• - ଅନୌପଚାରିକ ବସ୍ତିରେ ଅନ୍ତର୍ଭୁକ୍ତୀକରଣ ଓ ବାସୋପଯୋଗୀ ସହରାଞ୍ଚଳ ବସତି ସ୍ଥାପନ ପାଇଁ ଏମଓୟୁ

• - ୧୦ଟି ଜିଲ୍ଲା ଏବଂ ୧୯ଟି ପୌର ସଂସ୍ଥାରେ ସ୍ଵତନ୍ତ୍ର ଟିମ୍ ମୂତୟନ ହେବେ

• - ପ୍ରାୟ ୨.୨୮ ଲକ୍ଷ ବସ୍ତି ପରିବାର ପ୍ରତ୍ୟକ୍ଷ ଭାବରେ ଉପକୃତ ହେବା ଆଶା

ଭୁବନେଶ୍ୱର, ୩୧/୦୮/୨୦୨୫: ଅନୌପଚାରିକ ବସ୍ତିରେ ଅନ୍ତର୍ଭୁକ୍ତୀକରଣ ଓ ବାସୋପଯୋଗୀ ସହରାଞ୍ଚଳ ବସତି ସ୍ଥାପନ ପାଇଁ ଟାଟା ଷ୍ଟିଲ ଫାଉଣ୍ଡେସନ ଓଡ଼ିଶା ସରକାରଙ୍କ ଗୃହ ଏବଂ ନଗର ଉନ୍ନୟନ ବିଭାଗ (ଏଚଆଣ୍ଡୟୁଡିଡି) ସହିତ ଏକ ବୁଝାମଣାପତ୍ର (ଏମଓୟୁ) ସ୍ୱାକ୍ଷର କରିଛି । ସାର୍ବଜନୀନ ଅଧିକାରକୁ ସୁନିଶ୍ଚିତ କରିବା ଏବଂ ଅନ୍ତର୍ଭୁକ୍ତୀକରଣ ସମାଜ ବିକାଶ ପାଇଁ ବ୍ୟାପକ ମଡେଲ ଗଠନ କରି ସହରାଞ୍ଚଳ ଅସମାନତା ହ୍ରାସ କରିବା ଉଦ୍ଦେଶ୍ୟରେ ଏହି ବୁଝାମଣାପତ୍ର ସ୍ଵାକ୍ଷର ହୋଇଛି ।

ଭୁବନେଶ୍ୱରର ରେଳ ଅଡିଟୋରିଅମରେ ସ୍ୱାୟତ୍ତ ଶାସନ ଦିବସ ପାଳନ ଉପଲକ୍ଷେ ଆୟୋଜିତ ରାଜ୍ୟସ୍ତରୀୟ ଉତ୍ସବରେ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ଉପସ୍ଥିତିରେ ଏହି ବୁଝାମଣାପତ୍ର ସ୍ୱାକ୍ଷରିତ ହୋଇଛି। ଏହି ଅବସରରେ ଗୃହ ଏବଂ ନଗର ଉନ୍ନୟନ ବିଭାଗର ପ୍ରମୁଖ ସଚିବ ଶ୍ରୀମତି ଉଷା ପାଢ଼ୀ, ମୁନିସିପାଲିଟି ପ୍ରଶାସନ ନିର୍ଦ୍ଦେଶକ ଶ୍ରୀ ଅରିନ୍ଦମ ଡାକୁଆ ଏବଂ ଅନ୍ୟାନ୍ୟ ବରିଷ୍ଠ ସରକାରୀ ଅଧିକାରୀମାନେ ଉପସ୍ଥିତ ଥିଲେ। ଟାଟା ଷ୍ଟିଲ ଫାଉଣ୍ଡେସନ ପକ୍ଷରୁ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୌରଭ ରାୟ ବୁଝଣାମଣାପତ୍ରରେ ସ୍ୱାକ୍ଷର କରିଛନ୍ତି।

