ବଡ଼ବିଲ (ଶାସକ ପ୍ରଶାସକ) ବଡ଼ବିଲ ରେଞ୍ଜ୍ ଅଧିନସ୍ଥ  ସାନ୍ତବାହାଳ ଅଂଚଳରୁ ଚୋରା ପିଆଶାଳ କାଠ ବୋଝେଇ ଏକ ଟାଟା ଏସ୍ ଗାଡ଼ିକୁ ବନ ବିଭାଗ ଜବତ୍ କରିଥିବା ଜଣାପଡ଼ିଛି। ତେବେ  ଗାଡ଼ିକୁ ଛାଡ଼ି ଡ୍ରାଇଭର ଘଟଣାସ୍ଥଳରୁ  ଫେରାର ହୋଇଯାଇଛି। ଖବରରୁ ପ୍ରକାଶ ଯେ  ଓଡି-୦୯-୦୭୯୪ ଟାଟା ଏସ୍ ଗାଡ଼ିରେ ସାଇଜ୍ ପିଆଶାଳ ପଟା ଚୋରାଚାଲାଣ ହେଉଥିବା ନିର୍ଭରଯୋଗ୍ୟ ସୁତ୍ରରୁ ଖବରପାଇବା ପରେ ବନବିଭାଗ ପକ୍ଷରୁ ଗତକାଲି ଚଢ଼ଉ କରାଯାଇଥିଲା। ତେବେ ଗାଡ଼ିକୁ ଛାଡ଼ିଦେଇ ଡ୍ରାଇଭର ସେଠାରୁ ଛୁ ମାରିଥିଲା ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି । ଜବତ୍ ଗାଡ଼ିଟି ମହମ୍ମଦ୍ ଆକବରଙ୍କ ନାଁରେ ରହିଥିବା ବେଳେ ଏନେଇ ଅଧିକ ତଦନ୍ତ ଚାଲିଛି ଓ ଅଭିଯୁକ୍ତଙ୍କୁ ଧରାଯିବ ବୋଲି ବଡ଼ବିଲ ଫରେଷ୍ଟର ସୂଚନା ଦେଇଛନ୍ତି । ବଡ଼ବିଲ ସାନ୍ତବାହାଳ ଅଂଚଳରୁ ବାରମ୍ବାର ଚୋରା କାଠ ଚାଲାଣ ହେଉଥିବା ବେଳେ ବନବିଭାଗ କାଠ ଜବତ୍ କରୁଛି ସତ ହେଲେ ଅଭିଯୁକ୍ତମାନେ ଧରା ନ ପଡ଼ିବା ସାଧାରଣରେ ସନ୍ଦେହ ସୃଷ୍ଟି କରିଛି। ସେହିପରି ନିକଟବର୍ତ୍ତୀ ଜଙ୍ଗଲରୁ ପ୍ରତିଦିନ ଜାଳେଣି ନିମନ୍ତେ ଗଛ କଟାଯାଇ ଚାଲାଣ ହେଉଥିବା ସମୟରେ ସ୍ଥାନୀୟ କିଛି ସମାଜସେବୀ ଲୋକଙ୍କୁ ଗଛ ନ କାଟିବା ନିମନ୍ତେ ବୁଝାଉଥିବା ବେଳେ ବନବିଭାଗ ନିଷ୍କ୍ରିୟ ଥିବା ମନେ ହେଉଛି।