ଭୁବନେଶ୍ୱର (ଶାସକ ପ୍ରଶାସକ) : ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ରାଜ୍ୟର ସମସ୍ତ କୋରୋନା ଯୋଦ୍ଧାଙ୍କୁ ସମ୍ମାନିତ କରିବା ନିମନ୍ତେ ଓଡିଶାରେ "ବନ୍ଦେ ଉତ୍କଳ ଜନନୀ" ସଙ୍ଗୀତ ଗାନ କରାଯାଇଥିଲା। ଏୟାରପୋର୍ଟ ଛକ ନିକଟରେ ସ୍ଥାପିତ ଓଡିଶାର ଜନନାୟକ ପ୍ରବାଦପୁରୁଷ ଶ୍ରୀ ବିଜୁ ପଟ୍ଟନାୟକଙ୍କ ମୂର୍ତ୍ତି ଆଗରେ, ଏସିପି ଜୋନ୍ ୨ ଶ୍ରୀ ବିଷ୍ଣୁ ପ୍ରସାଦ ପାତ୍ର ଙ୍କ ନେତୃତ୍ୱରେ ଜୟ ଓଡ଼ିଶାର ସମସ୍ତ ସଦସ୍ୟ ଯୋଗ ଦେଇ କୋରୋନା ଯୋଦ୍ଧା ରୂପୀ ସମସ୍ତ ଡକ୍ଟର୍, ନର୍ସ,ପୋଲିସ,ଅଗ୍ନିଶମ ବିଭାଗ,ଅଙ୍ଗନବାଡ଼ି କର୍ମୀ,ସରପଞ୍ଚ ଓ ଗ୍ରାମପଞ୍ଚାୟତ କାର୍ଯ୍ୟକର୍ତ୍ତା,ସ୍ବାସ୍ଥ୍ୟକର୍ମୀ ଆଦିଙ୍କୁ ସେମାନଙ୍କର ସମାଜ ପ୍ରତି ଥିବା ନିରବଚ୍ଛିନ୍ନ ସେବା ଓ କର୍ତ୍ତବ୍ୟକୁ ସମ୍ମାନ ଜଣାଇଥିଲେ।
ସମସ୍ତ ସଦସ୍ୟଙ୍କ ହାତରେ କୋରୋନା ଯୋଦ୍ଧା ଙ୍କ ପାଇଁ ଉଦ୍ଧିଷ୍ଟ ବିଭିନ୍ନ ସ୍ଲୋଗାନ କାର୍ଡ ଅତ୍ୟନ୍ତ ହୃଦୟସ୍ପର୍ଶୀ ଥିଲା।ଏହି କାର୍ଯ୍ୟକ୍ରମରେ ଏୟାରପୋର୍ଟ ପୋଲିସ୍ ଷ୍ଟେସନ୍ ଆଇଆଇସି ଶ୍ରୀ ଉମା ଶଙ୍କର ପଟ୍ଟନାୟକଙ୍କ ସହ ଅନ୍ୟାନ୍ୟ ସଂସ୍ଥା ଯଥା, ଓମ୍ ଶାନ୍ତି ସଂଘ, ଜୟଶ୍ରୀ ଧଳ ଓ ଟିମ୍, ଆନ୍ତର୍ଜାତୀୟ ରୋଟାରୀର ସଦସ୍ୟ, ସିଆଇଏସ୍ଏସ୍ ଓ ଆଞ୍ଚଳିକ ବାସିନ୍ଦା ମାନେ ଯୋଗ ଦେଇ କାର୍ଯ୍ୟକ୍ରମର ଶୋଭାବର୍ଧନ କରିଥିଲେ। ପରିଶେଷରେ ଜୟ ଓଡିଶା ଉଦ୍ଦେଶ୍ୟରେ ଜୟଶ୍ରୀ ଧଳ ମାଡାମ୍ ଏକ ଅତି ସୁନ୍ଦର ସଙ୍ଗୀତ ପରିବେଷଣ କରି ସମସ୍ତଙ୍କୁ ଆମ ଜନ୍ମଭୂମି ପ୍ରେମରେ ବାନ୍ଧି ରଖିବାରେ ସଫଳ ହୋଇଥିଲେ। ଜୟ ଓଡିଶା ସଭାପତି ଶ୍ରୀଯୁକ୍ତ ରୁଦ୍ର ସାମନ୍ତରାୟ କହିଛନ୍ତି " ଆଜି ସମଗ୍ର ବିଶ୍ୱର ଓଡ଼ିଶା ବାସୀଙ୍କୁ ଏକାଠି ବାନ୍ଧି ରଖିବାକୁ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଯେଉଁ ଅଭିନବ ନିର୍ଦ୍ଦେଶ ଦେଇଥିଲେ ତାହା ଅତ୍ୟନ୍ତ ପ୍ରଶଂସନୀୟ ଅଟେ। ତାଙ୍କ ନେତୃତ୍ୱ ଓ ସର୍ବସାଧାରଣଙ୍କ ସହଯୋଗରେ ଓଡ଼ିଶା ଆଜି ବହୁ ମାତ୍ରାରେ କୋରୋନା ମୁକ୍ତ ହେବାରେ ସଫଳ ହୋଇଛି।ଏହି ଲଢେଇ ଆଗକୁ ଜାରି ରହିବା ଓ ଦିନେ ଓଡ଼ିଶା ଆଗରେ କୋରୋ ନା ହାରିବା ବୋଲି ଆମେ ଦୃଢ଼ ଆଶା ରଖୁଛୁ।"
