୨୦୦୭ ମସିହା ଅକ୍ଟୋବର ୧୫ ତାରିଖରେ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ହୋଇଥିଲା ଶେଷ ବୈଠକ
ଗସ୍ତ ଖର୍ଚ୍ଚ ୩୭.୯୩ ଲକ୍ଷ ସହିତ ମୋଟ ଖର୍ଚ୍ଚ ୧.୧୦ କୋଟି
ବିଷ୍ଣୁ ଦାସଙ୍କ ଉପାଧ୍ୟକ୍ଷ କାଳରେ ବୋର୍ଡ ସର୍ବାଧିକ ଖର୍ଚ୍ଚ
ଭୁବନେଶ୍ୱର,(ଶାସକ ପ୍ରଶାସକ): ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଗଠିତ ଓଡ଼ିଶା ଯୋଜନା ବୋର୍ଡର କାର୍ଯ୍ୟକାରିତା କାହାରିକୁ ଅଛପା ନାହିଁ । ୨୦୦୭ ମସିହା ଅକ୍ଟୋବର ୧୫ ତାରିଖ ପରଠାରୁ ଏହି ବୋର୍ଡର ଆଦୌ ବୈଠକ ବସିନାହିଁ ବୋଲି ବିରୋଧୀ ଦଳ ପକ୍ଷରୁ ବାରମ୍ବାର ଅଭିଯୋଗ ହୋଇଛି । ତେବେ ବୋର୍ଡ ବୈଠକ କେତେ ଅବଧି ମଧ୍ୟରେ ଅନୁଷ୍ଠିତ ହେବ ସେ ସଂପର୍କିତ କୌଣସି ନିର୍ଦ୍ଦେଶନାମା ନାହିଁ ବୋଲି ଯୋଜନା ଓ ସଂଯୋଜନ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି ।
ଏହା ସତ୍ୱେ ୨୦୦୭ ମସିହାରୁ ବର୍ତମାନ ପର୍ଯ୍ୟନ୍ତ୪ଜଣ ଉପାଧ୍ୟକ୍ଷଏବଂ ୨୬ଜଣ ସଭ୍ୟ ନିଯୁକ୍ତି ପାଇଛନ୍ତି । ନିଯୁକ୍ତି ପାଇଥିବା ସମସ୍ତ ଉପାଧ୍ୟକ୍ଷ ଶାସକ ଦଳର ନେତା ଥିବା ବେଳେ ଅଧିକାଂଶ ସଭ୍ୟ ମଧ୍ୟ ସରକାରୀ ଦଳର ନେତା ଓ ବିଧାୟକ । ୨୦୦୭ ବର୍ଷଠାରୁ ଅଦ୍ୟାବଧି ଅର୍ଥାତ୍ ଗତ ୧୨ ବର୍ଷରେ ଯୋଜନା ବୋର୍ଡ ପକ୍ଷରୁ ଗସ୍ତ ଖର୍ଚ୍ଚ ବାବଦରେ ମୋଟ ୩୭ ଲକ୍ଷ ୯୨ ହଜାର ୮୭୬ ଟଙ୍କା ଖର୍ଚ୍ଚ ହୋଇଥିବା ବେଳେ ଦପ୍ତର ଓ ଅନ୍ୟାନ୍ୟ ଖର୍ଚ୍ଚ ବାବଦରେ ୭୧ ଲକ୍ଷ ୯୩ ହଜାର ୬୨୮ ଟଙ୍କା ଏହିରୂପେ ମୋଟ ୧ କୋଟି ୯ ଲକ୍ଷ ୮୬ ହଜାର ୫୦୪ ଟଙ୍କା ବ୍ୟୟ କରାଯାଇଛି ।
ଆଜି ବିଧାନସଭାରେ ବିରୋଧୀ ଦଳ ମୁଖ୍ୟ ସଚେତକ ମୋହନ ଚରଣ ମାଝୀଙ୍କ ପ୍ରଶ୍ନର ଲିଖିତ ଉତରରେ ବିଭାଗୀୟ ମନ୍ତ୍ରୀ ଶ୍ରୀ ବେହେରା ୨୦୦୭ ମସିହାରୁ ଅଦ୍ୟାବଧି ଯୋଜନା ବୋର୍ଡ ପକ୍ଷରୁ ହୋଇଥିବା ଭଡ଼ା, ଗସ୍ତ ଓ ଅନ୍ୟାନ୍ୟ ଖର୍ଚ୍ଚ ସଂପର୍କରେ ହିସାବ ପ୍ରଦାନ କରିଥିଲେ । ୨୦୧୭ ମସିହା ମାର୍ଚ୍ଚ ମାସ ୧୮ ତାରିଖରେ ବୋର୍ଡର ଉପାଧ୍ୟକ୍ଷ ଭାବେ ବିଷ୍ଣୁଚରଣ ଦାସଙ୍କୁ ଦିଆଯାଇଛି । ସେହି ବର୍ଷଠାରୁ ଉଭୟ ଗସ୍ତ ଓ ଅନ୍ୟାନ୍ୟ ଖର୍ଚ୍ଚ ବହୁଳ ଭାବେ ବୃଦ୍ଧି ପାଇଥିବା ହିସାବରେ ଦର୍ଶାଯାଇଛି ।
