ଚା ଖଟିରେ ଚର୍ଚା ଜମୁଛି, ପ୍ରଚାର ଶୈଳୀ ଲୋକଙ୍କ ମନକୁ ଛୁଉଁଛି

ଭୁବନେଶ୍ଵର : ବିଜେଡିର ମେୟର ପ୍ରାର୍ଥୀ ସୁଲୋଚନା ଦାସ ଆଜି ରାଜଧାନୀର ବିଭିନ୍ନ ଅଞ୍ଚଳ ବୁଲି ଜନସମ୍ପର୍କ ଅଭିଯାନ ଚଲାଇଥିଲେ । ପ୍ରାତଃଭ୍ରମଣ ଠାରୁ ବିଳମ୍ବିତ ରାତି ପର୍ଯ୍ୟନ୍ତ ବିଭିନ୍ନ ୱାର୍ଡରେ ବୁଲି ସାଧାରଣ ଲୋକଙ୍କୁ ଭେଟି ସମର୍ଥନ ଲୋଡିଥିଲେ ।
ଏହି ଅଭିଯାନ ସମୟରେ ସାଧାରଣ ଲୋକଙ୍କ ସମସ୍ୟା ଓ ପରାମର୍ଶ ନେଇ ସେମାନଙ୍କ ସହ ଆଲୋଚନା କରି ବିଜେଡିକୁ ମାର୍ଚ୍ଚ ୨୪ ରେ ଅନୁଷ୍ଠିତ ହେବାକୁ ଥିବା ନିର୍ବାଚନରେ ସମର୍ଥନ ଦେବାକୁ ନିବେଦନ କରିଥିଲେ । ଗୁରୁବାର ପ୍ରତ୍ୟୁଷରୁ ଏକାମ୍ର କାନନ ଓ ଗାନ୍ଧୀ ପାର୍କକୁ ଯାଇ ପ୍ରାତଃଭ୍ରମଣରେ ଆସିଥିବା ସାଧାରଣ ଲୋକଙ୍କୁ ଭେଟି ସେମାନଙ୍କ ସମର୍ଥନ ଓ ସାହାଯ୍ୟ ଲୋଡ଼ିଥିଲେ । ଏହି ସମୟରେ ବହୁ ବୁଦ୍ଧିଜୀବୀମାନେ ବିଜେଡି ମେୟର ପ୍ରାର୍ଥୀ ଶ୍ରୀମତୀ ଦାସଙ୍କୁ ଶୁଭେଚ୍ଛା ଜଣେଇବା ସହ ସମର୍ଥନ ଦେବେ ବୋଲି ସହମତି ପ୍ରକାଶ କରିଥିଲେ ।
ଏକାମ୍ର ପାର୍କରେ ସାଧାରଣ ଲୋକଙ୍କୁ ଭେଟିବା ସମୟରେ ପ୍ରାତଃଭ୍ରମଣରେ ଆସିଥିବା ଓଡ଼ିଶା ବିଧାନ ସଭାର ବାଚସ୍ପତି ସୂର୍ଯ୍ୟ ନାରାୟଣ ପାତ୍ରଙ୍କ ଆଶୀର୍ବାଦ ପାଇଥିଲେ । ଏହା ପରେ ଅମ୍ବର୍ ସୋରୁମ୍ ପାଖ ଓମ୍ଫେଡ୍ ଚା' ଖଟିରେ ପହଞ୍ଚି ଲୋକଙ୍କ ସହ କିଛି ସମୟ ଆଲୋଚନା କରିଥିଲେ । ଏହି ଆଲୋଚନା ସମୟରେ ମେୟର ପ୍ରାର୍ଥୀ ସୁଲୋଚନାଙ୍କ ସହ ଓଡ଼ିଆ ଚଳଚିତ୍ର ଅଭିନେତ୍ରୀ ପୁଷ୍ପା ପଣ୍ଡାଙ୍କ ସହ ମଧ୍ୟ ସାକ୍ଷାତ ହୋଇଥିଲା ।
ମଧ୍ୟାହ୍ନରେ ସଂଖ୍ୟାଲଘୁ ସମ୍ପ୍ରଦାୟର ଭୁବନେଶ୍ଵର ପାଷ୍ଟରସ୍ ଆସୋସିଏସନ ଓ ଭୁବନେଶ୍ୱର ପ୍ରେୟର ପାର୍ଟନରସ୍ ର ସଦସ୍ୟଙ୍କ ସହ ଆଲୋଚନା କରି ସମର୍ଥନ ଲୋଡ଼ିଥିଲେ ।
ସନ୍ଧ୍ୟାରେ ହଳଦୀ ପଡିଆ, ନୟାପଲ୍ଲୀ, ଡୁମଡୁମା, ଆଇଗିଣିଆ, ଘାଟିକିଆ, ମୋଚି ସାହି ଓ ହାଉସିଂଙ୍ଗ ବୋର୍ଡ ଅଞ୍ଚଳକୁ ଯାଇ ଶ୍ରୀମତୀ ଦାସ ସାଧାରଣ ଲୋକଙ୍କ ସହଯୋଗ ଓ ସମର୍ଥନ ଲୋଡିଛନ୍ତି ।
ଏହି ଅଭିଯାନରେ ବିଜେଡିର ବହୁ ନେତା, କର୍ମୀ ଓ ଜନ ସାଧାରଣ ସାମିଲ ହୋଇଥିଲେ ।