ଭଦ୍ରକ(ସତ୍ୟ ଭୂଷଣ ସ୍ୱାମୀ ) : ଚଳିତ ସିଜିନ ଓଡିଶା ୨୩ ବର୍ଷରୁ କମ୍ କ୍ରିକେଟ ଦଳ ନଭେମ୍ବର ୨ରୁ ଅଭିଯାନ ଆରମ୍ଭ କରୁଛି । କଟକର ରେଭେନ୍ସା ବିଶ୍ୱବିଦ୍ୟାଳୟ ଗ୍ରାଉଣ୍ଡରେ ନଭେମ୍ବର ୨ରୁ ୫ ପର୍ଯ୍ୟନ୍ତ ଏହି ଚାରି ଦିନିଆ ମ୍ୟାଚ ଖେଳାଯିବ । ଏଥି ନିମନ୍ତେ ଘୋଷିତ ଓଡିଶା ଦଳରେ ଭଦ୍ରକ ଜିଲ୍ଲାରୁ କ୍ଷମା ସାଗର ବଳ ସ୍ଥାନ ପାଇଛନ୍ତି । ଶ୍ରୀ ବଳ ପୂର୍ବରୁ ୧୬ ବର୍ଷରୁ କମ୍ ଓ ୧୯ ବର୍ଷରୁ କମ୍ ଓଡିଶା ଦଳରେ ସ୍ଥାନ ପାଇଥିଲେ । ସେ ପ୍ରଥମ ଥର ପାଇଁ ୨୩ ବର୍ଷରୁ କମ୍ ଦଳରେ ସ୍ଥାନ ପାଇଛନ୍ତି । ସେ ଏକାଡେମୀ ଅଫ୍ ଭଦ୍ରକ କ୍ରିକେଟରେ ଅଭ୍ୟାସ କରୁଥିବା ବେଳେ ଜଗନ୍ନାଥପୁର କ୍ରିକେଟ କ୍ଲବର ସେ ଜଣେ ନିୟମିତ ଖେଳାଳି । ସେ ଭଦ୍ରକ ହାଉସିଂ ବୋର୍ଡ କଲୋନୀ ବାସିନ୍ଦା ବାପା ସୋମନାଥ ବଳ ଓ ମାତା ଜ୍ୟୋତ୍ସ୍ନାରାଣି ବଳଙ୍କ ସୁପୁତ୍ର । ତାଙ୍କର ଏହି ଚୟନରେ କୋଚ ପୂର୍ଣ୍ଣେନ୍ଦୁ ଜେନା, ଜଗନ୍ନାଥପୁର କ୍ରିକେଟ କ୍ଳବର କୋଚ ମନୋଜ ସାହୁ, ଭଦ୍ରକ ଜିଲ୍ଲା ଆଥ୍ଲେଟିକ ଆସୋସିଏସନର ସଂପାଦକ ଧିରେନ ପଲେଇ ଓ ଭଦ୍ରକ ଜିଲ୍ଲା କ୍ରିକେଟ ଆସୋସିଏସନର ସମ୍ପାଦକ ଉପେନ୍ଦ୍ର ବାରିକ ଶୁଭେଚ୍ଛା ଜଣାଇ ତାଙ୍କର ସଫଳତା କାମନା କରିଛନ୍ତି ।