ଶରଣକୁଳ ସୁଆର ସାହି ଓ ନରେନ୍ଦ୍ରପୁରରେ ବଡ଼ ଅଘଟଣ,
ରାସ୍ତା ଉପରେ ଉତ୍ତ୍ୟକ୍ତ ଜଣ ସାଧାରଣ, ବୁଝାଶୁଝା କରୁଛି ପ୍ରଶାସନ
ଓଡ଼ଗାଁ,(ଶ୍ରୀକାନ୍ତ କୁମାର ମିଶ୍ର)/ନୟାଗଡ(ବିଶ୍ୱଜିତ ନାୟକ) : ନୟାଗଡ଼ ସରଣକୁଳ ଅଂଚଳରେ ଏକ ଡମ୍ଫର ଦୁର୍ଘଟଣା ଘଟାଇବା ଫଳରେ ୬ ଜଣଙ୍କର ମୃତ୍ୟୁ ହୋଇଛି। ଏଥିରେ ଜଣେ ଗୁରୁତର ଭାବେ ଆହତ ମଧ୍ୟ ହୋଇଛନ୍ତି। ଆହତଙ୍କୁ ପ୍ରଥମେ ଶରଣକୁଳ ମେଡିକାଲରେ ଚିକିତ୍ସା କରାଯିବା ପରେ ନୟାଗଡ଼ ମୁଖ୍ୟ ହସ୍ପିଟାଲ୍ରେ ଭର୍ତ୍ତି କରାଯାଇଛି ।
ଆଜି ଅପରାହ୍ନ ତିନିଟା ସମୟରେ ଏକ ଡମ୍ଫର ନୟାଗଡ଼ରୁ ଓଡ଼ଗାଁ ଯାଉଥିବା ବେଳେ ଡ୍ରାଇଭରର ବେପରୁଆ ଗାଡ଼ିଚାଳନା ଯୋଗୁ ଡମ୍ଫରଟି ପ୍ରଥମେ ନରେନ୍ଦ୍ରପୁର ଠାରେ ଦୁଇଜଣ ମହିଳାଙ୍କ ଉପରେ ଚଢ଼ି ଯାଇଥିଲା ଏବଂ ଘଟଣା ସ୍ଥଳରେ ହିଁ ଉଭୟଙ୍କ ମୃତ୍ୟୁ ହୋଇଥିଲା। ସେଠାରୁ କିଛିବାଟ ଗଲାପରେ ସିରିଜ ଭାବରେ ଆଉ ଚାରି ଜଣଙ୍କୁ ଡମ୍ଫର ଚାପିଦେଇଥିଲା । ଡ୍ରାଇଭରର ଏପରି ବେପାରୁଆ ଗାଡିଚାଳନା ଯୋଗୁ ୬ଟି ନିରିହ ଜୀବନ ଆଜି ଚାଲିଗଲା । ମୃତକ ୬ଜଣଙ୍କ ମଧ୍ୟରୁ ୩ଜଣ ମହିଳା ରହିଥିବା ଜଣାପଡିଛି । ମୃତକ ମାନେ ହେଲେ ରାଜେଶ ମହାପାତ୍ର(୧୭), ସୁବାସିନୀ ସାହୁ(୪୨), ସରୋଜିନୀ ସାହୁ(୩୫), ନୀଳକଣ୍ଠ ମହାରଣା(୭୫), କାଜଲ ମହାରଣା(୧୫) ଏବଂ ପଦ୍ମଲୋଚନସାହୁ(୩୦) । ଲୋକମାନେ ଚାଲି କରି ଯାଉଥିବା ବେଳେ ଡମ୍ପର ଡ୍ରାଇଭର ବେପରୁଆ ଗାଡ଼ି ଚାଳନାରୁ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି । ଦୁର୍ଘଟଣା ଘଟାଇ ଚାଲିଯାଉଥିବା ଡମ୍ପରଟିକୁ ଉତ୍ୟକ୍ତ ଲୋକେ ଅଟକାଇଥିବା ବେଳେ ଚାଳକ ସେଠାରୁ ଫେରାର ହୋଇଯାଇଛି । ଉତ୍ୟକ୍ତ ଲୋକେ ଭୁବନେଶ୍ୱର-ଭଞ୍ଜନଗର ରାଜ୍ୟ ସଡ଼କ ପଥକୁ ୨ ଘଂଟାରୁ ଅଧିକା ସମୟ ପର୍ଯ୍ୟନ୍ତ ଅବରୋଧ କରି ରଖିଛନ୍ତି । ଘଟଣା ସ୍ଥଳରେ ସବ୍କଲେକ୍ଟର ଲଗ୍ନଜିତ ରାଉତ, ତହସିଲଦାର ବିଜୟିତା ସାମନ୍ତ ସିଂହାର, ଏସଡିପିଓ ଏସ ଟପ୍ନୋଏବଂ ସ୍ଥାନୀୟ ସରପଂଚ ଉପସ୍ଥିତ ରହି ଲୋକମାନଙ୍କୁ ବୁଝାସୁଝା କରୁଥିବା ଜଣାପଡିଛି ।
