ପୋଲିସ ଏମ୍ସ କର୍ତୃପକ୍ଷ ଓ ନିଖୋଜ ଛାତ୍ରଙ୍କ ପିତା ଓ ସମ୍ପର୍କୀୟଙ୍କ ସହିତ ସହପାଠୀ ମାନଙ୍କ ସହ କଲା ଆଲୋଚନା ବିଜେପି ଯୁବ ମୋର୍ଚାର ପ୍ରତିନିଧି ଦଳ
ଭୁବନେଶ୍ୱର, : ନିଖୋଜ ହୋଇଥିବା ଏମ୍ସର କଶ୍ମୀରୀ ଛାତ୍ର ସୋହେଲ ଆଇଜାଜକୁ ଖୋଜିବା ମାମଲାରେ କମିଶନରେଟ ପୋଲିସ ଭୁଆଁ ବୁଲାଉଛି ବୋଲି ବିଜେପି ଯୁବ ମୋର୍ଚା ପକ୍ଷରୁ ଅଭିଯୋଗ କରାଯାଇଛି । ଏହି ମାମଲାରେ କମିଶନରେଟ ପୋଲିସର ନିଷ୍କ୍ରିୟତା କାରଣରୁ ସଂପୃକ୍ତ ଛାତ୍ରକୁ ଖୋଜା ଯାଇ ପାରୁ ନାହିଁ ବୋଲି ଅଭିଯୋଗ କରିବା ସହ ଏହାର ତଦନ୍ତ ଏନଆଇଏ ଦ୍ୱାରା କରା ଯାଉ ବୋଲି ଯୁବ ମୋର୍ଚା ପକ୍ଷରୁ ଦାବି କରା ଯାଇଛି । ମୁଖ୍ୟମନ୍ତ୍ରୀ ଓ ରାଜ୍ୟ ପୋଲିସ ମହାନିର୍ଦେଶକଙ୍କୁ ଭେଟିବାକୁ ଦିଆଯାଉ ନ ଥିବା ନେଇ ନିଖୋଜ ଛାତ୍ରଙ୍କ ପିତା ଓ ପରିବାର ବର୍ଗ ମଧ୍ୟ ଅସନ୍ତୋଷ ପ୍ରକାଶ କରୁଥିବା ଯୁବ ମୋର୍ଚା ପକ୍ଷରୁ ପ୍ରକାଶ କରାଯାଇଛି ।
ଏ ସମ୍ପର୍କରେ ଗୁରୁବାର ଦିନ ବିଜେପି ଯୁବ ମୋର୍ଚାର ରାଷ୍ଟ୍ରୀୟ ଉପ ସଭାପତି ଠାକୁର ରଂଜିତ ଦାସଙ୍କ ନେତୃତ୍ୱରେ ଏକ ପ୍ରତିନିଧି ଦଳ କମିଶନରେଟ ପୋଲିସ ଅନ୍ତର୍ଗତ ଖଣ୍ଡଗିରି ଥାନା ଅଧିକାରୀ, ଏମ୍ସ କର୍ତୃପକ୍ଷ ଓ ନିଖୋଜ ଛାତ୍ରଙ୍କ ପିତା ଓ ସମ୍ପର୍କୀୟଙ୍କ ସହିତ ସହପାଠୀ ମାନଙ୍କ ସହ ଆଲୋଚନା କରିଥିଲା ।
ବିଜେପି ଯୁବ ମୋର୍ଚାର ଏହି ପ୍ରତିନିଧି ମଣ୍ଡଳ ସହ ଆଲୋଚନା ବେଳେ ସେମାନେ ଗତ ୧୯ ତାରିଖ ଠାରୁ ଆସିଥିବା ସତ୍ୱେ ତାଙ୍କୁ ମୁଖ୍ୟମନ୍ତ୍ରୀ ଓ ରାଜ୍ୟ ପୋଲିସ ମହା ନିର୍ଦେଶକଙ୍କ ସହ ଦେଖା କରିବାକୁ ଦେଉ ନ ଥିବା ନିଖୋଜ ଛାତ୍ରର ପରିବାର ବର୍ଗ ପ୍ରକାଶ କରିଥିବା ସେମାନେ ପ୍ରକାଶ କରିଛନ୍ତି । ସଂପୃକ୍ତ ଛାତ୍ର ପାଠପଢାରେ ଦୁର୍ବଳ ଥିବା କାରଣରୁ ସେ ଚାପ ଗ୍ରସ୍ତ ହୋଇ କୁଆଡେ ଚାଲି ଯାଇଥାଇ ପାରନ୍ତି ବୋଲି କମିଶନରେଟ ପୋଲିସ କହୁଥିବା ବେଳେ ଏମ୍ସ କର୍ତୃପକ୍ଷ ଓ ତାଙ୍କର ସହପାଠୀ ମାନେ ଏହାକୁ ଖଣ୍ଡନ କରିଛନ୍ତି । କମିଶନରେଟ ପୋଲିସର ଏ ଭଳି କହିବା ଅନେକ ସନ୍ଦେହ କୁ ଜନ୍ମ ଦେଉଥିବା ଯୁବ ମୋର୍ଚା ପକ୍ଷରୁ କୁହା ଯାଇଛି ।
ଏହି ମାମଲାରେ ପୋଲିସ ସଂପୃକ୍ତ ଛାତ୍ରଙ୍କ ଟେଲିଫୋନ ନମ୍ବର ଟ୍ରେସ ନ ହୋଇ ପାରିବା କଥା କହି ହାତ ବାନ୍ଧି ବସି ରହିଛି ବୋଲି ଏହି ପ୍ରତିନିଧି ଦଳ ଅଭିଯୋଗ କରିଛି । ଏହି ମାମଲାରେ ସଂପୃକ୍ତ ଛାତ୍ରଙ୍କୁ ଖୋଜିବା ନେଇ ପୋଲିସର ଆଦୌ ଆନ୍ତରିକତା ନାହିଁ ବୋଲି ଛାତ୍ରଙ୍କ ପରିବାର ପ୍ରକାଶ କରିଛି ।
ପୋଲିସ ଏହି ମାମଲାରେ ସକ୍ରିୟତାର ସହ କାମ କରି ସଂପୃକ୍ତ ଛାତ୍ରଙ୍କୁ ତୁରନ୍ତ ଖୋଜିବାକୁ ବିଜେପି ଯୁବ ମୋର୍ଚା ଦାବି କରିଛି । ଏହି ପ୍ରତିନିଧି ଦଳରେ ଶ୍ରୀ ଦାସଙ୍କ ବ୍ୟତୀତ ରାଜ୍ୟ ସମ୍ପାଦକ ଇରାଶିଷ ଆଚାର୍ଯ୍ୟ, ସମ୍ପାଦକ ଦୀପକ ଗୋଛାୟତ, ରାଜ୍ୟ ସଂଯୋଜକ ପ୍ରଶାନ୍ତ ସ୍ୱାଇଁ, ବିଶ୍ୱଜିତ ଷଡଙ୍ଗୀ ସାମିଲ ଥିଲେ ।
