ବହୁ କାର ଏବଂ ବାଇକ ସହିତ ନଗଦ ଟଙ୍କା ଓ ୨୦ରୁ ଉର୍ଦ୍ଧ୍ବ ଜୁଆଡ଼ି ଗିରଫ

ଓଡଗାଁ,୧୯।୧(ଶ୍ରୀକାନ୍ତ କୁମାର ମିଶ୍ର): ନୟାଗଡ଼ ଜିଲ୍ଲା ଓଡଗାଁ ଆଦର୍ଶ ଥାନା ରୋହିବାଙ୍କ ପଂଚାୟତ ନାଉଖାଲ ନିକଟରେ ଚାଲିଥିବା ଏକ ଚର୍ଚ୍ଚିତ ଜୁଆ ଆଡ୍ଡା ଉପରେ ରବିବାର ପୋଲିସ ତରଫରୁ ଚଢ଼ାଉ ହୋଇଥିବା ଜଣାଯାଇଛି । ଓଡ଼ଗାଁ ଥାନା ନାଉଖାଲ, ଜାମୁପାଟଣା ଓ ଲଣ୍ଡାବାଡୁ ନିକଟସ୍ଥ କାଜୁ ଜଙ୍ଗଲରେ ଦୀର୍ଘ ଦିନ ହେଲା ଆନ୍ତଃ ଜିଲ୍ଲା କୁଖ୍ୟାତ ଜୁଆଡିଙ୍କ ସହିତ ସ୍ଥାନୀୟ ଜନ ପ୍ରତିନିଧି ଜୁଆ ଆଡ୍ଡା ପରିଚାଳନା କରୁଥିବା ନେଇ ସ୍ଥାନୀୟ ଅଂଚଳରେ ଚର୍ଚ୍ଚା ଜୋର ଧରିଥିଲା । ଏପରି ସ୍ଥଳେ ସୂଚନା ପାଇ ଜିଲ୍ଲା ପୋଲିସ ତତ୍ପରତା ପ୍ରକାଶ କରି ରବିବାର ଅପରାହ୍ଣରେ ଅତର୍କିତ ଭାବେ ନାଉଖାଲ ଜୁଆ ଅଡ୍ଡା ଉପରେ ଚଢ଼ାଉ କରିଥିଲେ । ଏଠାରୁ କାର, ବାଇକ ସହିତ ଲକ୍ଷାଧିକ ନଗଦ ଟଙ୍କା ଓ ତାସ ମୁଠା ପୋଲିସ ଜବତ କରିଥିବା ଜଣାପଡିଛି । ଏଥିସହିତ ୧୦ ରୁ ଉର୍ଦ୍ଧ ନାମୀ ଦାମୀ ଶ୍ରେଣୀୟ ଜୁଆଡ଼ିଙ୍କୁ ଏଥିରେ ପୋଲିସ କାବୁ କରି ଆଣିଥିବା ବେଳେ ଏନେଇ ସବିଶେଷ ସୂଚନା ସୋମବାର ସକାଳେ ଜଣାଇ ଦିଆଯିବ ବୋଲି ଥାନା ଆଇଆଇସି ରଶ୍ମି ରଞ୍ଜନ ସାହୁ ସୂଚନା ଦେଇଛନ୍ତି ।