ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୀଙ୍କ ୭୦ ତମ ଜନ୍ମଦିନ ଉପଲକ୍ଷେ ଦେଶବ୍ୟାପୀ ପାଳନ ହେଉଥିବା ସେବା-ସପ୍ତାହ ଅବସରରେ ପାରଳାଖେମୁଣ୍ଡି ସ୍ଥିତ ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ଜିଲ୍ଲା ରକ୍ତଭଣ୍ଡାର ଠାରେ ଜିଲ୍ଲା ଭାଜପା ଯୁବମୋର୍ଚ୍ଚା ପକ୍ଷରୁ ଏକ ରକ୍ତଦାନ ଶିବିର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।
ପାରଳାଖେମୁଣ୍ଡି ବିଧାୟକ ତଥା ଜିଲ୍ଲା ଭାଜପା ସଭାପତି ଶ୍ରୀ କେ. ନାରାୟଣ ରାଓଙ୍କ ଉପସ୍ଥିତିରେ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା । ଏହି କାର୍ଯ୍ୟକ୍ରମରେ ୨୦ ୟୁନିଟ ରକ୍ତ ସଂଗ୍ରହ କରାଯାଇଥିଲା ।
ଏହି ଅବସରରେ ବିଧାୟକ ଶ୍ରୀ ରାଓ କହିଥିଲେ ଯେ , ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଜୀଙ୍କ ଜନ୍ମଦିନ ଅବସରରେ ପାରଳାଖେମୁଣ୍ଡି ଠାରେ ଭାଜପା ପକ୍ଷରୁ ଏହି ରକ୍ତଦାନ ଶିବିର କାର୍ଯ୍ୟକ୍ରମର ଆୟୋଜନ କରାଯାଇଛି । ଅନ୍ୟ ପକ୍ଷରେ ତାଙ୍କର ଜନ୍ମଦିନ ଅବସରରେ ସେବା ସପ୍ତାହ ପାଳନ ମଧ୍ୟ କରାଯାଉଛି । ଏଥିପାଇଁ ବିଭିନ୍ନ ଦିନ ମାନଙ୍କରେ ତଥା ଆସନ୍ତା ୨୦ ତାରିଖ ପର୍ଯ୍ୟନ୍ତ ବିଭିନ୍ନ ଠାରେ ଫଳ ବଣ୍ଟନ , ସଫେଇ , ଓ ବୃକ୍ଷ-ରୋପଣ ପ୍ରଭୃତି କାର୍ଯ୍ୟକ୍ରମ ସବୁ ଆୟୋଜନ ହେବାର ସ୍ଥିରୀକୃତ ହୋଇଛି । ତାଙ୍କ ଜନ୍ମଦିନ ଅବସରରେ ଆମେ ଭାଜପା ପକ୍ଷରୁ ଏଠାରେ ୨୦ ତାରିଖ ପର୍ଯ୍ୟନ୍ତ ବିଭିନ୍ନ କାର୍ଯ୍ୟକ୍ରମ ଆୟୋଜନ କରି ଖୁସିରେ ପାଳିବୁ ବୋଲି କହିଥିଲେ ।
ସମସ୍ତ ରକ୍ତଦାତାଙ୍କୁ ବିଧାୟକ ଶ୍ରୀ କେ.ନାରାୟଣ ରାଓ ଏବଂ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡାଃ ପ୍ରଦୀପ ପାତ୍ର ପ୍ରମାଣ ପତ୍ର ବଣ୍ଟନ କରିଥିଲେ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସିଡିଏମଓ-ଡା:ପ୍ରଦୀପ କୁମାର ପାତ୍ର , ଏଡିଏମଓ-ଡାଃ. ପ୍ରମୋଦ କୁମାର ପଣ୍ଡା ଓ ରକ୍ତଭଣ୍ଡାର ଇନଚାର୍ଯ ଅଫିସର ଡାଃ ଏନ.ରବିବାବୁଙ୍କ ସମେତ ଭାଜପା ଯୁବମୋର୍ଚ୍ଚାର ବାବୁନା ବେହେରା , ଭାଜପାର ବରିଷ୍ଠ ନେତା ନୃସିଂହ ଚରଣ ପଟ୍ଟନାୟକ , ଚିତ୍ରୀ ସୀମାଦ୍ରି , ତ୍ରିପତି ନାୟକ , ଶରତ କୁମାର , ଜମିଦାର ପଟ୍ଟନାୟକ , ଜଗନ୍ନାଥ ମହାପାତ୍ର ପ୍ରମୁଖ ଉପସ୍ଥିତ ଥିଲେ ।
ସମସ୍ତ ରକ୍ତଦାନ କାର୍ଯ୍ୟକ୍ରମକୁ ରକ୍ତଭଣ୍ଡାରର ବରିଷ୍ଠ ଟେକ୍ନିସିଆନ ଶ୍ରୀ ଖଗେଶ୍ୱର ବେହେରା ପରିଚାଳନା କରିଥିଲେ ।
