ନଅ ବର୍ଷ ମଧ୍ୟରେ ରନ୍ଧନ ଗ୍ୟାସ ଦର ପ୍ରାୟ ୩ ଗୁଣ ବଢାଇଛି କେନ୍ଦ୍ର, ନୀରବତା ଭାଙ୍ଗୁ ଓଡିଶା ବିଜେପି: ସୌମ୍ୟରଞ୍ଜନ
-
ଓଡିଶାର ମା ଏବଂ ଭଉଣୀଙ୍କ ଆଖିରେ ଲୁହ
-
ଗରିବ ଲୋକଙ୍କର ମାସିକ ୫କିଲୋ ଚାଉଳ କାଟିଦେଲେ
-
ହାଣ୍ଡିଶାଳ ଉପରେ ଦୋହରା ମାଡ
ଭୁବନେଶ୍ୱର: ବିଭିନ୍ନ ସମୟରେ ଆଉ ବିଭିନ୍ନ ସଭାସମିତିରେ ବିବାଦୀୟ ବୟାନ ଦେଇ ରାଜ୍ୟ ସରକାର ଓ ବିଜେଡିକୁ ସାମାନ୍ୟ ଅଡୁଆରେ ପକାଉଥିବା ବିଜେଡି ବିଧାୟକ ସୌମ୍ୟରଂଜନ ପଟ୍ଟନାୟକଙ୍କୁ ଆଗକୁ ଠେଲିଛି ବିଜେଡି | ତାଙ୍କରି ମୁହଁରେ କେନ୍ଦ୍ର ସରକାରଙ୍କ ବିରୋଧରେ କରାଇଛି ସାମ୍ବାଦିକ ସମ୍ମିଳନୀ | କେନ୍ଦ୍ର ସରକାରଙ୍କ ଉଜ୍ଜ୍ଵଳା ଯୋଜନାକୁ ତୀବ୍ର ସମାଲୋଚନା କରିବା ସହ ଜାଳେଣି ଗ୍ୟାସ ଦରବୃଦ୍ଧିକୁ ନେଇ କରିଛନ୍ତି ଶାଣିତ ଆକ୍ରମଣ | ଓଡିଶା ତଥା ଦେଶର ମା’ ଭଉଣୀଙ୍କ ଆଖିରୁ ଚୂଲି ଧୂଆଁ ବାଜି ଯେଭଳି ଲୁହ ନବାହାରିବ ସେଥିପାଇଁ କେନ୍ଦ୍ର ସରକାର ଉଜ୍ୱଳା ଯୋଜନାରେ ରିହାତି ଦରରେ ରନ୍ଧନଗ୍ୟାସ ସିଲିଣ୍ଡର ଯୋଗାଣ ଯୋଜନା କରିଥିଲେ । ହେଲେ ଏଲପିଜି ରନ୍ଧନ ଗ୍ୟାସର ଦର ଦ୍ରୁତ ଗତିରେ ବୃଦ୍ଧି କେବଳ ଓଡିଶାର ମା ଏବଂ ଭଉଣୀଙ୍କ ଆଖିରେ ଲୁହ ଆଣିଦେଇ ନାହିଁ ବରଂ ସବୁ ପରିବାର ଆଖିରେ ଲୁହ ଆଣି ଦେଇଛି ଯାହା ସେମାନଙ୍କୁ ଅତ୍ୟନ୍ତ କଷ୍ଟ ଦେଇଛି ବୋଲି ଆଜି ଏଠାରେ ଏକ ସାମ୍ବାଦିକ ସମ୍ମିଳନୀରେ ବିଜେଡିର ବରିଷ୍ଠ ବିଧାୟକ ଶ୍ରୀ ସୌମ୍ୟ ରଞ୍ଜନ ପଟ୍ଟନାୟକ ଓ ବିଜେଡି ପ୍ରବକ୍ତା ଶ୍ରୀମତୀ ଶ୍ରମୟୀ ମିଶ୍ର କହିଛନ୍ତି ।
