" ଯୋଗ୍ୟ ହିତାଧିକାରୀ ବାଦ ନପଡ଼ନ୍ତୁ, ଅଯୋଗ୍ୟଙ୍କୁ ସାମିଲ କରନ୍ତୁ ନାହିଁ"
ଭୁବନେଶ୍ୱର (ଶାସକ ପ୍ରଶାସକ) : ବାତ୍ୟା କ୍ଷୟକ୍ଷତି ଆକଳନ ବେଳେ କୌଣସି ଯୋଗ୍ୟ ବ୍ୟକ୍ତି ବାଦ ପଡିବା ଅବା ଅଯୋଗ୍ୟ ବ୍ୟକ୍ତି ସାମିଲ ହେବା ଭଳି ଘଟଣା ନ ଘଟେ ସେଥିପାଇଁ ସରକାରୀ ଅଧିକାରୀ, କର୍ମଚାରୀ ସର୍ବୋପରି ଲୋକମାନେ ସତର୍କ ରହିବାକୁ ଅପିଲ କରିଛନ୍ତି ରାଜ୍ୟ ସ୍ୱତନ୍ତ୍ର ରିଲିଫ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ ଜେନା |
ଏସଆରସି ତଥା ଏସିଏସ ଶ୍ରୀ ଜେନା ଆଜି ଟୁଇଟ କରି କହିଛନ୍ତି ଯେ, ରାଜ୍ୟ ଏସଆରସି ଗାଇଡଲାଇନ ଆଧାରରେ ସାଇକ୍ଲୋନ୍ ୟାସ୍ ଜନିତ କ୍ଷୟକ୍ଷତି ଆକଳନ କରିବାକୁ ନିର୍ଦ୍ଦେଶ ଦିଆଯାଇଛି | ଏଥିପାଇଁ ଆବଶ୍ୟକ ଅତିରିକ୍ତ ଅଧିକାରୀ ମାନଙ୍କୁ ମଧ୍ୟ ନିୟୋଜିତ କରାଯାଇଛି | କ୍ଷୟକ୍ଷତିର ଉଚିତ ମୂଲ୍ୟାଙ୍କନ ପାଇବାକୁ ଚେଷ୍ଟା କରାଯାଉଛି | ଏଥିରେ ସହଯୋଗ କରିବାକୁ ଲୋକମାନଙ୍କୁ ଅନୁରୋଧ କରାଯାଉଛି | କୌଣସି ଅଯୋଗ୍ୟ ଲୋକଙ୍କୁ ଅନ୍ତର୍ଭୂକ୍ତ କରାଯିବା ଉଚିତ୍ ନୁହେଁ | ଗରିବ ଏବଂ ପ୍ରଭାବିତ ଲୋକଙ୍କ ସଠିକ୍ ମୂଲ୍ୟାଙ୍କନ କରାଯିବା ଆବଶ୍ୟକ | କୌଣସି ଅଯୋଗ୍ୟ ବ୍ୟକ୍ତି ଅନ୍ତର୍ଭୂକ୍ତ ନହେବା ନିଶ୍ଚିତ କରିବାକୁ ଆମକୁ ଅଧିକ ସଚେତନ ଏବଂ ସଜାଗ ରହିବାକୁ ପଡିବ | ସର୍ବୋପରି କୌଣସି ଯୋଗ୍ୟ ବ୍ୟକ୍ତି ଯେମିତି ବାଦ ନପଡ଼ନ୍ତୁ | ଯେଉଁ ଲୋକଙ୍କର ପକ୍କା ଘର (ମୁଖ୍ୟ ଆବାସିକ ୟୁନିଟ୍) ଥିବ, ସେମାନେ ଯୋଗ୍ୟ ବିବେଚିତ ହେବେ ନାହିଁ | ଭ୍ରଷ୍ଟାଚାର ଅଭ୍ୟାସରୁ ରକ୍ଷା ପାଇବା ପାଇଁ ସମସ୍ତଙ୍କୁ ନିବେଦନ କରୁଛି | ଆମେ ଟିକେ ସତର୍କ ରହିଲେ ବା ଯତ୍ନବାନ ହେଲେ ନିଶ୍ଚିତ ଭାବେ ସଠିକ ଓ ଭଲ ପରିଣାମ ପାଇବା " |
