ନୟାଗଡ଼ (ବିଶ୍ୱଜିତ ନାୟକ) :- ନୟାଗଡ଼ ସଦରଥାନା ପୁଲିସ ଏକ ବନ୍ଧୁକ ନିର୍ମାଣ କାରଖାନା ଉପରେ ଚଢ଼ାଉ କରି ନିର୍ମାଣ ସାମଗ୍ରୀ ଏବଂ ବନ୍ଧୁକ ଜବତ କରିବା ସହ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ହେଲେ ସଦରଥାନା ମାଳିସାହି ଫାଣ୍ଡି ନିକଟସ୍ଥ ମାଳିସାହି ଗ୍ରାମର ବୀରବର ମହାରଣାଙ୍କ ପୁଅ କାବୁଲି ମହାରଣା । କାବୁଲି ଜଣେ ନିୟମିତ ବନ୍ଧୁକ ନିର୍ମାଣ କାରୀ ବୋଲି ନୟାଗଡ଼ ଏସପି ଏସ ସୁଶ୍ରୀ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ୨୦୧୫ ମସିହା ଏବଂ ୨୦୨୦ ମସିହାରେ ପୁଲିସ ତାକୁ ଗିରଫ କରି ଆର୍ମ୍ସ ଆକ୍ଟରେ କୋର୍ଟ ଚାଲାଣ କରିଥିଲା । ଜାମିନରେ ଫେରିବା ପରେ ପୁଣି ସେ ନିଜ ଘରେ ବନ୍ଧୁକ ନିର୍ମାଣ କରୁଥିବା ସୂଚନା ମିଳିଥିଲା ।
ନୟାଗଡ଼ ଏସଡିପିଓ ସୁଦର୍ଶନ ଗାଙ୍ଗୋଇଙ୍କ ତତ୍ୱବଧାନରେ ସଦରଥାନା ଅଧିକାରୀ ବିଜୟା ସାହୁଙ୍କ ନେତୃତ୍ୱରେ ଚଢ଼ାଉ କରାଯାଇ ଅଭିଯୁକ୍ତଙ୍କଠାରୁ ନୂତନ ନିର୍ମାଣ ହୋଇଥିବା ଏକ ଦେଶୀ ବନ୍ଧୁକ ଜବତ କରାଯାଇଛି । ଏହା ସହିତ ବନ୍ଧୁକ ନିର୍ମାଣ ପାଇଁ ସେ ପ୍ରସ୍ତୁତ କରି ରଖିଥିବା କାଠ, ଟିଗର ଏବଂ ନିର୍ମାଣ ସାମଗ୍ରୀ ଜବତ ହୋଇଛି । ଅଭିଯୁକ୍ତକୁ ଆଜି କୋର୍ଟ ଚାଲାଣ କରାଯାଇଥିବା ଏସପି ସୂଚନା ଦେଇଛନ୍ତି । ସେ ଏହା ମଧ୍ୟରେ କାହାକୁ ବନ୍ଧୁକ ବିକ୍ରି କରିଛି, ତାହାର ଅନୁସନ୍ଧାନ କରିବା ପାଇଁ ଅଭିଯୁକ୍ତକୁ ରିମାଣ୍ଡରେ ଅଣାଯିବ ବୋଲି ଏସପି କହିଛନ୍ତି । ଏହି ଚଢ଼ାଉରେ ସଦରଥାନା ଏସଆଇ ଧର୍ମେନ୍ଦ୍ର ଶିଆଳ ଏବଂ ଅନ୍ୟ ପୁଲିସ କର୍ମଚାରୀ ସାମିଲ ରହିଥିଲେ ।
