ପାହାଡିଆ ରାସ୍ତାରେ ଖଟ ଉପରେ ପ୍ରସବ କଲେ ମହିଳା
ନୂଆପଡ଼ା(ଅମିତ ପୁରୋହିତ).ନୂଆପଡ଼ା ଜିଲ୍ଲାର ସମାଟପଦର ଗାଁ ଦୁଇ ବର୍ଷ ତଳେ ନା ମଧ୍ୟ କେହି ଶୁଣିନଥିଲେ | କିନ୍ତୁ ହଠାତ ଦିନେ ସମସ୍ତ ଖବରକାଗଜର ଶିରୋନାମା ପାଲଟିଯାଇଥିଲା ସମାଟପଦର ଗାଁ । ନୂଆପଡ଼ା ଜିଲ୍ଲାର ଜିଲ୍ଲାପାଳ ଡ. ପୋମା ଟୁଡ଼ୁ ଦୀର୍ଘ ୪କିମି ରାସ୍ତା ଚାଲିଚାଲି ପହଞ୍ଚିଥିଲେ ସେହି ଗାଁ ରେ । ସେହିଦିନ ଠାରୁ ସମାଟପଦର ଗାଁ ଚର୍ଚ୍ଚା ରେ ରହିଆସିଥିଲା । ଏବେ ମାତ୍ର ଚାରି ଦିନ ତଳେ ପୁଣିଥରେ ନୂଆପଡ଼ାର ବିଦାୟୀ ଜିଲ୍ଲାପାଳ ସମାଟପଦର ଗାଁରେ ପହଞଞ୍ଚିଥିଲେ । ପ୍ରତିଶୃତି ଅନୁଯାଇ ସମାଟପଦର ଗାଁରେ ପହଂଚି ଆନୁଷ୍ଠାନିକ ଭାବରେ ବିଜୁଳି ସେବା ଉଦ୍ଘାଟନ କରିଥିଲେ । ସମାଟପଦର ଗାଁ ର ଦୀର୍ଘ ୭୦ ବର୍ଷ ର ପ୍ରତୀକ୍ଷାର ଅନ୍ତ ଘଟିଥିଲା । କିନ୍ତୁ ବିଜୁଳି ଆଲୋକରେ ଝଲସି ଉଠିଥିବା ସମାଟପଦର ଗାଁ ପୂର୍ବରୁ ଯେଉଁ ଅନ୍ଧାରରେ ଥିଲା ସେହି ଅନ୍ଧାରରେ ବା ବିକାଶର ଅନ୍ଧାରି ମୁଲକରେ ଅଛି ବୋଲି କହିଲେ ଭୁଲ ହେବନି | ଆଉ ତାହା ସତ ବୋଲି ପ୍ରମାଣିତ କରିଛି ଏହି ଅଭାବନିୟ ଘଟଣା।
ହସ୍ତଗତ ସୂଚନା ଅନୁଯାୟୀ ଗତ ରାତିରେ ପ୍ରମିଳା ମାଝୀ ନାମକ ଜଣେ ଯୁବତୀ ପ୍ରସବ ଯନ୍ତ୍ରଣା ଅନୁଭବ କରିଥିଲେ | କିନ୍ତୁ ସର୍ମ୍ପକୀୟ ମାନେ ଏତେରାତିରେ ନିଛାଟିଆ ନିଘଞ୍ଚ ଜଙ୍ଗଲ ରାସ୍ତା ରେ ଦୀର୍ଘ ୪କିମି ପାହାଡ଼ ଉପରୁ ତଳକୁ ଓହ୍ଲାଇ ଆସନ୍ନ ପ୍ରସବା ଙ୍କୁ ଚିକିତ୍ସାଳୟ ପର୍ଯ୍ୟନ୍ତ ନେବା ପାଇଁ ସାହାସ ଜୁଟାଇ ପାରିନଥିଲେ ଓ ସକାଳ ହେବା ପର୍ଯ୍ୟନ୍ତ ଅପେକ୍ଷା କରିଥିଲେ । ସକାଳ ହେବା ମାତ୍ରେ ସର୍ମ୍ପକୀୟ ମାନେ ପ୍ରସବା ଙ୍କୁ ଖଟରେ ବୋହି ଦୀର୍ଘ ୪କିମି ରାସ୍ତା ଚାଲି ପାହାଡ଼ ଉପରୁ ତଲକୁ ଓହ୍ଲାଇ ଥିଲେ । ସର୍ମ୍ପର୍କୀୟ ମାନେ ରାସ୍ତାରୁ ୧୦୮ ଆମ୍ବୁଲାନ୍ସ ଯୋଗାଯୋଗ କରି ପାହାଡ଼ ତଳକୁ ଆସିବାକୁ ଅନୁରୋଧ କରିଥିଲେ | କିନ୍ତୁ ଦୁର୍ଭାଗ୍ୟବଶତଃ ମହିଳା ଜଣକ ମଝି ରାସ୍ତା ରେ ହିଁ ଏକ ଶିଶୁ କନ୍ୟା କୁ ଜନ୍ମ ଦେଇଥିଲେ । ନବଜାତ ଶିଶୁକନ୍ୟା ଓ ପ୍ରସବା ମହିଳା ଙ୍କୁ ଧରି ସର୍ମ୍ପକିୟ ମାନେ ପାହାଡ଼ ତଳେ ଦୀର୍ଘ ଏକ ଘଣ୍ଟାରୁ ଅଧିକ ସମୟଧରି ଆମ୍ବୁଲାନ୍ସକୁ ଅପେକ୍ଷା କରିଥିଲେ ମଧ୍ୟ ଆମ୍ବୁଲାନ୍ସ ର କୌଣସି ଦେଖା ମିଳିନଥିଲା । ଦୀର୍ଘ ସମୟଧରି ଆମ୍ବୁଲାନ୍ସ ନ ଆସିବାରୁ ବିରକ୍ତ ହୋଇ ପୁଣିଥରେ ମା ଓ ଛୁଆ କୁ ଧରି ପାହାଡ଼ ଚଢ଼ି ନିଜ ଗାଁ କୁ ଫେରି ଯାଇଥିଲେ । ଘଟଣାଟି ରାଜ୍ୟ ରେ ପ୍ରସବାଙ୍କ ପାଇଁ ଉଦ୍ଧିଷ୍ଟ ସେବା ସୁବିଧାର ଡିଣ୍ଡିମ ପିଟୁଥିବା ସରକାର ଙ୍କ ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରୁଛି ।
ଏସର୍ମ୍ପକରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଶୀମତି ଜ୍ୟୋତ୍ସାରାଣୀ ପଟ୍ଟନାୟକଙ୍କୁ ପଚାରିବାରୁ ଏସର୍ମ୍ପକରେ ଆମ ପାଖରେ ତଥ୍ୟନାହିଁ ଓ ୧୦୮ଆମ୍ବୁଲାନ୍ସ ସେବା ଆମ ପରିସର ଭୁକ୍ତ ନୁହେଁ| କିନ୍ତୁ ଆମେ ଏହାର ତଦନ୍ତ କରିବୁ ଓ ଯଥାଶୀଘ୍ର ଜଣେ ସ୍ୱାସ୍ଥ୍ୟକର୍ମୀଙ୍କୁ ସମାଟପଦର ଗାଁ କୁ ପଠାଇ ମା ଓ ଛୁଆ କୁ ଉପଯୁକ୍ତ ସ୍ୱାସ୍ଥ୍ୟ ସେବା ଯୋଗାଇ ଦିଆଯିବ ବୋଲି ଜଣାଇଥିଲେ ।
