ସୋହେଲା ଥାନାରେ ୨ଜଣ ହାବିଲଦାର,ଅସଲ ହାବିଲଦାର କିଏ?
ଏଠି କି ମହୁ ଅଛି ଯେ ବଦଳି ପରେ ବି ମୋହ ତୁଟୁନି
ସୋହେଲା(ଶାସକପ୍ରଶାସକ)ବରଗଡ ଜିଲା ସୋହେଲା ଥାନାରେ ଏବେ ଦୁଇ ଦୁଇ ଜଣ ହାବିଲଦାର । ବହୁ ବର୍ଷ ପୂର୍ବେ ଏହି ଥାନାରେ ଏପରି ଦୁଇ ଦୁଇ ଜଣ ଥାନା ଅଧିକାରୀ କାର୍ଯ୍ୟକରି ଚର୍ଚ୍ଚାର ପରିଧିକୁ ଆସିଥିଲେ । ଏବେ ଦୁଇଜଣ ହାବିଲଦାର ଥିବା ନେଇ ଅଂଚଳରେ ଚର୍ଚ୍ଚା ଜୋର ଧରିଛି । ସୋହେଲା ପ୍ରତି ପୋଲିସବାଲାଙ୍କ ଏତେ ମୋହ କାହିଁକି ? ଏହି ଥାନାଟି ସୀମାନ୍ତରେ ରହିଥିବାରୁ ଦୁଇ ନମ୍ବର କାରବାର ବ୍ୟାପକ ମାତ୍ରାରେ ହୋଇଥାଏ । ପୋଲିସ ଗାଡି ଧରି ବୁଲି ଗଲେ ମଧ୍ୟ ପକେଟ ଗରମ ହୋଇଥାଏ ବୋଲି ଚର୍ଚ୍ଚା ହୋଇଥାଏ । ଉପୁରି ଆଦାୟର ଥାନା ଛାଡି କେଉଁ ଅଫିସର ଅବା ବଦଳି ହୋଇଯିବାକୁ ମନ କରିବ ଭଲା । କିଛି ଦିନ ତଳେ ତତ୍କାଳୀନ ଏସପି ମୁକେଶ ଭାମୁଙ୍କ ସମୟରେ ବରଗଡ ଜିଲାରେ ପୋଲିସ ବିଭାଗରେ ଅଫିସର,ହାବିଲଦାର ଓ କନେଷ୍ଟବଲମାନଙ୍କ ବଦଳି ଆଦେଶ କରିଥିଲେ । ଆଦେଶ ତାମିଲ ବି ହେଲା । ସୋହେଲା ଥାନାରେ କାର୍ଯ୍ୟରତ ହାବିଲଦାରଙ୍କ ସହିତ କିଛି କନେଷ୍ଟବଲଙ୍କ ବଦଳି ହୋଇଥିଲା । ହାବିଲଦାରଙ୍କୁ ବରଗଡ ଟାଉନ ଥାନାକୁ ବଦଳି ଆଦେଶ ହୋଇଥିବାବେଳେ ତାଙ୍କ ବଦଳରେ ଜଗଦଲପୁର ଥାନାରେ କାର୍ଯ୍ୟରତ ହାବିଲଦାରଙ୍କୁ ଏଠାକୁ ବଦଳି ଆଦେଶ ହୋଇଥିଲା । ବଦଳି ଆଦେଶ ବାହାରିବା ପରେ ସୋହେଲା ଥାନାରେ କାର୍ଯ୍ୟରତ ହାବିଲଦାରଙ୍କୁ ଛାଡି ବାକିମାନଙ୍କୁ ଥାନାରୁ ରିଲିଭ କରାଯାଇଛି । କିନ୍ତୁ ଦୁଇ ମାସ ବିତି ଗଲାଣି ହାବିଲଦାର ସାହେବଙ୍କୁ ଏପର୍ଯ୍ୟନ୍ତ ରିଲିଭ କରାଯାଉ ନାହିଁ କାହିଁକି ବୋଲି ନାନା ପ୍ରକାର