇଛି

•  ୧୧ କେଭି ଏବଂ ୩୩ କେଭି ଲାଇନର ଡ୍ରୋନ ଆଧାରିତ ସର୍ଭେ

•  ଭରସାଯୋଗ୍ୟ ବିଜୁଳି ଯୋଗାଣ ସୁନିଶ୍ଚିତ କରିବା ଲକ୍ଷ୍ୟରେ ନିଆଯାଇଛି ପଦକ୍ଷେପ

ବ୍ରହ୍ମପୁର, ଜୁନ ୨୦୨୬ : ଦକ୍ଷିଣ ଓଡ଼ିଶାରେ ମୌସୁମୀ ଋତୁ ପାଖେଇ ଆସୁଥିବାରୁ ପ୍ରବଳ ବର୍ଷା,ପବନ ଏବଂ ବଜ୍ରପାତ ଯୋଗୁଁ ଉତ୍ପନ୍ନ ସମ୍ଭାବ୍ୟ ଆହ୍ୱାନର ମୁକାବିଲା ପାଇଁ ଟିପି ସଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ (ଟିପିଏସ୍ଓଡିଏଲ୍) ଏହାର ପ୍ରସ୍ତୁତିକୁ ଜୋରଦାର କରିଛି । ଆଗାମୀ ବର୍ଷା ଋତୁରେ ଏହାର ସେବା ଯୋଗାଉଥିବା ଅଞ୍ଚଳରେ ଭରସାଯୋଗ୍ୟ ଏବଂ ନିରବଚ୍ଛିନ୍ନ ବିଦ୍ୟୁତ ଯୋଗାଣ ସୁନିଶ୍ଚିତ କରିବାକୁ କମ୍ପାନୀ ଅନେକ ସକ୍ରିୟ ପଦକ୍ଷେପ ଗ୍ରହଣ କରିଛି । ଜରୁରୀକାଳୀନ ପ୍ରତିକ୍ରିୟା ବ୍ୟବସ୍ଥା, ନେଟୱର୍କ ସୁଦୃଢ଼ୀକରଣ ଏବଂ ଉପଭୋକ୍ତା ସହାୟତା ବ୍ୟବସ୍ଥାକୁ ମଜଭୁତ କରିବା ଉପରେ ବିଶେଷ ଧ୍ୟାନ ଦିଆଯାଇଛି । ପ୍ରଯୁକ୍ତି ଆଧାରିତ ମନିଟରିଂ ଏବଂ ମାନବ ସମ୍ବଳର ରଣନୈତିକ ନିୟୋଜନ ମାଧ୍ୟମରେ, ଟିପିଏସ୍ଓଡିଏଲ୍ ମୌସୁମୀ ସମ୍ବନ୍ଧୀୟ ଯେକୌଣସି ଜରୁରୀ ପରିସ୍ଥିତିର ଶୀଘ୍ର ମୁକାବିଲା କରିବା ଲାଗି ସମ୍ପୂର୍ଣ୍ଣ ପ୍ରସ୍ତୁତ ରହିଛି।

ଘଞ୍ଚ ଜଙ୍ଗଲ, ଦୁର୍ଗମ ପାହାଡ଼ିଆ ଅଞ୍ଚଳ ଏବଂ ଦୁର୍ଗମ ଭୂଖଣ୍ଡ ସମେତ ଦକ୍ଷିଣ ଓଡ଼ିଶାର ଭୌଗୋଳିକ ଆହ୍ୱାନକୁ ଗୁରୁତ୍ୱ ଦେଇ ଟିପିଏସ୍ଓଡିଏଲ୍ ଏହାର ଜରୁରୀକାଳୀନ ସ୍ଥିତିରେ ପ୍ରତିକ୍ରିୟା ବ୍ୟବସ୍ଥା ଏବଂ ନେଟୱର୍କ ଭିତ୍ତିଭୂମିକୁ ଦୃଢ଼ କରିଛି । ଯାହା ମୌସୁମୀ ସମ୍ବନ୍ଧୀୟ ଯେକୌଣସି ଜରୁରୀ ପରିସ୍ଥିତିକୁ ପ୍ରଭାବଶାଳୀ ଭାବରେ ପରିଚାଳନା କରିବ । କମ୍ପାନୀ ବର୍ଷା ଋତୁରେ ଶୀଘ୍ର ପୁନରୁଦ୍ଧାର, ଉନ୍ନତ ମନିଟରିଂ ଏବଂ ଉନ୍ନତ ଉପଭୋକ୍ତା ସହାୟତା ସେବା ଉପରେ ଧ୍ୟାନ ଦେଇ ଏକ ରଣନୀତି ଗ୍ରହଣ କରିଛି ।