ଏହି ଅବସରରେ ଟାଟା ଷ୍ଟିଲ ଫାଉଣ୍ଡେସନର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ସୌରଭ ରାୟ କହିଛନ୍ତି, “ଟାଟା ଷ୍ଟିଲ ଫାଉଣ୍ଡେସନ୍ ରାଜ୍ୟବ୍ୟାପୀ ଜନବସତି ଉପରେ ରୂପାନ୍ତରିତ ପ୍ରଭାବ ଆଣିବା ପାଇଁ ଓଡ଼ିଶା ସରକାରଙ୍କ ସହିତ ଲଗାତାର କାର୍ଯ୍ୟ କରୁଛି। ଆଜିର ଏହି ଏମଓୟୁ ଏ ଦିଗରେ ଆଉ ଏକ ନୂଆ ପଦକ୍ଷେପ। ସହରାଞ୍ଚଳ ବସ୍ତିରେ ବସବାସ କରୁଥିବା ଲୋକମାନଙ୍କୁ ସେମାନଙ୍କ ଅଧିକାର ସମ୍ପର୍କରେ ଜଣାଇବା ଓ ସେମାନଙ୍କୁ ସକ୍ଷମ କରିବା ଦିଗରେ କାର୍ଯ୍ୟ କରାଯିବ। ଏହା ଆମ ଟିମ୍ ଦ୍ୱାରା ଗତ କିଛି ବର୍ଷ ଧରି କରାଯାଇଥିବା ପ୍ରତ୍ୟକ୍ଷ ପ୍ରୟାସକୁ ପ୍ରଦର୍ଶିତ କରୁଛି। ଏହି କାର୍ଯ୍ୟ ଓଡ଼ିଶାରେ ପରିବର୍ତ୍ତନର ମଡେଲ୍ ପ୍ରସ୍ତୁତ କରିବା ସହ ଏହାର କାର୍ଯ୍ୟକାରିତା ଦିଗରେ ଟାଟା ଷ୍ଟିଲ ଫାଉଣ୍ଡେସନର ପ୍ରତିଶ୍ରୁତିର ଏକ ପ୍ରତିଫଳନ। ଆମ ପ୍ରତି ବିଶ୍ୱାସ ପ୍ରକଟ କରିଥିବା ସମୁଦାୟ, ସହଯୋଗୀ ଏବଂ ଓଡ଼ିଶା ସରକାରଙ୍କୁ ଆମେ କୃତଜ୍ଞତା ଜଣାଉଛୁ।’’

ବୁଝାମଣାପତ୍ର ଅନୁଯାୟୀ ଟାଟା ଷ୍ଟିଲ ଫାଉଣ୍ଡେସନ ରାଜ୍ୟସ୍ତରୀୟ ମିଶନ ମ୍ୟାନେଜମେଣ୍ଟ ୟୁନିଟ୍ ଜାରି ରଖିବ ଏବଂ ୧୦ଟି ଜିଲ୍ଲା ଏବଂ ୧୯ଟି ପୌର ସଂସ୍ଥାରେ ସ୍ଵତନ୍ତ୍ର ଟିମ୍ ମୂତୟନ କରିବ। ଫଳରେ ପ୍ରାୟ ୨.୨୮ ଲକ୍ଷ ବସ୍ତି ପରିବାର ପ୍ରତ୍ୟକ୍ଷ ଭାବରେ ଉପକୃତ ହେବା ଆଶା କରାଯାଉଛି। ଯାହା ମାଧ୍ୟମରେ ସାମାଜିକ କଲ୍ୟାଣ ଯୋଜନାକୁ ଲୋକମାନଙ୍କ ପାଖରେ ପହଞ୍ଚାଯାଇପାରିବ।