ପୂର୍ବରୁ ୨୦୧୫ ମସିହାରେ ସର୍ବାଧିକ ଗସ୍ତ ଖର୍ଚ୍ଚ ୩ ଲକ୍ଷ ୫୪ ହଜାର ଟଙ୍କା ଥିଲା । କିନ୍ତୁ ଶ୍ରୀ ଦାସ ଉପାଧ୍ୟକ୍ଷ ହେବା ପରେ ୨୦୧୭ରେ ଏହି ଖର୍ଚ୍ଚ ୪ ଲକ୍ଷ ୧୪ ହଜାର ଟଙ୍କା, ୨୦୧୮ରେ ୧୧ ଲକ୍ଷ ୩୩ ହଜାର ୮୫ ଟଙ୍କା ଓ ଚଳିତ ବର୍ଷ ଏପ୍ରିଲ ମାସରୁ ଏହି ରିପୋର୍ଟ ପ୍ରସ୍ତୁତ ହେବା ପର୍ଯ୍ୟନ୍ତ ୨ ଲକ୍ଷ ୫୦ ହଜାର ୧୦ ଟଙ୍କା ଖର୍ଚ୍ଚ ହୋଇଛି । କେବଳ ଗସ୍ତ ଖର୍ଚ୍ଚ ନୁହେଁ, ବୋର୍ଡର ଦପ୍ତର ଓ ଅନ୍ୟାନ୍ୟ ଖର୍ଚ୍ଚର ପରିମାଣ ମଧ୍ୟ ଉଲ୍ଲେଖନୀୟ ଭାବେ ବୃଦ୍ଧି ପାଇଛି । ୨୦୧୬ରେ ଏହି ଖର୍ଚ୍ଚ ୨ ଲକ୍ଷ ୪୦ ହଜାର ଟଙ୍କା ଥିବା ବେଳେ ୨୦୧୭ରେ(ଶ୍ରୀ ଦାସଙ୍କ ଯୋଗଦାନ ବର୍ଷ)ଏହି ପରିମାଣ ୧୦ ଲକ୍ଷ ୫୦ ହଜାର ଟଙ୍କାକୁ ବୃଦ୍ଧି ପାଇଥିଲା । ୨୦୧୮ରେ ଏହି ଖର୍ଚ୍ଚ ୧୦ ଲକ୍ଷ ୬୪ ହଜାର ୬୦୨ ଟଙ୍କାକୁ ବୃଦ୍ଧି ପାଇଥିବା ବେଳେ ଚଳିତ ବର୍ଷ ବର୍ତମାନ ସୁଦ୍ଧା ୮ ଲକ୍ଷ ୧୦ ହଜାର ଟଙ୍କା ପର୍ଯ୍ୟନ୍ତ ଖର୍ଚ୍ଚ ହୋଇଥିବା ଦର୍ଶାଯାଇଛି ।
ମନ୍ତ୍ରୀ ଶ୍ରୀ ବେହେରା ଲିଖିତ ଉତରରେ ରାଜ୍ୟ ଯୋଜନା ବୋର୍ଡ ୬ଟି ବିଭିନ୍ନ କାର୍ଯ୍ୟ ସଂପାଦନା କରିଥାଏ ବୋଲି ଉଲ୍ଲେଖ କରିଛନ୍ତି । ତେବେ ସେ ୨୦୦୭ ମସିହା ଅକ୍ଟୋବର ୧୫ ତାରିଖରେ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ଶେଷ ବୈଠକର ବିବରଣୀ ପ୍ରଦାନ କରିଛନ୍ତି । ସେହି ବୈଠକରେ ଯୋଜନା ଓ ସଂଯୋଜନ ବିଭାଗ ପ୍ରସ୍ତୁତ କରିଥିବା ଭିଜନ୍ ୨୦୨୦ର ଚିଠା ସଂପର୍କରେ ଉଲ୍ଲେଖ କରିଛନ୍ତି । ସେହି ବୈଠକରେ ଉପସ୍ଥିତ ଥିବା ସଭ୍ୟମାନେ ଦେଇଥିବା ପ୍ରସ୍ତାବଗୁଡ଼ିକ ସଂପର୍କରେ ମଧ୍ୟ ଉଲ୍ଲେଖ କରାଯାଇଛି । କିନ୍ତୁ ପରବର୍ତୀ ବୈଠକ ନେଇ କୌଣସି ସୂଚନା ଦେଇ ନଥିବାରୁ ସେହି ବୈଠକ ଯୋଜନା ବୋର୍ଡର ଶେଷ ବୈଠକ ବୋଲି କୁହାଯାଉଛି ।