ତ୍ୱରିତ ପୁନରୁଦ୍ଧାର କାର୍ଯ୍ୟ ପାଇଁ କମ୍ପାନୀ ତରଫରୁ ୫,୯୨୫ ଜଣ କର୍ମଚାରୀଙ୍କୁ ନେଇ ଏକ ଉତ୍ସର୍ଗୀକୃତ ଦଳକୁ କମ୍ପୀନୀ ସେବା ଯୋଗାଉଥିବା ବିଭିନ୍ନ ସ୍ଥାନରେ ମୁତୟନ କରାଯାଇଛି । ଜରୁରୀକାଳୀନ ସ୍ଥିତିରେ ଛଅଟି ମୋବାଇଲ୍ ଡିଷ୍ଟ୍ରିବ୍ୟୁସନ୍ ସବଷ୍ଟେସନ୍ ଏବଂ ଦୁଇଟି ଟାୱାର ୱାଗନ୍ ର ବ୍ୟବସ୍ଥା କରାଯାଇଛି । ଯାହା ଗଛ ପଡିବା କିମ୍ବା ପ୍ରତିକୂଳ ପାଣିପାଗ ପରିସ୍ଥିତି ହେତୁ ସୃଷ୍ଟି ହୋଇଥିବା ଯେକୌଣସି ବିଦ୍ୟୁତ ସମ୍ବନ୍ଧୀୟ ସମସ୍ୟାର ମୁକାବିଲା କରିବାରେ ସମର୍ଥ ହେବ ।

ପୁନରୁଦ୍ଧାର କାର୍ଯ୍ୟକୁ ତ୍ୱରିତ ବେଗରେ କରିବା ପାଇଁ ଟିପିଏସ୍ଓଡିଏଲ୍ ରଣନୀତିକ ସ୍ତରରେ ଇଲେକ୍ଟ୍ରିକ ପୋଲ, କଣ୍ଡକ୍ଟର ଏବଂ ଏଲଟି ଏବି କେବୁଲ ପରି ଗୁରୁତ୍ୱପୂର୍ଣ୍ଣ ଜରୁରୀକାଳୀନ ସାମଗ୍ରୀ ମଧ୍ୟ ମହଜୁଦ ରଖିଛି । ଏତଦଭିନ୍ନ, ରାତ୍ରି ସମୟରେ ନିରବଚ୍ଛିନ୍ନ ମରାମତି ଏବଂ ରକ୍ଷଣାବେକ୍ଷଣ କାର୍ଯ୍ୟକୁ ସୁଗମ କରିବା ପାଇଁ ପ୍ରତ୍ୟେକ ଡିଭିଜନରେ ୨୫ଟି ଏଏସକେଏ ଲାଇଟ୍ ଏବଂ ୧୯ଟି ଡିଜି ସେଟ୍ ଉପଲବ୍ଧ କରାଯାଇଛି ।

