ଢେଙ୍କାନାଳ: ଚିକାଗୋ ବିଶ୍ୱବିଦ୍ୟାଳୟର ଏୟାର କ୍ୱାଲିଟି ଲାଇଫ ଇଣ୍ଡେକ୍ସ ବା AQLI ତଥ୍ୟ ଅନୁସାରେ ବିଶ୍ୱ ସ୍ୱାସ୍ଥ୍ୟ ସଂଗଠନର ସୁସ୍ଥ ବାୟୁ ମାନକ ପାଳନ କରାଯାଇ ପାରିଲେ ଢେଙ୍କାନାଳର ଅଧିବାସୀ ମାନଙ୍କ ହାରାହାରି ପରମାୟୁ ଦୁଇ ବର୍ଷ ନଅ ମାସ ବୃଦ୍ଧି କରାଯାଇ ପାରନ୍ତା। ପ୍ରଦୂଷଣ ରୋକିବା ଲାଗି ସମସ୍ତଙ୍କ ସହଯୋଗ ଲୋଡ଼ା ବୋଲି ଢେଙ୍କାନାଳ ସ୍ଥିତ ଭାରତୀୟ ଜନ ସଞ୍ଚାର ସଂସ୍ଥାନ (ଆଇଆଇଏମସି)ରେ ଚିକାଗୋବିଶ୍ୱବିଦ୍ୟାଳୟସ୍ଥିତ ଏନର୍ଜି ପଲିସି ଇନଷ୍ଟିଚ୍ୟୁଟ୍ (ଏପିକ୍)ର ମିଳିତ ସହଯୋଗରେ ‘ବାୟୁ ପ୍ରଦୂଷଣ ଆମ ଆୟୁଷକୁ କମାଉଛି କି?’ ଶୀର୍ଷକ କର୍ମଶାଳାରେ ମତ ପ୍ରକାଶ ପାଇଛି । କର୍ମଶାଳାରେ ଯୋଗ ଦେଇ ଢେଙ୍କାନାଳ ଉପଜିଲ୍ଲାପାଳ ଭବେଶ କୁମାର ନାୟକ କହିଥିଲେ,ବାୟୁ ପ୍ରଦୂଷଣ ରୋକିବାକୁ ସରକାରୀ ସ୍ତରରେ ବିଭିନ୍ନ ପଦକ୍ଷେପ ନିଆଯାଉଛି । ତେବେ ଏନେଇ ଲୋକେ ସଚେତନ ହେବା ଜରୁରୀ । ତୃଣମୂଳ ସ୍ତରରେ ସମସ୍ତେ ସହଯୋଗ କରିବା ଲୋଡ଼ା । ଏହାସହ ଇ-ଯାନର ଅଧିକ ପ୍ରଚଳନ ତଥା ଅଧିକରୁ ଅଧିକ ସାଇକେଲ ବ୍ୟବହାର ଉପରେ ଲୋକେ ଗୁରୁତ୍ୱ ଦେବା ଆବଶ୍ୟକ ।
ଅନ୍ୟତମ ବକ୍ତାଭାବେ ଯୋଗଦେଇ ଏନଏଏମଆଇ ଅନୁଷ୍ଠାନର ସମ୍ପାଦକ ନିରଦ ନନ୍ଦ କହିଛନ୍ତି, କିଛି ବର୍ଷ ପୂର୍ବରୁ କେବଳ ଅଭିଧାନ ବ୍ୟତୀତ ବାୟୁ ପ୍ରଦୂଷଣ ବୋଲି କୌଣସି ଶବ୍ଦ ବ୍ୟବହାର ହେଉନଥିଲା । ହେଲେ ବର୍ତ୍ତମାନ ପୂରା ସ୍ଥିତି ବଦଳିଯାଇଛି । ସେ ମେକ୍ସିକୋର ଉଦାହରଣ ଦେଇ କହିଛନ୍ତି, ୧୯୭୦ ବେଳକୁ ମେକ୍ସିକୋରେ ବାୟୁ ପ୍ରଦୂଷଣ ସମସ୍ୟାକୁ ସେଠାକାର ପ୍ରଶାସନ ଭଲ ଭାବେ ଅନୁଭବ କରିଥିଲା । ଆଉ ସଙ୍ଗେସଙ୍ଗେ ଏଥିପାଇଁ କିଛି ଯୋଜନା କରିଥିଲା । ଫଳସ୍ୱରୂପ ଏତେ ବଡ଼ ସହରରେ ବି ସେଠାରେ ଏବେ ବାୟୁ ପ୍ରଦୂଷଣ ନିୟନ୍ତ୍ରଣାଧୀନ ରହିଛି ।
ବରିଷ୍ଠ ସାମ୍ବାଦିକ ସନ୍ଦିପ ସାହୁ କହିଥିଲେ ଯେ , ଢେଙ୍କାନାଳର ପ୍ରଦୂଷଣ ମୁଖ୍ୟତଃ କୋଇଲା ଜନିତ ଏବଂ ବାୟୁ ପ୍ରଦୂଷଣ ଉପରେ ଅଧିକାଂଶ ଲୋକଙ୍କ ଆଦୌ ଧାରଣା ନାହିଁ କହିଲେ ଭୁଲ ହେବନି । ଏନେଇ ଲୋକେ ସଚେତନ ମଧ୍ୟ ନୁହନ୍ତି । ଗଣମାଧ୍ୟମ ଏଦିଗରେ ସଚେତନତା ବୃଦ୍ଧି କ୍ଷେତ୍ରରେ ଏକ ଗୁରୁ ଦାୟିତ୍ୱ ଅଛି ବୋଲି ସେ ମତ ଦେଇ ଖବରକାଗଜ, ଟେଲିଭିଜନ, ନ୍ୟୁଜ୍ପୋୂର୍ଟାଲ୍ ଆଦି ସବୁ ମାଧ୍ୟମରେ ଏ ସମ୍ପର୍କିତ ତଥ୍ୟଭିତ୍ତିକ ଓ ସଚେତନଧର୍ମୀ ଖବର ପରିବେଷଣ ହୋଇ ତୃଣମୂଳସ୍ତରର ଲୋକଙ୍କ ପାଖରେ ପହଞ୍ଚିବା ଉପରେ ସେ ଗୁରୁତ୍ୱ ଦେଇଥିଲେ ।