ଚର୍ଚ୍ଚା ହେଉଛି । ଦୁଇ ବର୍ଷରୁ ଉର୍ଦ୍ଧ୍ବ ହେବ କାର୍ଯ୍ୟରତ ପୂର୍ବତନ ହାବିଲଦାର ଏହି ଥାନାରେ କାର୍ଯ୍ୟ କରିସାରିଲେଣି । ତଥାପି ମଧ୍ୟ ତାଙ୍କ ପାଖରେ କି ପ୍ରକାର ଗୁଣ ରହିଛି ଯେ ପୋଲିସ ବିଭାଗ ତାଙ୍କୁ ରିଲିଭ କରୁ ନାହାନ୍ତି ବୋଲି ଲୋକେ ପ୍ରଶ୍ନ କରୁଛନ୍ତି । ଅନ୍ୟ ପକ୍ଷରେ ଜଗଦଲପୁର ଥାନାରୁ ହାବିଲଦାର ସନ୍ତୋଷ ଭୋଇ ରିଲିଭ ହୋଇ ଆସି ସୋହେଲା ଥାନାରେ ଜଏନ ମଧ୍ୟ କରିସାରିଲେଣି । କିନ୍ତୁ ପୁରୁଣା ହାବିଲଦାର ମହାଶୟ ଏବେ ମଧ୍ୟ ଥାନାରେ ରହିଛନ୍ତି । ସବୁଠୁଁ କୌତୁହଳର ବିଷୟ ଦୁଇ ହାବିଲଦାର ପ୍ରତ୍ୟହ ଖାକି ଡ୍ରେସ ପିନ୍ଧି ଡ୍ୟୁଟି କରୁଛନ୍ତି । ଲୋକେ ଅସଲ ହାବିଲଦାର କିଏ ବୋଲି ଦ୍ୱନ୍ଦରେ ପଡୁଛନ୍ତି । ପୁରା ଦମରେ ଦୁହେଁଁ କାମ କରୁଥିଲେ ମଧ୍ୟ ପୁରୁଣା ହାବିଲଦାରଙ୍କ ଜୋର ନିଶ୍ଚିତଭାବରେ ଅଧିକ ରହିବା ସ୍ୱାଭାବିକ କଥା । ଏହି ପ୍ରସଂଗରେ ବରଗଡ ଜିଲାରେ ନୂତନ ହୋଇ ଯୋଗଦେଇଥିବା ଆରକ୍ଷୀ ଅଧିକ୍ଷକ ଦୃଷ୍ଟି ଦେବେ ବୋଲି ସାଧାରଣରେ ଦାବି ହେଉଛି ।
ସେହିପରି ସୋହେଲା ଥାନାରେ ଅନେକ କର୍ମଚାରୀ ଏମିତି ବି ଅଛନ୍ତି ଯେଉଁମାନେ 3 ବର୍ଷ ରୁ ଉର୍ଧ୍ୱ ହେବ ଚାକିରୀ କଲେଣି ଅଥଚ ସେମାନଙ୍କ ବଦଳି ହେଉ ନାହିଁ କାହିଁକି ? ଏପରିକି ସୋହେଲା ଥାନା ବାସିନ୍ଦା ହୋଇ ମଧ୍ୟ ସେମାନଙ୍କୁ ପୋଷ୍ଟିଂ କିପରି କରାଯାଉଛି । ସେମାନେ ସ୍ଥାନୀୟ ଲୋକ ହେଉ ଥିବାରୁ ଦୁର୍ନୀତି କରିବାରେ ନିଜକୁ କୁଣ୍ଠାବୋଧ ମଧ୍ୟ କରୁ ନାହାନ୍ତି । ଆହୁରି ମଧ୍ୟ ଏହି ଥାନାରେ ଚାକିରୀ କରୁଥିବା ଅନେକ କର୍ମଚାରୀ ବିଭିନ୍ନ ଢାବା ହୋଟେଲକୁ ଯାଇ ମାଫି ଖାଇବା ଅଭ୍ୟାସଗତ ହୋଇ ଗଲାଣି, ଯାହାକି ଚର୍ଚ୍ଚାର ବିଷୟ ହୋଇଛି |