ସେହିଭଳି ନେଟୱର୍କ ସୁଦୃଢ଼ୀକରଣ ପଦକ୍ଷେପର ଏକ ଅଂଶ ଭାବରେ, କମ୍ପାନୀ ଏହାର କାର୍ଯ୍ୟକ୍ଷମ ଅଞ୍ଚଳରେ ୨,୫୨୯ ଇଣ୍ଟରପୋଜିଂ ପୋଲ୍ ସ୍ଥାପନ କରିସାରିଛି । ଚଳିତ ବର୍ଷର ପ୍ରସ୍ତୁତିର ଏକ ପ୍ରମୁଖ ପ୍ରକ୍ରିୟା ହେଉଛି ୧୧ କେଭି ଏବଂ ୩୩ କେଭି ଲାଇନର ଡ୍ରୋନ୍ ଆଧାରିତ ସର୍ଭେ, ଯାହା ବିଶେଷ କରି ଦୁର୍ଗମ ପାହାଡ଼ିଆ ଏବଂ ଜଙ୍ଗଲ ଅଞ୍ଚଳରେ ସମ୍ବେଦନଶୀଳ ପଏଣ୍ଟଗୁଡ଼ିକୁ ଶୀଘ୍ର ଚିହ୍ନଟ କରିବାରେ ସକ୍ଷମ ହୋଇଥାଏ ।

ନିରନ୍ତର ମନିଟରିଂ ଏବଂ ପରିଚାଳନା ଦକ୍ଷତା ସୁନିଶ୍ଚିତ କରିବା ପାଇଁ ବ୍ରହ୍ମପୁରରେ ପାୱାର ସିଷ୍ଟମ କଣ୍ଟ୍ରୋଲ ସେଣ୍ଟର (ପିଏସସିସି) ଏବଂ ରାୟଗଡ଼ା, ଫୁଲବାଣୀ ଏବଂ ଜୟପୁରରେ ଥିବା ଏରିଆ ପାୱାର ସିଷ୍ଟମ କଣ୍ଟ୍ରୋଲ ସେଣ୍ଟର (ଏପିଏସସିସି) ଦିନରାତି କାର୍ଯ୍ୟକ୍ଷମ ରହିଛି । ଏହି କେନ୍ଦ୍ରଗୁଡ଼ିକ ୨୫୨ଟି ୩୩/୧୧ କେଭି ପ୍ରାଇମେରୀ ସବଷ୍ଟେସନ ଉପରେ ନଜର ରଖିଛି । ଯାହା ଉନ୍ନତ ସ୍କାଡା ସିଷ୍ଟମ ମାଧ୍ୟମରେ ପରିଚାଳିତ ହେଉଛି ଏବଂ ସଠିକ୍ ସମୟରେ ସମସ୍ତ ସୂଚନା ପ୍ରଦାନ କରୁଛି ।

ଗ୍ରାହକଙ୍କୁ ଆଉଟେଜ୍ ଏବଂ ପୁନରୁଦ୍ଧାର ସମ୍ପର୍କିତ ଅପଡେଟ୍ ଦେବା ପାଇଁ ଆଇଭିଆରଏସ୍ ସମର୍ଥିତ ସିଷ୍ଟମ୍, ଏସ୍ଏମ୍ଏସ୍ ଆଲର୍ଟ ଏବଂ ଏକ ଉତ୍ସର୍ଗୀକୃତ ମିସ୍ଡ କଲ୍ ସେବା (୯୭୭୭୭୭୪୬୯୯) ସହିତ ଉପଭୋକ୍ତା ସେବା ପ୍ରଣାଳୀକୁ ମଧ୍ୟ ମଜଭୁତ କରାଯାଇଛି । ଏଥିସହିତ, ଟିପିଏସ୍ଓଡିଏଲର ଟୋଲ ଫ୍ରି ନମ୍ବର ୧୯୧୨ ଏବଂ ୧୮୦୦-୨୦୨୬ ମାଧ୍ୟମରେ ୨୪ ଘଣ୍ଟିଆ କଲ ସେଣ୍ଟର ସେବା ତୁରନ୍ତ ଉପଭୋକ୍ତା ସହାୟତା ଏବଂ ଜରୁରୀକାଳୀନ ପ୍ରତିକ୍ରିୟା ସୁନିଶ୍ଚିତ କରୁଛି ।

