ପୁରୀ/ ଅନିମେଷ ପଟ୍ଟନାୟକ : ଛାତ ଉପରେ ମହାପ୍ରଭୁଙ୍କ ଘୋଷ ଯାତ୍ରା ଦେଖିବାକୁ ରୋକ ଲଗାଇଛି ପୁରୀ ପ୍ରଶାସନ । ଘରେ ରହି ଟିଭି ଜରିଆରେ ମହାପ୍ରଭୁଙ୍କ ରଥଯାତ୍ରା ଦେଖିବାକୁ ସରକାର କଟକଣା କରିଛନ୍ତି ।
ବଡ଼ଦାଣ୍ଡର ବଡଯାତ୍ରା ପାଇଁ ଶ୍ରୀକ୍ଷେତ୍ର ପ୍ରସ୍ତୁତ ହେଉଛି । ରଥ କାମ ଶେଷ ପର୍ଯ୍ୟାୟ ପ୍ରାୟ । ଦିନ କେଇଟା ପରେ ରଥଯାତ୍ରା । ବଡ଼ଦାଣ୍ଡରେ ଗଡ଼ିବ ତିନି ରଥ । ହେଲେ ଦର୍ଶନ କରିପାରିବେନି ବଡ଼ଦାଣ୍ଡ ବାସୀ । ବଡ଼ଦାଣ୍ଡରେ ରହିଥିବା କୋଠା ଉପରେ ରହିବ କଡ଼ା ନଜର । ୧୧ ତାରିଖରୁ ୧୩ ତାରିଖ ପର୍ଯ୍ୟନ୍ତ ବଡ଼ଦାଣ୍ଡରେ ୧୪୪ ଧାରା ଜାରି ରହିବ । ଘରେ ରହି ସମସ୍ତେ ଟିଭିରେ ରଥଯାତ୍ରାର ପ୍ରସାରଣ ଦେଖିପାରିବେ ।
ସେହିପରି ବଡ଼ଦାଣ୍ଡର ସମସ୍ତ ଲଜ ଓ ହୋଟେଲକୁ କଡ଼ାକଡ଼ି ଯାଞ୍ଚ କରାଯିବ ବୋଲି ପ୍ରଶାସନ ପକ୍ଷରୁ ନିଷ୍ପତି ନିଆଯାଇଛି । କୌଣସି ବାହାର ଲୋକ କି ଶ୍ରଦ୍ଧାଳୁଙ୍କୁ ରଖିପାରିବେନି ହୋଟେଲ କି ଲଜ । ନୀୟମର ଉଲ୍ଲଘଂନ ହେଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
