ଆଠମଲ୍ଲିକ ନିର୍ବାଚନ ମଣ୍ଡଳୀରେ କେନ୍ଦ୍ରମନ୍ତ୍ରୀଙ୍କ ନିର୍ବାଚନୀ ପ୍ରଚାର
• କିଆକଟା ଓ ମାଧପୁର ସମେତ ବିଭିନ୍ନ ସ୍ଥାନରେ ପଦଯାତ୍ରା ଓ ରୋଡ୍ ସୋ’ରେ ଯୋଗଦେଲେ
• ପାଖାପାଖି ୬୦ କିମି ରୋଡ ସୋ’ କଲେ କେନ୍ଦ୍ରମନ୍ତ୍ରୀ
• ୨୪ ବର୍ଷ ଧରି ଦୁର୍ନୀତି, ଅନ୍ୟାୟ, ଅତ୍ୟାଚାରୀ ସରକାର ବିରୋଧରେ ନିର୍ଣ୍ଣାୟକ ମତ ଦେବେ ଜନତା
• ଓଡ଼ିଶାରେ ଆୟୁଷ୍ମାନ ଭାରତ ଯୋଜନା ଲାଗୁ ହେଉନି କାହିଁକି ?
• ଓଡ଼ିଶା ଏବଂ ଦେଶରେ ବିଜେପି ସରକାର ଗଠନ କରିବା ଆମର ସଂକଳ୍ପ
• ଶୋଭାଯାତ୍ରାରେ ଅଦ୍ଭୁତପୂର୍ବ ଜନସମର୍ଥନ ପାଇଁ ଧନ୍ୟବାଦ ଜଣାଇଲେ କେନ୍ଦ୍ରମନ୍ତ୍ରୀ
• ଦେଉଳଝରୀରେ ସିଦ୍ଧେଶ୍ୱର ବାବା, ଆଠମଲ୍ଲିକରେ ମା’ ମାହେଶ୍ୱରୀ, ଓଳଥରେ ରାମ ମନ୍ଦିରରେ ଦର୍ଶନ କଲେ
ଆଠମଲ୍ଲିକ, ଏପ୍ରିଲ ୨୪ – ମୁଖ୍ୟମନ୍ତ୍ରୀ ହିଞ୍ଜିଳିରେ ନିର୍ବାଚନ ପ୍ରଚାର କରୁଛନ୍ତି । ତେବେ ବିଗତ ବର୍ଷ ମାନଙ୍କରେ ହିଞ୍ଜିଳିରୁ କେତେ ଜଣ ଲୋକମାନେ ଦାଦନ ଯାଇଛନ୍ତି, ସେ ସମ୍ପର୍କରେ ସାମାଜିକ ସଂଗଠନର ଦାବି କ୍ରମେ ଶ୍ୱେତପତ୍ର ପ୍ରକାଶ କରିବେ କି ବୋଲି ମଙ୍ଗଳବାର ଆଠମଲ୍ଲିକ ନିର୍ବାଚନମଣ୍ଡଳୀରେ ପ୍ରଚାର କରିବା ଅବସରରେ ପ୍ରଶ୍ନ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ରାଜ୍ୟରେ ଅପାର ସମ୍ଭାବନା ରହିଛି । ମହାନଦୀ ଅବବାହିକାରେ ଥିବା ଜିଲ୍ଲା ଗୁଡ଼ିକରେ ପିଇବା ପାଣି ଓ ଜଳସେଚନର ଅଭାବ ରହିଛି । ଶିକ୍ଷା ଓ ସ୍ୱାସ୍ଥ୍ୟସେବା ନାମକୁ ମାତ୍ର । ଏହା ଗରିବ ଲୋକଙ୍କ ପାଇଁ ନୁହେଁ । ରାଜ୍ୟ ସରକାର ଜାଣିଶୁଣି ଆୟୁଷ୍ମାନ ଭାରତ ଯୋଜନା ଲାଗୁ କରୁନାହାନ୍ତି । ଅନେକ ଅଣବିଜେପି ଶାସିତ ରାଜ୍ୟରେ ବି ଆୟୁଷ୍ମାନ ଭାରତ ଲାଗୁ ହୋଇଛି । ଓଡ଼ିଶାରେ କ’ଣ ଅସୁବିଧା ରହିଛି ତାହା ସରକାର ହିଁ ଜାଣିଥିଲେ । ମୁଖ୍ୟମନ୍ତ୍ରୀ ହିଞ୍ଜିଳିରେ ନିର୍ବାଚନ ପ୍ରଚାର କରୁଛନ୍ତି । ସେ ଏଥର କଣ୍ଟାବାଞ୍ଜିରେ ମଧ୍ୟ ଛିଡ଼ା ହୋଇଛନ୍ତି । ଏହି ପରିପ୍ରେକ୍ଷୀରେ ସାମାଜିକ ସଂଗଠନ ପକ୍ଷରୁ ଏକ ଦାବି ଉଠିଛି । ହିଞ୍ଜିଳିରୁ କେତେ ଦାଦନ ଯାଇଛନ୍ତି, ସେ ସମ୍ପର୍କରେ ମୁଖ୍ୟମନ୍ତ୍ରୀ ଶ୍ୱେତପତ୍ର ପ୍ରକାଶ କରନ୍ତୁ ବୋଲି ସଂଗଠନ ଗୁଡ଼ିକ ଦାବି କରିଛନ୍ତି ।
