କିଡନି ରୋଗରେ ଆକ୍ରାନ୍ତ ବାପାଙ୍କୁ ବଂଚାଇବା ପାଇଁ ଦୁଇ ନାବାଳକର ସଂଘର୍ଷ ।
ପଦ୍ମପୁର(ଶାସକ ପ୍ରଶାସକ)- ସବୁ ଦୁଃଖେ କଷ୍ଟେ ଠିକ ଠକ ଚାଲିଥିଲା | ଦୁଇ ପୁଅ ଓ ସ୍ତ୍ରୀ କୁ ନେଇ ହସଖୁସିରେ ଚଳାଇଥିଲେ ସଂସାର ପଦ୍ମପୁର ଉପଖଣ୍ଡ ସର୍ଗିବାହାଲ ଗ୍ରାମର ସାଗର ମେହେର । ପାଖରେ ଜମିବାଡି ନଥିଲେ ହେଁ କୌଲିକ ବୃତି ଲୁଗା କାମ କରି ବେଶ ସୁରୁଖୁରୁରେ ଗୁଜୁରାଣ ମେଣ୍ଟାଇନେଉଥିଲେ | ହେଲେ କାହା ନଜର ପଡିଲା କେଜାଣି, ଆସିଲା ଅଦିନ ଝଡ | ପରିବାରର ଖୁସି ଟିକକ ସେ ଝଡ଼ରେ ଉଡେଇ ନେଇଗଲା | ଦୁଇ ବର୍ଷ ତଳେ ଜଣାପଡିଲା ତାଙ୍କୁ(ସାଗରଂକୁ) କିଡିନି ରୋଗ ହୋଇଛି | ତାହା ପୁଣି ପ୍ରାଥମିକ ଅବସ୍ଥା ନୁହଁ, ସେ ଏହି ରୋଗରେ ୭୦ ପ୍ରତିଶତ ଆକ୍ରାନ୍ତ ହୋଇଥିବା ଡାକ୍ତରଙ୍କ ଠାରୁ ଜାଣିବା ପରେ ନିଜକୁ ବଂଚାଇବା ପାଇଁ ସେ ପ୍ରୟାସ ଆରମ୍ଭ କରିଥିଲେ । ନିଜ ପାଖରେ ଥିବା ଟଙ୍କ ଖର୍ଚ୍ଚ କରି ଭୂବନେଶ୍ୱର ଠାରେ ଚିକିତ୍ସିତ ହୋଇଥିଲେ । ସମସ୍ତ ଟଙ୍କ ଖର୍ଚ୍ଚ ହେବା ପରେ ମଧ୍ୟ ସେ ଠିକ ହୋଇନଥିଲେ | ତାଙ୍କର ଗହଣାଗାଣ୍ଠି ବିକ୍ରି କରିବା ସହ ବନ୍ଧୁବାନ୍ଧବଙ୍କ ଠାରୁ ଧାର କରଜ କରି ଭୁବନେଶ୍ୱର ତଥା ବୁର୍ଲା ମେଡିକାଲରେ ଚିକିତ୍ସିତ ହୋଇ ତଲିତଲାନ୍ତ ହେଲେଣି । ଅପର ପକ୍ଷରେ ସାଗରଙ୍କ ପତ୍ନୀ ଜଣେ ମାନସିକ ରୋଗୀ । ବାପାଙ୍କ ବେମାରୀକୁ, ମା ବି ରୋଗୀଣା | ପରିବାରର ଦୁଇ ଜଣ ରୋଗ ଗ୍ରସ୍ଥ ହେବା ପରେ ସମସ୍ତ ବୋଝ ଏବେ ତାଙ୍କ ଦୁଇ ନାବାଳକ ପୁଅ ମୁଣ୍ଡରେ । ତେଣୁ ତାଙ୍କର ଦୁଇ ପୁଅ ପାଠ ପଢା ଛାଡି ପରିବାର ପୋଷଣ ତଥା ତାଙ୍କୁ ଚିକିତ୍ସିତ କରାଇବା ପାଇଁ ଲାଗି ପଡିଛନ୍ତି । ବଡ ପୁଅ ଗଜାନନ ଅଷ୍ଟମ ଶ୍ରେଣୀ ପରେ ପାଠ ପଢା ଛାଡି