ନୂଆପଡା(ଅମିତ ପୁରୋହିତ) ; ନୂଆପଡା ଜିଲ୍ଲାରେ ନୂତନ ଜିଲ୍ଲାପାଳ ଭାବେ ସ୍ୱଦ୍ଧାଦେବ ସିଂ କାର୍ଯ୍ୟରେ ଯୋଗଦାନ କରିଛନ୍ତି । ଏହା ପୂର୍ବରୁ ମଧୁସ୍ମିତା ସାହୁ ଜିଲ୍ଲାପାଳ ଭାବେ କାର୍ଯ୍ୟରତ ଥିଲେ । ଶ୍ରୀମତୀ ସିଂ ମୟୁରଭଞ୍ଜ ଜିଲ୍ଲାରେ ଅତିରିକ୍ତ ଜିଲ୍ଲାପାଳ ଭାବେ କାର୍ଯ୍ୟରତ ଥିଲେ । କାର୍ଯ୍ୟରେ ଯୋଗଦାନ କରି ସେ ସମସ୍ତ ବିଭାଗୀୟ ଅଧିକାରୀଙ୍କ ସହ ଜିଲ୍ଲାର ବିଭିନ୍ନ ସମସ୍ୟା ଉପରେ ଆଲୋଚନା କରିଥିଲେ । ପରେ କୋଭିଡ ହସପିଟାଲ ଓ ବିଭିନ୍ନ ସଂଗରୋଧ କେନ୍ଦ୍ର ଗୁଡିକ ପରିଦର୍ଶନ କରିଥିଲେ । ନୂଆପଡା ଜିଲ୍ଲାରେ ଦିନକୁ ଦିନ ବଢୁଥିବା କରୋନା ସଂକ୍ରମଣ ତଥା ପୋଲିସ ଓ ସ୍ୱାସ୍ଥ୍ୟକର୍ମୀ ଙ୍କ ମୃତ୍ୟୁକୁ ଆଖି ଆଗରେ ରଖି ଜନ ସାଧାରଣ ତଥା ଜନ ପ୍ରତିନିଧିଙ୍କ ସହଯୋଗରେ ନିଶ୍ଚିତ ରୂପେ ଜିଲ୍ଲାକୁ କରୋନା ମୁକ୍ତ କରିବା ପାଇଁ ପ୍ରାଥମିକତା ଦେବି ବୋଲି ଶ୍ରୀମତୀ ସିଂ କହିଛନ୍ତି । ଏଥି ସହ ଜିଲ୍ଲାରେ ଦାଦନ ସମସ୍ୟାର ମୁଳୋତ୍ପାଟନ କରି ବା ଏହି ବ୍ୟବସ୍ଥାକୁ ନିରୁତ୍ସାହିତ କରିବା ପାଇଁ ଜନସାଧାରଣଙ୍କୁ ବିଭିନ୍ନ ସରକାରୀ ଯୋଜନାରେ ସାମିଲ କରି ସ୍ୱାବଲମ୍ବି କରିବା ପାଇଁ ଚେଷ୍ଟିତ ରହିବି ବୋଲି କହିଛନ୍ତି ଜିଲ୍ଲାପାଳ ଶ୍ରୀମତୀ ସିଂ ।
