ଓଡ଼ଗାଁ,୨୫।୮(ଶ୍ରୀକାନ୍ତ କୁମାର ମିଶ୍ର): ନୟାଗଡ଼ ଜିଲ୍ଲା ଓଡଗାଁ ବ୍ଲକର ଶିକ୍ଷକ ଦମ୍ପତି ପ୍ରକୃତି ବନ୍ଧୁ ସନ୍ତୋଷ କୁମାର ସାହୁ, ଆରତୀ ସାହୁ ରୋହିବାଙ୍କ ପଞ୍ଚାୟତ ରୋହିବାଙ୍କ ଅଞ୍ଚଳରେ ରହି ଆସୁଥିବା ମାଟିଆ କେଳା ମଙ୍କୁ ଆଦିବାସୀ ସଂପ୍ରଦାୟର ୫ ଜଣ ପିଲାଙ୍କ ସମସ୍ତ ଶିକ୍ଷା ଖର୍ଚ୍ଚ ବହନ କରିବାକୁ ନିଷ୍ପତ୍ତି ନେଇଥିବା ଜଣାଇଛନ୍ତି । ତେବେ ଏନେଇ ସେ କୌଣସି ସରକାରୀ ଅନୁମତି ବିନା ବର୍ଷେ କି ଦୁଇ ବର୍ଷ ନୁହେଁ ୧୮ ବର୍ଷ ହେଲା ପର୍ଯ୍ୟନ୍ତ ସେମାନଙ୍କର ସମସ୍ତ ପାଠ୍ୟ ଉପକରଣ, ପୋଷାକ, ଟ୍ୟୁସନ ଖର୍ଚ୍ଚ ବହନ କରିବେ ବୋଲି କହିଛନ୍ତି । ଆଜି ଶିକ୍ଷକ ଦମ୍ପତି ସେମାନଙ୍କ ବାସ ସ୍ଥଳିକୁ ଯାଇ ଖାତା, ପେନ, ପେନସିଲ ସହିତ ଖାଦ୍ୟଦ୍ରବ୍ୟ ହିସାବରେ ଅଣ୍ଡା, ବିସ୍କେଟ, ଫଳ ପ୍ରଦାନ କରି ଭଲମନ୍ଦ ପଚାରି ବୁଝିଥିଲେ । ଶିକ୍ଷକ ଦମ୍ପତିଙ୍କ ଦ୍ବାରା ଦାୟିତ୍ଵ ଗ୍ରହଣ କରିଥିବା ପିଲାମାନେ ହେଲେ କୃଷ୍ଣ ପ୍ରଧାନ, ବର୍ଷା ପ୍ରଧାନ, ସୁମିତ୍ରା ପ୍ରଧାନ, ବାବୁ ପ୍ରଧାନ, ପୂଜା ପ୍ରଧାନ ।
ସୂଚନା ଥାଉକି ଥାଉ କି ଏହି ପିଲା ମାନଙ୍କ ପିତା ମାତା କେବଳ ପର୍ବ ପର୍ବାଣୀ ମାନଙ୍କରେ ମାଟି ଭିତରେ ନିଜର ମୁଣ୍ଡ ପୋତି ଦୀର୍ଘ ସମୟ ପର୍ଯ୍ୟନ୍ତ ରହି ଖେଳ ପ୍ରଦର୍ଶନ କରନ୍ତି । ଅନ୍ୟ ସମୟରେ ଜଙ୍ଗଲ ଓ ହାତପତେଇ କଷ୍ଟେମଷ୍ଟେ ଜୀବନ ନିର୍ବାହ କରିଥାନ୍ତି ।