ବାରିପଦା(ଦିଲ୍ଲୀପ ମହାନ୍ତି)-  ବାରିପଦା ପୌରପରିଷଦର ଭଞ୍ଜପୁରସ୍ଥିତ ଶିମିଳିପାଳ ଡ଼ିଡ଼ି ଏସଟିଆର(ସାଉଥ) କାର୍ଯ୍ୟାଳୟକୁ ବ୍ରାହ୍ମଣଙ୍କ ଦ୍ୱାରା ମନ୍ତ୍ର ପାଠ ସହ ପବିତ୍ର ଗଙ୍ଗା ପାଣି ସିଞ୍ଚନ କରାଯାଇ ଶୁଦ୍ଧ କଲେ ଜନସାଧାରଣ । ଏହାର କେତେକ ଫୁଟେଜ ସୋସିଆଲ ମିଡ଼ିଆରେ ଘୁରି ବୁଲୁଥିବାର ଦେଖିବାକୁ ମିଳିଥିବା ବେଳେ ଏହିଭଳି କାର୍ଯ୍ୟ ମୟୂରଭଞ୍ଜ ଜିଲ୍ଲାରେ ପ୍ରଥମ ଥର ଦେଖିବାକୁ ମିଳିଛି । ପ୍ରାପ୍ତ ସୂଚନାରୁ ଜଣାପଡ଼ିଛି, ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ କାର୍ଯ୍ୟାଳୟରେ ଉପକ୍ଷେତ୍ର ନିର୍ଦ୍ଦେଶକ(ସାଉଥ) ଭାବେ ଯଜ୍ଞଦତ୍ତ ପତି ଦାୟିତ୍ୱ ଭାର ସମ୍ଭାଳିବାର ଅଳ୍ପ କିଛି ଦିନ ବ୍ୟବଧାନରେ ସେ ବିବାଦୀୟ ହୋଇପଡ଼ିଥିଲେ । ତାଙ୍କର ପରିଚାଳନାଗତ ଅପାରଗତା କାରଣରୁ ଶିମିଳିପାଳ ଅଭୟାରଣ୍ୟରେ କାଠ ମାଫିଆ ଓ ଶିକାରୀ ମାତ୍ରାଧିକ ସକ୍ରିୟ ହୋଇପଡ଼ିଥିବାର ସଙ୍ଗୀନ ଅଭିଯୋଗ  ଆସିଥିଲା । ମୟୂରଭଞ୍ଜ ଜିଲ୍ଲାର ଅଣରାଜନୈତିକ ସଂଙ୍ଗଠନ ଭଞ୍ଜ ସେନା ପକ୍ଷରୁ ବିଭିନ୍ନ ସମୟରେ କାର୍ଯ୍ୟାଳୟ ଘେରାଉ କରାଯାଇଥିଲା । ଏପରିକି ତାଙ୍କ ବଦଳି ଦାବିରେ ଆନେ୍ଦାଳନକୁ ଉହ୍ଲାଇ ଆସିଥିଲେ । ଗତ ଗ୍ରୀଷ୍ମ ଋତୁରେ ଶିମିଳିପାଳ ଅଭୟାରଣ୍ୟ ହୁତୁହୁତୁ ହୋଇ ଜଳିବାରେ ଲାଗିଥିବା ବେଳେ ଲାଗିଥିବା ନିଆଁକୁ ଆୟତ୍ତ କରିବାରେ ବନ ବିଭାଗ ବିଫଳ ହୋଇଥିଲା । ଯାହାକୁ ନେଇ କେବଳ ମୟୂରଭଞ୍ଜ ନୁହେଁ ଜାତୀୟ ସ୍ତରରେ ଚର୍ଚ୍ଚା ପରିସରକୁ ଆସିଯାଇଥିଲା । ଏହି ସମୟରେ ଚଳିତ ମାସ ଡ଼ିଡ଼ି ଏସଟିଆର(ସାଉଥ) ଶ୍ରୀପତିଙ୍କ ବଦଳି ଆଦେଶ ବାହାରିବା ପରେ  ଖୁସୀରେ ଜନସାଧାରଣ ପରସ୍ପର ମଧ୍ୟରେ ମିଠା ବଣ୍ଟନ କରିଥିଲେ । ଏଥି ସହିତ ସାମାଜିକ ଗଣମାଧ୍ୟମରେ ତୀବ୍ର ଭାବେ ସମାଲୋଚନାର ସମ୍ମୁଖୀନ ହୋଇଥିଲେ । ଡ଼ିଡ଼ି ଶ୍ରୀପତି ଗତ ଶୁକ୍ରାବାର ବାରିପଦାରୁ ରିଲିଭ ହେବା ପରେ ଶିମିଳିପାଳ ଅଭୟାରଣ୍ୟର ଦୀର୍ଘ ୪ ବର୍ଷ ବ୍ୟବଧାନ ପରେ ଶୁଭ ଦିନ ଫେରି ଆସିଲା ବୋଲି ସହରରେ ଚର୍ଚ୍ଚା ଜୋର ଧରିଥିବା ବେଳେ ଆଜି କେତେକ ଯୁବକ ତାଙ୍କ କାର୍ଯ୍ୟାଳୟ ପରିସରରକୁ  ବ୍ରାହ୍ମଣ ଡକାଇ ମନ୍ତ୍ର ଉଚ୍ଚାରଣ ଓ ଗଙ୍ଗା ପାଣି ସିଞ୍ଚନ ପୂର୍ବକ ପବିତ୍ର କରାଉଥିବାର ଭିଡ଼ିଓ ସାମାଜିକ ଗଣମାଧ୍ୟମରେ ଭାଇରାଲ ହୋଇଥିବାର ଦେଖିବାକୁ ମିଳିଥିଲା । ତେବେ ଏ ବିଷୟରେ ଆରସିସିଏଫ ଯୁଗ ଦୟାନନ୍ଦଙ୍କ ସହ ଫୋନରେ ଯୋଗାଯୋଗ କରିବାରୁ ତାଙ୍କ କାର୍ଯ୍ୟାଳୟରେ ଏଭଳି କିଛି ଘଟଣା ଘଟି ନାହିଁ ବୋଲି କହି ଖଣ୍ଡନ କରିଥିଲେ