ପାଟଣାଗଡ଼,( ଯତୀନ୍ଦ୍ର ନନ୍ଦ )ପାଟଣାଗଡ଼ ଥାନା କଣ୍ଟାବାଞ୍ଜି ରାସ୍ତାର ସାଲେପାଲି ଛକ ନିକଟରେ ଏକ ଅଜଣା ଗାଡି ଧକ୍କାରେ ୨ଜଣ ବାଇକ ଆରୋହୀଙ୍କ ମୃତ୍ୟୁ ଘଟିଥିବାର ଇତିମଧ୍ୟରେ ଜଣାପଡିଛି । ବାଇକ୍‌ରେ ଥିବା ଦୁଇ ଜଣଙ୍କ ମଧ୍ୟରୁ ଘଟଣା ସ୍ଥଳରେ ଜଣକର ମୃତ୍ୟୁ ଘଟିଥିବା ବେଳେ ଅନ୍ୟ ଜଣକୁ ଡାକ୍ତରଖାନା ନେବା ବେଳେ ରାସ୍ତାରେ ମୃତ୍ୟୁ ଘଟିଥିଲା । ମୃତ ବ୍ୟକ୍ତିମାନେ ହେଲେ ଖଡ଼ିଆଳ ଗାଁର ରୁବି ଭୋଇ ଏବଂ ସିନାପାଲି ହାତିବନ୍ଧଗାଁର କ୍ଷୀରସିନ୍ଧୁ କାଣ୍ଡ ବୋଲି ଜଣାପଡିଛି । ମିଳିଥିବା ସୂଚନା ଅନୁସାରେ ରୁବିଙ୍କ ମା’ର ଇନ୍ସୁରେନ୍ସ କାମ ପାଇଁ ଦୁହେଁ ବଲାଙ୍ଗିରକୁ ଯାଇଥିଲେ । ସେଠାରେ କାମ ସାରି ମଧ୍ୟାହ୍ନ ସମୟରେ ଘରକୁ ଫେରୁଥିବା ବେଳେ ପାଟଣାଗଡ଼-କଣ୍ଟାବାଞ୍ଜି ରାସ୍ତାର ସାଲେପାଲି ଛକ ନିକଟରେ ସାମ୍ନାପଟୁ ଆସୁଥିବା ଏକ ଅଜଣା ପିକ୍‌ଅପ୍‌ ଭ୍ୟାନ ଧକ୍କା ଦେଇ ଫେରାର ହୋଇଥିଲା । ଫଳରେ ଘଟଣା ସ୍ଥଳରେ ହିଁ କ୍ଷୀରସିନ୍ଧୁଙ୍କ ମୃତ୍ୟୁ ହୋଇଥିବା ବେଳେ ଝିଅ ରୁବିକୁ ସ୍ଥାନୀୟ ଲୋକେ ଉଦ୍ଧାର କରି ପାଟଣାଗଡ଼ ଡାକ୍ତର ଖାନାକୁ ଆଣୁଥିବା ବେଳେ ରାସ୍ତାରେ ରୁବିର ମୃତ୍ୟୁ ଘଟିଛି । ସୂଚନାଯୋଗ୍ୟ ଯେ, ରୁବି ଓ କ୍ଷୀରସିନ୍ଧୁଙ୍କ ବିବାହ ଆସନ୍ତା ମେ’ ମାସରେ ସ୍ଥିର ହୋଇଥିଲା । ପୋଲିସ ଘଟଣା ସ୍ଥଳରେ ପହଁଚି ଅଧିକ ତଦନ୍ତ ଜାରି ରଖିଛି ।ଆହୁରି ମଧ୍ୟ, ଅଜଣା ଯାନ ବାହାନ ଗାଡ଼ି ଗୁଡିକ ଦୁର୍ଘଟଣା ଘଟାଇ ଫେରାର ହୋଇଯିବା କ୍ଷେତ୍ରରେ ପୋଲିସର  ଉଦାସୀନତା ହେତୁ ଅନେକ ଘଟଣାର ପର୍ଦାଫାଶ ଆଜିବି ହୋଇପାରିନାହିଁ!ଅତଏବ ଆଗକୁ ଅପରାଧୀ ମାନସିକତା ଧାରୀ ବ୍ୟକ୍ତି ବିଶେଷ ଏହା ସୁବର୍ଣ୍ଣ ସୁଯୋଗ ମନେକରି  ନିଜର ଅଭିଳାଷ ପୂରଣ କରିବା ପାଇଁ ଏ ଦିଗରେ ତତ୍ପର ହେବେନିତ !! ଏଣୁ ଦୁର୍ଘଟଣା ଘଟାଇ ଫେରାର ହୋଇଯାଇଥିବା ପିକକପ ଗାଡିକୁ ଜବତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦୂରଦ୍ରଷ୍ଟାଙ୍କ ମହଳରୁ ଦାବୀ ହେଉଛି |