ଉପଭୋକ୍ତାଙ୍କୁ ଭରସାଯୋଗ୍ୟ ସେବା, ଗୁଣାତ୍ମକ ବିଜୁଳି ଯୋଗାଣ ଏବଂ ସ୍ୱଚ୍ଛତା ପ୍ରତି କମ୍ପାନୀ ଏହାର ପ୍ରତିବଦ୍ଧତାକୁ ଆହୁରି ଦୃଢ କରି, ଏସ୍ଏଆଇଏଫଆଇ ଏବଂ ଏସ୍ଏଆଇଡିଆଇ ଭଳି ଅନଲାଇନ୍ ବିଶ୍ୱସନୀୟତା ସୂଚକାଙ୍କ ପ୍ରକାଶ ଜାରି ରଖିଛି । ସବୁଠାରୁ ଦୁର୍ଗମ ସ୍ଥାନରେ ମଧ୍ୟ ବିଭାଗଗୁଡ଼ିକ ମଧ୍ୟରେ ନିରବଚ୍ଛିନ୍ନ ସମନ୍ୱୟ ସୁନିଶ୍ଚିତ କରିବା ପାଇଁ ଏକ ଉତ୍ସର୍ଗୀକୃତ ୩୩ କେଭି କଣ୍ଟ୍ରୋଲ ଡେସ୍କର ମଧ୍ୟ ବ୍ୟବସ୍ଥା କରାଯାଇଛି । ଟେକ୍ନୋଲୋଜି ପରିଚାଳିତ ପ୍ରସ୍ତୁତି ଏବଂ ଏକ ସହନଶୀଳ ଶ୍ରମଶକ୍ତି ଦ୍ୱାରା ସମର୍ଥିତ, ଟିପିଏସ୍ଓଡିଏଲ୍ ମୌସୁମୀ ଋତୁରେ ବିଶ୍ୱସନୀୟ ଏବଂ ଦକ୍ଷ ବିଦ୍ୟୁତ ଯୋଗାଣ ପ୍ରଦାନ କରିବାକୁ ପ୍ରତିଶ୍ରୁତିବଦ୍ଧ ।

ଏହି ପ୍ରସ୍ତୁତି ସମ୍ପର୍କରେ ଶ୍ରୀ ଅମିତ କୁମାର ଗର୍ଗ, ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ, ଟିପିଏସ୍ଓଡିଏଲ୍ କହିଛନ୍ତି, “ଦକ୍ଷିଣ ଓଡ଼ିଶାରେ ବିଶେଷ କରି ଦୁର୍ଗମ ଏବଂ ଅପହଞ୍ଚ ଅଞ୍ଚଳରେ ମୌସୁମୀ ବହୁ ଆହ୍ୱାନ ଆଣିଥାଏ । ଏହାକୁ ଧ୍ୟାନରେ ରଖି ଆମେ ଆମର କ୍ଷେତ୍ର ପ୍ରସ୍ତୁତି, ଜରୁରୀକାଳୀନ ପ୍ରତିକ୍ରିୟା ବ୍ୟବସ୍ଥା ଏବଂ ନେଟୱର୍କ ନିରୀକ୍ଷଣ ପ୍ରଣାଳୀକୁ ଆଗୁଆ ସୁଦୃଢ଼ କରିଛୁ । ଆମର ଟିମ୍ ଉନ୍ନତ ଜ୍ଞାନକୌଶଳ ଏବଂ ପର୍ଯ୍ୟାପ୍ତ ସମ୍ବଳ ସହିତ ଦିନରାତି କାର୍ଯ୍ୟ କରୁଛନ୍ତି ଯାହା ସମଗ୍ର ବର୍ଷାଋତୁରେ ଗ୍ରାହକଙ୍କ ପାଇଁ ତ୍ୱରିତ ପୁନରୁଦ୍ଧାର ଏବଂ ଭରସାଯୋଗ୍ୟ ବିଜୁଳି ଯୋଗାଣ ସୁନିଶ୍ଚିତ କରେ । ଏଥି ସହିତ, ଆମେ ଉପଭୋକ୍ତାମାନଙ୍କୁ ସତର୍କ ରହିବାକୁ ଏବଂ ପ୍ରବଳ ବର୍ଷା ତଥା ଝଡ଼ ସମୟରେ ବୈଦ୍ୟୁତିକ ସୁରକ୍ଷା ନିୟମ ପାଳନ କରିବାକୁ ଅନୁରୋଧ କରୁଛୁ ।