ଝାରସୁଗୁଡ଼ା :(ସୁଭାଷ ସହାରେ)-ଝାରସୁଗୁଡ଼ା ଜିଲ୍ଲାର ନବନିର୍ବାଚିତ କଂଗ୍ରେସ ସଭାପତି ଭରତ ଅୱସ୍ତିଙ୍କୁ ବ୍ରଜରାଜନଗର କଂଗ୍ରେସ କମିଟି ସ୍ଥାନୀୟ ମଣ୍ଡଳୀୟାସ୍ଥିତ କାଳୀ ମନ୍ଦିର ପ୍ରାଙ୍ଗଣରେ ସମ୍ବର୍ଦ୍ଧନା ଜଣାଇଛି।
ଗତ ନିର୍ବାଚନରେ ଦଳ ପକ୍ଷରୁ ବରଗଡ଼ ସଂସଦ ପ୍ରାର୍ଥୀ ହୋଇଥିବା ବରିଷ୍ଠ ନେତା ପ୍ରଦୀପ ଦେବତାଙ୍କ ଉପସ୍ଥିତିରେ ଏହି ସଭା ଅବସରରେ କଂଗ୍ରେସ ଦଳର ବର୍ତ୍ତମାନ ସ୍ଥିତି ଓ ଭବିଷ୍ୟତରେ ନିର୍ବାଚନକୁ ନେଇ ରଣନୀତି ଉପରେ ଗୁରୁତ୍ବାରୋପ କରି ଆଲୋଚନା ହୋଇଥିଲା। କଂଗ୍ରେସ ଦଳର ନେତା ଗୁଡ୍ଡୁ ଦାସଙ୍କ ଉଦ୍ୟମରେ ଅନ୍ୟ ଦଳ ଛାଡ଼ି କଂଗ୍ରେସର ହାତ ଧରିଥିବା ଯୁବକମାନଙ୍କୁ ଫୁଲତୋଡ଼ା ଦେଇ ସ୍ବାଗତ କରିଥିଲେ ଜିଲ୍ଲା ସଭାପତି । ଏହା ବ୍ୟତୀତ ଉପସ୍ଥିତ ଥିବା କଂଗ୍ରେସ ଦଳର ସଦସ୍ୟମାନେ ଆଗାମୀ ନିର୍ବାଚନରେ ଦଳ କିପରି ଜିତିବ,ସେ ବିଷୟରେ ନିଜର ମତାମତ ଦେଇଥିଲେ।
ଏହା ପୂର୍ବରୁ ଇବ ନଦୀ ବଡ଼ଘାଟରୁ ଅତିଥିମାନଙ୍କୁ ଏକ ବାଇକ ରେଲି ଦ୍ବାରା ସ୍ବାଗତ କରି ଅଣାଯାଇଥିଲା। ପ୍ରଥମେ ମଣ୍ଡଳିଆରେ ଥିବା ପୂର୍ବତନ ନଗରପାଳ ତଥା କଂଗ୍ରେସ ନେତା ସ୍ବର୍ଗତ ସନତ ପାଟଯୋଶୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରାଯାଇଥିଲା। କଂଗ୍ରେସ ଦଳର ବରିଷ୍ଠ ନେତା ସନ୍ତୋଷ ବଡ଼ପଣ୍ଡା କାର୍ଯ୍ୟକ୍ରମ ପରିଚାଳନା କରିଥିଲେ। ଝାରସୁଗୁଡ଼ାର ବରିଷ୍ଠ ଆଇନଜୀବୀ ସିୟାରାମ ଦାସ, ପୂର୍ବ ଯୁବ କଂଗ୍ରେସ ଅଧ୍ୟକ୍ଷ ଜୀବନ ସାର୍ଥକ ଦାସ(ଗୁଡ୍ଡୁ),ଦେବେଶ ପଣ୍ଡା, ପୂର୍ବତନ ପାର୍ଷଦ କିରଣ ଦାସ, ମଦନ ଗୋପାଳ ସିଂହ ପ୍ରଭୃତି ଉପସ୍ଥିତ ରହି ନିଜ ନିଜର ମତାମତ ଉପସ୍ଥାପନ କରିଥିଲେ। ଶେଷରେ କିରଣ ଦାସ ଧନ୍ୟବାଦ ଅର୍ପଣ କରିଥିଲେ।
