ଜୟ ଓଡ଼ିଶା ଓ "ମା ମଙ୍ଗଳା ୟୁଥ୍ କ୍ଲବ" ର ମିଳିତ ଆନୁକୁଲ୍ୟରେ ଅନୁଷ୍ଠିତ ହୋଇଯାଇଛି "ରକ୍ତଦାନ" ଯୋଜନାର ୧୩ତମ ରକ୍ତଦାନ ଶିବିର। ଏହା ମା ମଙ୍ଗଳା କ୍ଲବ ପ୍ରାଙ୍ଗଣରେ ଆୟୋଜିତ ହୋଇଥିଲା, ଯେଉଁଠାରେ ସ୍ଥାନୀୟ ବାସିନ୍ଦାମାନେ ଓ କ୍ଲବର ସଦସ୍ୟମାନେ ମିଶି ୭୦ ୟୁନିଟ୍ ରକ୍ତ ସଂଗ୍ରହ କରାଯାଇଥିଲା।
ମା ମଙ୍ଗଳା କ୍ଲବ ଆଗାମୀ ଗଣେଶ ଚତୁର୍ଥୀ ପୂଜା ଆୟୋଜନ କରିବାକୁ ଯାଉଥିବା ହେତୁ ପୂଜାର ପ୍ରଥମ ଶୁଭଖୁଣ୍ଟ ସ୍ଥାପନା ରକ୍ତଦାନ ଭଳି ମହତ୍ କାର୍ଯ୍ୟରୁ କରିବାର ନିଷ୍ପତ୍ତି ନେଇଥିଲେ। ପବିତ୍ର ପୂଜା କାର୍ଯ୍ୟର ଶୁଭାରମ୍ଭ ଏପରି ମହାନ କାର୍ଯ୍ୟରୁ ଆରମ୍ଭ କରିବା ଦ୍ୱାରା ଭବିଷ୍ୟତର ସମସ୍ତ କାର୍ଯ୍ୟ ଶୁଭ ହେବ । ଏହା କିଛି ଲୋକଙ୍କ ଜୀବନ ବଞ୍ଚାଇବା ସହ ସମାଜ ପାଇଁ ଏକ ଉଦାହରଣ ହେବ, ଏହାହିଁ ଥିଲା ତାଙ୍କର ଉଦ୍ଦେଶ୍ଯ।
ଏହାସହ ସେମାନେ ସମସ୍ତ କ୍ଲବ ଓ ସଂଗଠନମାନଙ୍କୁ ଆହ୍ୱାନ କରିଛନ୍ତି ଯେ, ଯେଉଁମାନେ ଗଣେଶ ପୂଜା କରୁଛନ୍ତି, ସେମାନେ ମଧ୍ୟ ଏଭଳି ଉତ୍ତମ କାର୍ଯ୍ୟ ଦ୍ୱାରା ପୂଜା ଆରମ୍ଭ କରନ୍ତୁ, ଯାହା ଦ୍ୱାରା ଲୋକମାନେ ମଧ୍ୟ ପୂଜା ଉପଭୋଗ କରିବା ସହ ନିଜ ଆଖାପାଖ ଅଞ୍ଚଳରେ ଲୋକଙ୍କୁ ଯେକୌଣସି ପ୍ରକାରେ ସାହାଯ୍ୟ କରିବାକୁ ଉତ୍ସାହିତ ହେବେ।
ଅତିଥି ଭାବେ ବାବୁ ସିଂ (ଏକାମ୍ର ନିର୍ବାଚନ ମଣ୍ଡଳୀ ବିଧାୟକ), ବରିଷ୍ଠ ନେତା ଜଗନ୍ନାଥ ପ୍ରଧାନ, ବିଜେପିର ଜିଲ୍ଲା ସଭାପତି ନିରଞ୍ଜନ ମିଶ୍ର, ଶିଳ୍ପପତି ତଥା ବିଜେପି ନେତା ପିୟୁଷ ମହାନ୍ତି ଓ ଅନ୍ୟାନ୍ୟ ଅତିଥି ମାନେ ଶିବିରରେ ଯୋଗଦେଇ ମା ମଙ୍ଗଳା କ୍ଲବର ଏପରି ଉନ୍ନତ ଚିନ୍ତାଧାରା କୁ ଖୁବ୍ ପ୍ରସଂଶା କରିଥିଲେ।
ଏହି ଶିବିରଟି ସ୍ଥାନୀୟ ବାସିନ୍ଦା, ଜୟ ଓଡ଼ିଶା ଓ ମା ମଙ୍ଗଳା ୟୁଥ୍ କ୍ଲବର ସମସ୍ତ ସଦସ୍ୟଙ୍କ ଅତ୍ୟନ୍ତ ଉତ୍ସାହ ଓ ସହଯୋଗ ବଳରେ ସୂଚାରୁ ରୂପେ ସମ୍ପାଦନ ହୋଇଥିଲା।
ଆଗାମୀ ପୂଜା ସମୟରେ ମଧ୍ୟ ଏହି "ରକ୍ତଦାନ" ଅଭିଯାନ ଜାରି ରହିବ। ସେହି ଧାରାରେ ଆସନ୍ତା ୧୦ ତାରିଖରେ ହୋପ ଫାଉଣ୍ଡେସନ ସହ ମିଶି ଜୟ ଓଡ଼ିଶା ଏହାର ୧୪ତମ ରକ୍ତଦାନ ଶିବିର ଅନୁଷ୍ଠିତ କରିବାକୁ ଯାଉଛି ବୋଲି, ଜୟ ଓଡ଼ିଶାର ସଭାପତି ଶ୍ରୀ ରୁଦ୍ର ନାରାୟଣ ସାମନ୍ତରାୟ ସୂଚନା ଦେଇଛନ୍ତି।
