କାଶୀପୁର ରୁ ବୈକୁଣ୍ଠ ଦୁରିଆ - ମହା ଶିବରାତ୍ରୀର ପବିତ୍ର ରାତ୍ରିରେ ପୋଡ଼ାପାଡ଼ି ଗ୍ରାମ ଭକ୍ତି ଓ ଆନନ୍ଦର ଅଲୌକିକ ମହଲରେ ମହିମାମୟ ହୋଇଉଠିଲା। ପୁରାତନ ଐତିହ୍ୟ ଓ ଆସ୍ଥାର ପ୍ରତୀକ ଧବଳେଶ୍ୱର ମନ୍ଦିର ରେ ସକାଳୁଠାରୁ ଭକ୍ତମାନଙ୍କ ଅସାଧାରଣ ଭିଡ଼ ଦେଖିବାକୁ ମିଳିଥିଲା। ହାତରେ ବେଳପତ୍ର, ଫୁଲ ଓ ଦୁଧ ନେଇ ଶ୍ରଦ୍ଧାଳୁମାନେ ଲମ୍ବା ଧାଡି ରେ ଦଣ୍ଡାୟମାନ ହୋଇ ମହାଦେବଙ୍କ ଦର୍ଶନ କରିଥିଲେ। “ଓଁ ନମଃ ଶିବାୟ” ର ଧ୍ୱନିରେ ସମଗ୍ର ପରିବେଶ ଶିବମୟ ହୋଇଉଠିଥିଲା।
ରାତି ହେବା ସହିତ ମନ୍ଦିର ପ୍ରାଙ୍ଗଣ ଆଲୋକମାଳା, ଦୀପ ଓ ରଙ୍ଗିନ ଲାଇଟ୍‌ରେ ଆଲୋକିତ ହୋଇ ଅପୂର୍ବ ଦୃଶ୍ୟ ସୃଷ୍ଟି କରିଥିଲା। ମନ୍ଦିରର ଶିଖର ଆଲୋକର ଝଲକରେ ଏମିତି ଲାଗୁଥିଲା ଯେପରି ଭକ୍ତିର ଆକାଶରେ ଆଶାର ତାରା ଝଲମଲ କରୁଛି। ଭକ୍ତମାନଙ୍କ ଆସ୍ଥା ଓ ଭାବନା ଏହି ରାତିକୁ ଅଧିକ ରୋମାଞ୍ଚମୟ କରିଦେଇଥିଲା।
ଏହି ପୁରାତନ ପୀଠର ଉନ୍ନତି ଓ ସୁନ୍ଦରୀକରଣ ପାଇଁ ଆଦିତ୍ୟ ଆଲୁମିନା କଂସାରୀଗୁଡା ୟୁନିଟ ପକ୍ଷରୁ ପଦକ୍ଷେପ ନିଆଯିବ ବୋଲି ୟୁନିଟ ହେଡ଼ ଶ୍ରୀ ବେଗ ମହା ଶିବରାତ୍ରୀ ଉପଲକ୍ଷେ ଘୋଷଣା କରିଥିଲେ। ସେ କହିଥିଲେ ଯେ ମନ୍ଦିରକୁ ପରିବର୍ତ୍ତନ ଓ ସୁନ୍ଦରୀକରଣ କରାଯାଇ ଏହାକୁ ଆହୁରି ଆକର୍ଷଣୀୟ ଓ ସୁବିଧାଜନକ କରାଯିବ, ଯାହା ଭକ୍ତମାନଙ୍କ ପାଇଁ ଆଶୀର୍ବାଦ ସ୍ୱରୂପ ହେବ।
ମହା ଶିବରାତ୍ରୀର ଏହି ପବିତ୍ର ଅବସରରେ ପୋଡ଼ାପାଡ଼ିରେ ଭକ୍ତି, ଆନନ୍ଦ ଓ ଉନ୍ନତିର ଆଶା ଏକ ସୁନ୍ଦର ସମନ୍ୱୟ ରୂପେ ପ୍ରକାଶ ପାଇଲା। ଧବଳେଶ୍ୱରଙ୍କ କୃପାରେ ଏହି ପବିତ୍ର ଧାମ ଆଗାମୀ ଦିନରେ ଅଧିକ ଐତିହ୍ୟ ଓ ଉନ୍ନତିର ନୂତନ ପର୍ଯ୍ୟାୟକୁ ସ୍ପର୍ଶ କରିବ ବୋଲି ଭକ୍ତମାନେ ଆଶା ବ୍ୟକ୍ତ କରିଛନ୍ତି।