ସେମାନେ କହିଛନ୍ତି ଯେ ଅତ୍ୟାବଶ୍ୟକ ସାମଗ୍ରୀର ମୂଲ୍ୟ ବୃଦ୍ଧି ସହିତ ଇନ୍ଧନ ଏବଂ ମୁଦ୍ରାସ୍ଫୀତି ବୃଦ୍ଧି ଓଡିଶାର ୪.୫ କୋଟି ଲୋକଙ୍କୁ ବହୁତ ଯନ୍ତ୍ରଣା ଦେଉଥିବାବେଳେ ଏଲପିଜି ରନ୍ଧନ ଗ୍ୟାସର ମୂଲ୍ୟ ହ୍ରାସ କରିବାକୁ କେନ୍ଦ୍ର ଗୁରୁତ୍ୱ ଦେଉଥିବା ମନେ ହେଉନାହିଁ । ମାର୍ଚ୍ଚ ୨୦୧୪ ରେ ଗୋଟିଏ ଘରୋଇ ଏଲପିଜି ସିଲିଣ୍ଡର (୧୪.୨ କିଲୋଗ୍ରାମ ସିଲିଣ୍ଡର) ର ମୂଲ୍ୟ ୪୧୦ ଟଙ୍କା ଥିଲାବେଳେ ବର୍ତ୍ତମାନ ତାହା ୨୦୨୩ ମାର୍ଚ୍ଚ ପହିଲାରୁ ୧୧୦୩ ଟଙ୍କା ହୋଇଛି । ଆପଣ ଦେଖୁଛନ୍ତି ଯେ ଗତ ୯ ବର୍ଷ ମଧ୍ୟରେ ଗୋଟିଏ ରନ୍ଧନ ଗ୍ୟାସ୍ ସିଲିଣ୍ଡରର ମୂଲ୍ୟ ପ୍ରାୟ ୩ ଗୁଣ ବୃଦ୍ଧି କରାଯାଇଛି । ୯ ବର୍ଷରେ ୩ ଗୁଣା ଗ୍ୟାସ ବୃଦ୍ଧି ହେବାକୁ କେହି କଳ୍ପନା କରିପାରିବେ କି? ଏହି ଦ୍ରୁତ ଦର ବୃଦ୍ଧି ଲକ୍ଷ ଲକ୍ଷ ମା’ଙ୍କୁ ବହୁତ ଯନ୍ତ୍ରଣା ଏବଂ କଷ୍ଟ ଦେଇଛି । ଗୋଟିଏ ପଟେ କେନ୍ଦ୍ର ସରକାର ଶସ୍ତା ରନ୍ଧନ ଗ୍ୟାସ କଥା କହୁଥିବାବେଳେ ଅନ୍ୟପଟେ ରନ୍ଧନ ଗ୍ୟାସ ଦର ବଢାଇ ଚାଲିଛନ୍ତି ।
ରନ୍ଧନ ଗ୍ୟାସର ଏପରି ଆକାଶଛୁଆଁ ଦରବୃଦ୍ଧି ହେତୁ ଲକ୍ଷ ଲକ୍ଷ ମା’ ଓ ଭଉଣୀମାନେ ଏହି ଗ୍ୟାସ ସିଲିଣ୍ଡର ଭରି ନପାରି ପୁନର୍ବାର ଜାଳେଣି କାଠ ବ୍ୟବହାର କରିବାକୁ ବାଧ୍ୟ ହେଉଛନ୍ତି । କେନ୍ଦ୍ର ସରକାର ଏନଏସଏଫ୍ଏ ଅଧିନରେ ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା (ପିଏମଜିକେଏୱାଇ) ରେ ପ୍ରତି ବ୍ୟକ୍ତିଙ୍କ ପାଇଁ ଦେଉଥିବା ମାସିକ ୫ କିଲୋଗ୍ରାମ ମାଗଣା ଚାଉଳକୁ ବନ୍ଦ କରିଦେଲେ । ବର୍ତ୍ତମାନ ୯ ବର୍ଷରେ ରନ୍ଧନ ଗ୍ୟାସର ମୂଲ୍ୟ ତିନି ଗୁଣା ବୃଦ୍ଧି କରି ସେମାନେ ସାଧାରଣ ଲୋକଙ୍କ ରୋଷେଇ ଘର ଏବଂ ପରିବାର ଉପରେ ଦୁଇଗୁଣା ବୋଝ ଲଦି ଦେଇଛନ୍ତି ।
