ବାରିପଦା/ଦିଲ୍ଲୀପ ମହାନ୍ତି - ନୂଆବର୍ଷ ୨୦୨୨ ସମସ୍ତେ ସ୍ଵାଗତ କରୁଥିବାବେଳେ କାହା ପାଇଁ ଆନନ୍ଦ ଦାୟକ ପୁଣି, କାହା ପାଇଁ ହୃଦୟାବିଦାରକ । ସୋମବାର ପୂର୍ବାହ୍ନ ୧୧ଘଟିକା ସମୟରେ ମୟୂରଭଂଜ ଜିଲ୍ଲାର ବହଳଦା ଥାନା ଅନ୍ତର୍ଗତ ଜାତୀୟ ରାଜପଥ ୨୨୦ ନମ୍ବର ବାଗଡେଗା ବୁଲାଣି ଛକରେ ଏକ ହାଇଭା ଓଡି ୧୧‌ଜେ ୫୫୪୦ ନମ୍ଵର ସହ ଏକ ବାଇକର ମୁହାଁମୁହିଁ ଧକ୍କା ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବାବେଳେ ଦୁଇ ଜଣ ଗୁରୁତର ହୋଇଥିବା ଅଭିଯୋଗ ହୋଇଛି । ସୂଚନାଯୋଗ୍ଯ ପୋଡାଚାକୁଳି ଗାଁର ଗୋପାଲ ମୁର୍ମୁ(୩୯) ତିରିଂ ଥାନା ପୋଖରିଆ ଗ୍ରାମର ନିଜର ଦୁଇ ଭାଣିଜି ଦିଗିମଣି ବାସ୍କେ(୧୯) ଓ ରାଖି ବାସ୍କେ(୧୭)କୁ ମୋଟର ସାଇକେଲରେ ବସାଇ ଆସୁଥିବାବେଳେ ବାଗଡେଗା ଛକରେ ହାଇଭା ସହ ଧକ୍କା ହୋଇଥିଲା । ଭାଣିଜି ଦିଗିମଣିର ଘଟଣାସ୍ଥଳରୃ ମୃତ୍ୟୁ ହୋଇଥିବାବେଳେ ମାମୁଁ ଗୋପାଲ ଏବଂ ରାକ୍ଷୀ ଗୁରୁତ ଆହତ ହୋଇ ରକ୍ତ ଜୁଡୁବୁଡୁ ଅବସ୍ଥାରେ ପଡିଥିଲେ । ଖବର ପାଇ ବହଳଦା ପୋଲିସ ଘଟଣାସ୍ଥଳରେ ପହଞ୍ଚି ମୃତକ ଦିଗମଣିକୁ ଶବ ବ୍ୟବଛେଦ ପାଇଁ ରାଇରଙ୍ଗପୁର ଡାକ୍ତରଖାନାକୁ ପଠାଇଥିଲା ।ଅନ୍ୟ  ଦୁଇ ଗୁରୁତରଙ୍କୁ ବହଳଦା ଗୋଷ୍ଠୀ ସ୍ୱାସ୍ଥ୍ୟ  କେନ୍ଦ୍ରରେ ଆଶୁ ଚିକିତ୍ସା କରାଇ ରାଇରଙ୍ଗପୁର ହସ୍ପିଟାଲକୁ ସ୍ଥାନାନ୍ତରିତ କରିଛି । ଏଥିସହିତ ପୋଲିସ ହାଇଭା,ବାଇକକୁ ଜବତ କରିବା ସହ ହାଇଭା ଚାଳକଙ୍କୁ ଅଟକ ରଖି ଘଟଣାର ତଦନ୍ତ ଜାରି ରଖିଛି ।