କୌଳିକ ବୃତ୍ତି ଲୁଗା ବୁଣା କାମକରି ପରିବାରକୁ ବଂଚାଇବାକୁ ଚେଷ୍ଟା କରୁଛି । ହେଲେ ତାର ଏହି ସ୍ୱଳ୍ପ ଆୟ କିଡନି ରୋଗ ପରି ମାରାତ୍ମକ ରୋଗର ଚିକିତ୍ସା ପାଇଁ ସମୁଦ୍ରକୁ ଶଂଖେ ପାଣି ସଦୃଶ ହେଉଛି । ତେଣୁ ପରିବାର ଏବେ ସରକାରଙ୍କ ଠାରୁ ସାହାଯ୍ୟକୁ ଚାହିଁ ବସିଛନ୍ତି |ନ୍ତି । ସାଗର ମେହେର ଜଣ ପିଛା ଚାଉଲ ବ୍ୟତୀତ କୌଣସି ସରକାରୀ ସହାୟତା ପାଉନାହାନ୍ତି ।
ସାଗରଙ୍କ ସ୍ତ୍ରୀ କମଳା ମାନସିକ ରୋଗଗ୍ରସ୍ଥ ଥିବା ହେତୁ ପରିବାର ସମ୍ଭାଲିବା ପାଇଁ ସାନ ପୁଅ ପ୍ରେମାନନ୍ଦ ମଧ୍ୟ ଅଂଟା ଭିଡିଛି । ସେ କୋମଳ ବୟସର ପାଠ ପଢା ଛାଡି ଘରର ରୋଷେଇ ବାସ କରିବା ସହିତ ବାପା ମାଁର ସେବା ଶୁଶ୍ରୁଷା କରୁଛି । ଯେଉଁ ବୟସରେ ହାତରେ ଖାତା କଲମ ଥିବା କଥା ସେ ବୟସରେ ସେ ନିଜ ପରିବାରକୁ ଦୁଇ ମୁଠା ଦୁଇ ଓଲି ଖାଇବାକୁ ଦେବାପାଇଁ ହଣ୍ଡା ଧରିବାକୁ ବାଧ୍ୟ ହୋଇଛି । ମନରେ ପାଠ ପଢିବାର ଇଚ୍ଛା ଥିଲେ ହେଁ ସାଂସାରିକ ଜଂଜାଲ ପ୍ରତିବନ୍ଧକ ସାଜିଛି । ଗରିବ ପରିବାରରେ ଯେତେବେଲେ ରୋଗ ଗ୍ରାସ କରିଥାଏ ପରିବାରର ମେରୁଦଣ୍ଡ ଭାଙ୍ଗିଯାଇଥାଏ,ଭାଙ୍ଗି ଯାଏ ତାର ସ୍ୱପ୍ନ ଏବଂ ତାର କୋମଲମତି ଶିଶୁ ମାନଙ୍କ ସ୍ୱପ୍ନ। ତେଣୁ ସରକାର ଏହି ପରିବାରକୁ ସହେଯାଗ କରିବା ନିତାନ୍ତ ଜରୁରୀ ହୋଇ ପଡଛି ।
ଏ ବିଷୟରେ ପଦ୍ମପୁର ଉପଜିଲ୍ଲାପାଳ ଆମେ ତନ୍ମୟ କୁମାର ଦରୱାନଙ୍କୁ ଅବଗତ କରାଇବା ପରେ ସେ ସାଗର ମେହେରଙ୍କ ଚିକିତ୍ସାପାଇଁ ସମସ୍ତ ପ୍ରକାର ସରକାରୀ ସହାୟତା ଯୋଗାଇଦେବେ ବୋଲି ପ୍ରତିଶୃତି ଦେଇଛନ୍ତି । ସାଗର ମେହେରଙ୍କୁ ଯଥାଶୀଘ୍ର ସରକାରୀ ସହାୟତା ପ୍ରଦାନ କରାଗଲେ ତାଙ୍କ ଜୀବନ ବଂଚିଯିବ ବୋଲି ସ୍ଥାନୀୟ ଜନସାଧାରଣ ଦାବି କରିଛନ୍ତି ।
