ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଦେଶରେ ମାରାତ୍ମକ କରୋନା ଭୁତାଣୁ ସଂକ୍ରମଣ କମିବାର ନା ନେଉନି । ଦିନକୁ ଦିନ ଏହା ବଢ଼ିବାରେ ଲାଗିଛି ।
ଏଥିନେଇ ସରକାରଙ୍କ ପକ୍ଷରୁ ୩ୟ ପର୍ଯ୍ୟାୟ ଲକ୍ ଡାଉନ୍ ଚାଲିଥିବା ବେଳେ ଅନେକ ସାବଧାନତା ଓ ନିଷେଧକୁ କୋହଳ କରାଯାଇଛି । ହେଲେ ମଧ୍ୟ ରାଜ୍ୟ ବାହାରେ ଥିବା ପ୍ରବାସୀ ଓଡ଼ିଆ ନିଜ ଭିଟାମାଟିକୁ ବିଭିନ୍ନ ଉପାୟରେ ଫେରୁଛନ୍ତି ।
ଏତଦ୍ ବ୍ୟତୀତ ଗଜପତି ଜିଲ୍ଲାର ପଡୋଶୀରେ ଥିବା ଆନ୍ଧ୍ରର ଶ୍ରୀକାକୁଲମ ଜିଲ୍ଲାରେ ମଧ୍ୟ କିଛିଟା ପଜିଟିଭ ଥିଲା ଏବଂ ଗଞ୍ଜାମ ଜିଲ୍ଲାରେ ଅନେକ ପଜିଟିଭ ପୋଜିଟିଭ ଚିହ୍ନଟ ହେଲେଣି । ଏ ସବୁକୁ ଦୃଷ୍ଟିରେ ରଖି ଗଜପତି ଜିଲ୍ଲା ପୋଲିସ ପ୍ରଶାସନ ପକ୍ଷରୁ ବାହାରୁ ଗଜପତି ଜିଲ୍ଲାକୁ ଆସୁଥିବା ୧୯ ଗୋଟି ପ୍ରବେଶ ପଥକୁ ସିଲ କରିଦିଆଯିବା ସହ ନାକାବନ୍ଦୀ ଗେଟ ଲଗାଇ ପୋଲିସ ପହରାକୁ ଜୋରଦାର କରାଯାଇଛି ।
ବାହାର ରାଜ୍ୟରୁ ଗଜପତି ଜିଲ୍ଲାକୁ ଆସିବା ପାଇଁ ସରକାରଙ୍କ ପକ୍ଷରୁ ଗଞ୍ଜାମ ଜିଲ୍ଲାର ଗିରିଶୋଲା ଓ ରାୟଗଡା ଜିଲ୍ଲାର କେରେଡା ସ୍ଥିତ ନାକା ଗେଟ ଦେଇ ଆସିବାକୁ ସରକାରୀ ବିଜ୍ଞପ୍ତି ପ୍ରକାଶ ପାଇଥିଲେ ହେଁ ଅନେକେ ବିଭିନ୍ନ ଉପାୟରେ ଚାଲି ଚାଲି , ସାଇକଲ ଓ ଅନ୍ୟାନ୍ୟ ଉପାୟରେ ବିଭିନ୍ନ ସମୟରେ ଲୁଚିଛପି ଆସୁଛନ୍ତି ଏବଂ ପ୍ରବେଶ କରିବାକୁ ଚେଷ୍ଟା କରୁଛନ୍ତି ।
ଏଭଳି ଆସୁଥିବା ଲୋକଙ୍କୁ ପୋଲିସ ଧରି ସେମାନଙ୍କ ଟିକିନିଖି ତଥ୍ୟ ସଂଗ୍ରହ କରି ପଞ୍ଜିକରଣ କରୁଛି । ।
ପୋଲିସ କହିବା ପ୍ରକାରେ ଏ ପର୍ଯ୍ୟନ୍ତ ବାହାର ରାଜ୍ୟ ଆନ୍ଧ୍ରରୁ ୬୦୯ ଜଣ , ତେଲେଙ୍ଗାନାରୁ ପାଖାପାଖି ୩୦୦ ଜଣ ଏବଂ ତାମିଲନାଡୁରୁ ୨୨୯ ଜଣ ବିଭିନ୍ନ ଉପାୟରେ ଆସିଲେଣି । ସେମାନଙ୍କୁ ନାକା ପଏଣ୍ଟ ପାଖରେ ହିଁ ସମସ୍ତ ଯାଞ୍ଚ କାରାଯାଇ ଖାଇବା ପିଇବା ସମେତ ସମସ୍ତ ବ୍ୟବସ୍ଥା କରାଯାଇ ସରକାରୀ ଗାଇଡ଼ ଲାଇନ ପ୍ରକାରେ ସେମାନଙ୍କୁ , ସେମାନଙ୍କ ଗନ୍ତବ୍ୟ ତଥା ଯଥା ସ୍ଥାନରେ ଛଡା ଯାଉଛି ଏବଂ ସେଠାରେ କ୍ବାରେଣ୍ଟାଇନରେ ରଖାଯାଉଛି ବୋଲି ଗଜପତି ଜିଲ୍ଲା ଆରକ୍ଷୀ ଅଧିକ୍ଷକ ସାରା ଶର୍ମା କହିଛନ୍ତି ।