ଆମେ ଆଶ୍ଚର୍ଯ୍ୟ ହେଉଛୁ ଯେ ଓଡିଶା ବିଜେପି କାହିଁକି ଚୁପ୍ ଅଛି? ଏଥିରୁ ଜଣାପଡୁଛି ଯେ ସେମାନେ ଲୋକ ଏବଂ ମହିଳା ପ୍ରସଙ୍ଗକୁ ବିଭ୍ରାନ୍ତ କରିବାକୁ ଅଧିକ ଆଗ୍ରହୀ । ସେମାନେ କାହିଁକି ଏହିପରି ସମସ୍ୟା ବିଷୟରେ ଆଲୋଚନା କରିବାକୁ ଚାହୁଁନାହାଁନ୍ତି ଯାହା ସାଧାରଣ ପୁରୁଷ ଏବଂ ମହିଳା, ତାଙ୍କ ରୋଷେଇ ଘର, ପରିବାର, ଜୀବନ ଏବଂ ଜୀବିକା ଉପରେ ପ୍ରଭାବ ପକାଇଥାଏ? ଋନ୍ଧନଗ୍ୟାସ ମୂଲ୍ୟ ବୃଦ୍ଧି ଯୋଗୁଁ ଓଡିଶାର ମା’ମାନଙ୍କ ଆଖିରୁ ବାହାରୁଥିବା ଲୁହ ଅପେକ୍ଷା କ’ଣ ରାଜନୀତି କରିବା ଓଡିଶା ବିଜେପି ପାଇଁ ଗୁରୁତ୍ୱପୂର୍ଣ୍ଣ କି ବୋଲି ବିଜେଡି ପ୍ରଶ୍ନ କରିଛି ।
ବିଜୁ ଜନତା ଦଳ ଦାବି କରିଛି ଯେ ଏଲପିଜି ରନ୍ଧନ ଗ୍ୟାସର ମୂଲ୍ୟ ହ୍ରାସ କରିବାରେ ଭାରତ ସରକାର ତୁରନ୍ତ ପଦକ୍ଷେପ ନିଅନ୍ତୁ । ବିଜୁ ଜନତା ଦଳ ଓଡିଶାର ଲୋକ ଏବଂ ବିଶେଷକରି ଓଡିଶାର ମା’ ଏବଂ ଭଉଣୀମାନଙ୍କ ସହିତ ଛିଡା ହୋଇଛି ଯେଉଁମାନେ ଏହି ମୂଲ୍ୟ ବୃଦ୍ଧି ଯୋଗୁଁ ଘର ଚଳାଇବାରେ କଠିନ ସମୟର ସମ୍ମୁଖୀନ ହେଉଛନ୍ତି । ଆମେ ଆଶା କରୁଛୁ ଏହି ପରିପ୍ରେକ୍ଷୀରେ କେନ୍ଦ୍ର ଜରୁରୀ ଏବଂ ତୁରନ୍ତ ପଦକ୍ଷେପ ଗ୍ରହଣ କରିବ ଏବଂ ସାଧାରଣ ଲୋକ ଏବଂ ବିଶେଷକରି ମା ଏବଂ ଭଉଣୀମାନେ ସମ୍ମୁଖୀନ ହେଉଥିବା କଠିନ ସମୟରେ ଓଡ଼ିଶା ଉପରେ ଯେଭଳି ପ୍ରତିକୂଳ ପ୍ରଭାବ ପଡିବ଼ ନାହିଁ ତାହା ନିଶ୍ଚିତ କରିବେ । ଆମେ ଏହା ମଧ୍ୟ ଆଶା କରୁଛୁ ଯେ ଓଡିଶା ବିଜେପି ମଧ୍ୟ ତାହାର ନିରବତାକୁ ଭାଙ୍ଗୁ ଏବଂ ଏଭଳି ପ୍ରସଙ୍ଗ ପାଇଁ କହୁ ଯାହାକି ଓଡିଶାର ୪.୫ କୋଟି ଲୋକଙ୍କ ଜୀବନ ଉପରେ ପ୍ରଭାବ ପକାଉଛି ଏବଂ ବିଶେଷ କରି ଲକ୍ଷ ଲକ୍ଷ ମା’ ଓ ଭଉଣୀ ଓ ସେମାନଙ୍କ ରୋଷେଇ ଘର ଉପରେ ଗୁରୁତର ପ୍ରଭାବ ପକାଉଛି ବୋଲି ଶ୍ରୀ ପଟ୍ଟନାୟକ କହିଛନ୍ତି ।