ଓଡ଼ିଶା ମେଡିକାଲ୍ ସର୍ଭିସ୍ ଆସୋସିଏସନ ଢେଙ୍କାନାଳ ଚାପ୍ଟରର ମୁଖ୍ୟ ଡ. ଜଗଦାନନ୍ଦ ତ୍ରିପାଠୀ କହିଥିଲେ, ବାୟୁ ପ୍ରଦୂଷଣ ଯୋଗୁଁ ଲୋକେ ବିଭିନ୍ନ ରୋଗର ସମ୍ମୁଖୀନ ହେଉଛନ୍ତି ।ମୁଖ୍ୟତଃ ଶ୍ୱାସକ୍ରିୟା ସମ୍ପର୍କିତ ରୋଗ ଗୁଡିକ ବିଗତ କିଛି ବର୍ଷରେ ଯାଇଛି। ବାୟୁ ପ୍ରଦୂଷଣ ଓ ହାରାହାରି ପରମାୟୁ ଭିତରେ ନକାରାତ୍ମକ ସମ୍ପର୍କ ରହିଛି।ବାୟୁ ପ୍ରଦୂଷଣ ଯେତେ ବଢିବ ଲୋକଙ୍କ ହାରାହାରି ପରମାୟୁ ସେତେ ହ୍ରାସ ପାଇବ ବୋଲି ସେ ମତ ଦେଇଥିଲେ।
କର୍ମଶାଳା ଆରମ୍ଭରେ ସଂସ୍ଥାନର ଆଞ୍ଚଳିକ ନିର୍ଦ୍ଦେଶକ ଡ. ମୃଣାଳ ଚାଟାର୍ଜୀ କହିଥିଲେ, ବାୟୁ ପ୍ରଦୂଷଣ ଏକ କାଳ୍ପନିକ ପ୍ରସଙ୍ଗ ନୁହେଁ । ସାରା ବିଶ୍ୱରେ ଏହା ବର୍ତ୍ତମାନ ସମୟରେ ସବୁଠୁଁ ଅଧିକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ।ତେବେ ବାୟୁ ପ୍ରଦୂଷଣ କ୍ଷେତ୍ରରେ ଭାରତର ସ୍ଥିତି ବେଶ୍ ସଙ୍ଗିନ୍ । ନିକଟରେ ପ୍ରକାଶିତ ଏକ ରିପୋର୍ଟ ଅନୁସାରେ ବିଶ୍ୱର ୧୫ଟି ପ୍ରଦୂଷିତ ସହର ମଧ୍ୟରୁ ଭାରତର ୧୪ଟି ସହର ରହିଛି।ସେହିଭଳି ନୂଆଦିଲ୍ଲୀ ସବୁଠୁଁ ଅଧିକ ପ୍ରଦୂଷିତ ସହର ଭାବେ ପରିଗଣିତ ହୋଇଛି । ଓଡ଼ିଶାର ଛଅ ଗୋଟି ସହରରେ ବାୟୁ ପ୍ରଦୂଷଣ ଏବେ ମାରାତ୍ମକ ଅବସ୍ଥାରେ ପହଂଚିଛି।ସେଗୁଡିକ ହେଲେ କଟକ, ଭୁବନେଶ୍ୱର, ରାଉରକେଲା, ବାଲେଶ୍ୱର, ଅନୁଗୁଳ ଏବଂ ତାଳଚେର।କେବଳ ସରକାରୀ ସ୍ତରରେ ନୀତି ନିୟମ କରିଦେଲେ ହେବନି ସାମୂହିକ ତଥା ବ୍ୟକ୍ତିଗତ ଭାବେ ଆମକୁ ଏନେଇ ପ୍ରଚେଷ୍ଟା କରିବାକୁ ହେବ ବୋଲି ସେ କହିଛନ୍ତି ।
ଏହାସହ ଏପିକ୍-ଇଣ୍ଡିଆର ପ୍ରତିନିଧି ବରିଷ୍ଠ ଡେଟା ଆସୋସିଏଟ୍ ଜ୍ୟୋତି ରଞ୍ଜନ ନାୟକ ଓ କମ୍ୟୁନିକେଶନ ଆଣ୍ଡ ଆଉଟରିଚ୍ କୋର୍ଡିନେଟର ପରଂବ୍ରହ୍ମ ତ୍ରିପାଠୀ ଏୟାର କ୍ୱାଲିଟି ଲାଇଫ୍ ଇଣ୍ଡେକ୍ସ ଉପରେ କିଛି ତଥ୍ୟଭିତ୍ତିକ ଉପସ୍ଥାପନା ରଖିଥିଲେ ।ଶେଷରେ ଛାତ୍ର ଛାତ୍ରୀମାନଙ୍କ ବିଭିନ୍ନ ପ୍ରଶ୍ନର ଉତ୍ତର ବିଶେଷଜ୍ଞମାନେ ଦେଇଥିଲେ।