ଚାରି ବର୍ଷ ମଧ୍ୟରେ ଏହି ବୁଝାମଣା ସରକାରୀ ନେତୃତ୍ୱକୁ କର୍ପୋରେଟ କାର୍ଯ୍ୟକାରୀ କ୍ଷମତା ସହିତ ସମନ୍ୱିତ କରି ଅନ୍ତର୍ଭୁକ୍ତୀକରଣ ସହରୀ ବିକାଶ ପ୍ରତି ଓଡ଼ିଶାର ପ୍ରତିଶ୍ରୁତିକୁ ଦୃଢ଼ କରିବ। ଏହାର ଉଦ୍ଦେଶ୍ୟ ସହରସ୍ତରୀୟ ବ୍ୟବସ୍ଥାକୁ ସୁଦୃଢ଼ କରିବା, ଗୋଷ୍ଠୀ ଅନୁଷ୍ଠାନଗୁଡ଼ିକୁ ସଶକ୍ତ କରିବା ଏବଂ ନୀତିଗତ ଉଦ୍ଦେଶ୍ୟକୁ ଫଳାଫଳରେ ପରିଣତ କରିବା। ଏହି ସହଯୋଗିତା ରୂପାନ୍ତରିତ ବସ୍ତି ବିକାଶ ପାଇଁ ଏକ ମୂଳଦୁଆ ସ୍ଥାପନ କରିବ। ରଣନୈତିକ ସହଯୋଗ ଯୋଗେ କିଭଳି ଅନୌପଚାରିକ ସହରୀ ବସ୍ତିରେ ବ୍ୟାପକ ଓ ସ୍ଥାୟୀ ପ୍ରଭାବ ଅଣାଯାଇପାରିବ, ତାହା ହିଁ ଏହି ଏମଓୟୁର ଉଦ୍ଦେଶ୍ୟ।

୨୦୨୨ରୁ ଆରମ୍ଭ ହୋଇଥିବା ଏକ ସଫଳ ସହଯୋଗିତା ଆଧାରରେ ଏହି ବୁଝାମଣା ହୋଇଛି। ଏହାଦ୍ଵାରା ୫ଟି ମ୍ୟୁନିସିପାଲ୍ କର୍ପୋରେସନରେ ଜମି ସୁରକ୍ଷା, ମୌଳିକ ସେବା ପ୍ରଦାନ ଏବଂ ଉନ୍ନତ ଜୀବନଯାପନ ପାଇଁ ସୁବିଧା ଯୋଗାଇ ଦିଆଯାଇଛି, ଯାହାଦ୍ୱାରା ୧.୩୪ ଲକ୍ଷରୁ ଅଧିକ ବସ୍ତିରେ ବାସ କରୁଥିବା ପରିବାର ଉପକୃତ ହୋଇଛନ୍ତି।

ଏହି ସହଯୋଗିତା ଏବଂ ପରବର୍ତ୍ତୀ ସମୟରେ ପ୍ରକଳ୍ପର ସମ୍ପ୍ରସାରଣ ଓଡ଼ିଶାରେ ଟାଟା ଷ୍ଟିଲର ଉପସ୍ଥିତିକୁ ବଢ଼ାଇବାରେ ସହାୟକ ହେବ। ଏହା ବ୍ୟତୀତ ଏହା ଫାଉଣ୍ଡେସନକୁ ଦୂରଦୂରାନ୍ତ ଗୋଷ୍ଠୀ ସହିତ କାର୍ଯ୍ୟ କରିବାର ବିଶେଷତାକୁ ଉପଯୋଗ କରିବ ଏବଂ ଓଡ଼ିଶାର ସହରାଞ୍ଚଳ ବସ୍ତିଗୁଡ଼ିକରେ ସାମାଜିକ ପ୍ରଭାବ କାର୍ଯ୍ୟକୁ ବିଶେଷ ଭାବରେ ବୃଦ୍ଧି କରିବାର ସୁଯୋଗ ପ୍ରଦାନ କରିବ।