ବେଗୁନିଆ ପଲିଟିକ୍ସ : ଅନୁ ଇନ, ଋଷଭ ଆଉଟ
ଭୁବନେଶ୍ୱର : ଅନୁସୂୟା ଦାଶ ଚୌଧୁରୀ ଓରଫ ଅଭିନେତ୍ରୀ ଅନୁ ଚୌଧୁରୀଙ୍କୁ ନୂଆ ଭୂମିକାରେ ଦେଖିବାକୁ ମିଳିବ | ସିନେମା ମୈଦାନରେ ବେଶ କିଛି ଦିନ ରାଜ କରିବା ପରେ ଗତ କିଛି ବର୍ଷ ହେଲା ରାଜନୀତିରେ ସେ ସକ୍ରିୟ ରହିଛନ୍ତି | ଯଦିଓ ସେମିତି ଆଖିଦୃଶିଆ ପଦ ପଦବୀରେ ନାହାନ୍ତି, ତଥାପି ବିଜେପିର ପ୍ରଚାର ଟିମର ସେ ଥିଲେ ଆକ୍ଟିଭ ମେମ୍ବର | ଏବେ ସାଂସଦ ଅପରାଜିତା ଷଡ଼ଙ୍ଗୀ ତାଙ୍କୁ ନେଇଛନ୍ତି ଭରସାକୁ | ଦେଇଛନ୍ତି ନୂତନ ତଥା ଗୁରୁତ୍ୱପୂର୍ଣ ଦାୟିତ୍ୱ | ଅନୁ ଏଣିକି ବେଗୁନିଆ ନିର୍ବାଚନ ମଣ୍ଡଳୀରୁ ସାଂସଦ ଅପରାଜିତାଙ୍କ ପ୍ରତିନିଧି ଭାବେ କାର୍ଯ୍ୟ କରିବେ ବୋଲି ଅପରାଜିତା ଖୋର୍ଦ୍ଧା ଜିଲ୍ଲାପାଳଙ୍କୁ ଚିଠି ଲେଖି ଜଣାଇଛନ୍ତି |
ବେଗୁନିଆରୁ ୨୦୧୯ ବିଧାନସଭା ନିର୍ବାଚନରେ ବିଧାୟକ ପ୍ରାର୍ଥୀ ଭାବେ ଲଢ଼ିଥିବା ଋଷଭ ନନ୍ଦଙ୍କୁ ବେଗୁନିଆ ନିର୍ବାଚନ ମଣ୍ଡଳୀରେ ସଂସଦ ପ୍ରତିନିଧି ଥିଲେ | ହେଲେ ହଠାତ କଣ ହେଲା କେଜାଣି, ଋଷଭଙ୍କ ସ୍ଥାନରେ ଅନୁଙ୍କୁ ଏହି ନୂଆ ଦାୟିତ୍ୱ ମିଳିଛି |ବିଜେପିରେ ପରିବର୍ତ୍ତିତ ସମୀକରଣ ପରିପ୍ରେକ୍ଷୀରେ ଅପରାଜିତା କିଛି ମହତ ଉଦ୍ଦେଶ୍ୟ ରଖି ଋଷଭଙ୍କ ସ୍ଥାନରେ ଅନୁଙ୍କ ନେଇଥାଇପାରନ୍ତି | ବେଗୁନିଆ-ବୋଲଗଡ ନିର୍ବାଚନମଣ୍ଡଳୀ ଅଧୀନରେ ଯେକୌଣସି କାର୍ଯ୍ୟକ୍ରମ ବା ବୈଠକରେ ଭୁବନେଶ୍ୱର ସାଂସଦଙ୍କ ପ୍ରତିନିଧି ଭାବରେ ଅନୁ ଚୌଧୁରୀ ଯୋଗ ଦେବେ ବୋଲି ଜିଲ୍ଲାପାଳଙ୍କୁ ଲେଖାଯାଇଥିବା ଚିଠିରେ ଉଲ୍ଲେଖ ରହିଛି |
ସଂସଦ ଶ୍ରୀମତୀ ଷଢଙ୍ଗୀ ଏକ ଟୁଇଟ ମାଧ୍ୟମରେ ଅନୁଙ୍କ ଶୁଭେଚ୍ଛା ଜଣାଇବା ସହ ତାଙ୍କ ଉପରେ ଗଭୀର ଆସ୍ଥା ପ୍ରକଟ କରିଛନ୍ତି | ଏହାର ଉତ୍ତରରେ ବି ଅନୁ ଅପରାଜିତାଙ୍କୁ କୃତଜ୍ଞତା ଜଣାଇବା ସହ ତାଙ୍କୁ ଜଣେ ସାମ୍ନାରୁ ମୋର୍ଚାର ନେତୃତ୍ୱ ନେଉଥିବା ଜଣେ ପ୍ରେରଣାଦାୟୀ ନେତ୍ରୀ ଭାବେ ଅଭିହିତ କରିଛନ୍ତି | ବେଗୁନିଆ ବାସୀଙ୍କ ସେବା କରିବା ପାଇଁ ସୁଯୋଗ ପାଇଥିବା ଯୋଗୁ ସେ ନିଜକୁ ଧନ୍ୟ ମାନେ କରୁଛନ୍ତି ବୋଲି ଉଲ୍ଲେଖ କରିଛନ୍ତି ଅନୁସୂୟା |
