ନୂତନ ଭାବେ ସତୀଭଟା ଓ ସରାଇକେଲାରେ ଦୁଇଟି ମଣ୍ଡି ଉଦଘାଟିତ ।
ପଦ୍ମପୁର(ଶାସକପ୍ରଶାସକ)- ଖରିଫ ୠତୁର ଧାନ କିଣିବା ପାଇଁ ସରକାରଙ୍କ ତରଫରୁ ଆଜି ପଦ୍ମପୁର ଆରଏମସି ଅଧିନରେ ୭୪ ଗୋଟି ଧାନ ମଣ୍ଡି ଖୋଲିଛି । ପଦ୍ମପୁର ଆରଏମସି ମୁଖ୍ୟ ମାର୍କେଟରେ ପଦ୍ମପୁର ଉପଜିଲ୍ଲାପାଳ ତ୍ରିଲୋଚନ ପାତ୍ର, ପଦ୍ମପୁର ସହକାରୀ ଯୋଗାଣ ଅଧିକାରୀ ସନ୍ତୋଷ କୁମାର ପ୍ରଧାନ,ଆରଏମସି ସମ୍ପାଦକ ପ୍ରକାଶ ଦାଶ ଉପସ୍ଥିତ ରହି ଶୁଭାରମ୍ଭ କରିଥିଲେ । ସେହିପରି ପଦ୍ମପୁର ଅଞ୍ଚଳରେ ଦୁଇଗୋଟି ନୂତନ ଧାନ ମଣ୍ଡି ଆରମ୍ଭ କରାଯାଇଛି । କନସିଂହା ସମବାୟ ସମିତି ଅଧିନରେ ସତୀଭଟା ଠାରେ ଏବଂ ଲଖମରା ସମବାୟ ସମିତି ଅଧିନରେ ସରାଇକେଲା ଠାରେ ନୂତନ ଭାବେ ମଣ୍ଡି ଖୋଲା ଯାଇଛି । ଏହି ନୂତନ ମଣ୍ଡିକୁ ପଦ୍ମପୁର ଉପଜିଲ୍ଲାପାଳ ତ୍ରିଲୋଚନ ପାତ୍ର ଓ ସହକାରୀ ଯୋଗାଣ ଅଧିକାରୀ ସନ୍ତୋଷ କୁମାର ପ୍ରଧାନ ଉଦଘାଟନ କରିଥିଲେ । ଉଦଘାଟନ ସମୟରେ ଚାଷୀନେତା ରମେଶ ମହାପାତ୍ର, ଅଶୋକ ସାହୁ, ଦହିତ ସାହୁ,ମଳୟ ଭୋଇ,ଦେବରାଜ ସାହୁ, ଉସତ ସାହୁ,ଚିତ୍ତରଞ୍ଜନ ପାଣ୍ଡେ,ଅଶୋକ ପ୍ରଧାନ ସମେତ ଅନେକ ଚାଷୀ ଉପସ୍ଥିତ ଥିଲେ ।
