"ଭୂତଳ ଜଳସ୍ତର ହ୍ରାସ ପାଇବା ବଡ଼ ଉଦବେଗର ବିଷୟ"
ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଭୂତଳ ଜଳସ୍ତର ଦିନକୁ ଦିନ କମିବାରେ ଲାଗିଛି ଯାହାକି ଏବେ ତାହା ଏକ ବଡ଼ ଉଦବେଗର ବିଷୟ ପାଲଟିଛି । ଏହି ସମସ୍ୟାକୁ ଦୁର କରିବା ପାଈଁ କେନ୍ଦ୍ର-ସରକାରଙ୍କ ପକ୍ଷରୁ ଚଳିତ ବର୍ଷକୁ ଜଳ-ସଂରକ୍ଷଣ ବର୍ଷ ଭାବେ ଘୋଷଣା କରାଯାଇଛି ।
ଏହାକୁ ଦୃଷ୍ଟିରେ ରଖି ଗଜପତି ଜିଲ୍ଲା ଜଳ-ବିଭାଜିକା ବିଭାଗ ପକ୍ଷରୁ ଚାଷୀ ମାନଙ୍କ ହିତ ସାଧନ ପାଇଁ ଅଣ-ଜଳସେଚିତ ଜମି ଅଞ୍ଚଳରେ ବ୍ୟାପକ କାର୍ଯ୍ୟକ୍ରମ କରାଯାଉଛି । ଜଳ ସଂରକ୍ଷଣ ଯୋଗୁଁ ଚାଷୀ ମାନେ ବିଭିନ୍ନ ଉପାୟରେ ଏହି ପାଣିକୁ ନେଇ ସେମାନଙ୍କ ଚାଷ ଜମିକୁ ଜଳସେଚିତ କରି ପାରୁଛନ୍ତି । ଏଥିରେ ଚାଷ କାର୍ଯ୍ୟରେ ବ୍ୟାପକ ଉନ୍ନତି ହେବା ସହ ଭୂତଳ ଜଳସ୍ତରରେ ମଧ୍ୟ ଉନ୍ନତି ହେଉଥିବା ପରିଲକ୍ଷିତ ହେଉଥିବା ଦେଖାଯାଇଛି ।
ଏଭଳି ଦେଖିବାକୁ ମିଳିଛି ଗଜପତି ଜିଲ୍ଲା ଗୋଷାଣୀ ବ୍ଲକ ଅନ୍ତର୍ଗତ ବୁରୁପାଡ ଓ ଲାବନ୍ୟଗଡ଼ ଗ୍ରାମରେ । ଏହି ଗ୍ରାମର ଚାଷୀମାନେ ଗତ ଦିନମାନଙ୍କରେ ବର୍ଷା ଅଭାବରୁ ଚାଷବାସ କ୍ଷେତ୍ରରେ ଜଳ ସମସ୍ୟାର ସମ୍ମୁଖିନ ହେଉଥିଲେ । ତେବେ ସେମାନଙ୍କର ଜଳ ସମସ୍ୟା ଦୁର କରିବା ପାଇଁ ଆଗେଇ ଆସିଛି ଜିଲ୍ଲା ଜଳ ବିଭାଜିକା ବିଭାଗ ଏବଂ ନିର୍ମାଣ କରିଛି ଏକାଧିକ ଚେକ୍-ଡେମ୍ ପୋଖରୀ ଓ ପୁରୁଣା ସାଗର-ବନ୍ଧରୁ ପାଣି ନେବାପାଇଁ ସୁଇସ ସିମେଣ୍ଟ ନାଳ । ଯେଉଁ ଥିରେ କି ବର୍ଷ ସାରା ଜଳ ଗଛିତ ହୋଇ ରହିବା ଫଳରେ ଚାଷୀ ମାନେ ଧାନ , ମାଣ୍ଡିଆ , ମୁଗ , ବିରି ପ୍ରଭୃତି ଫସଲ ସହ ପନିପରିବା ଚାଷ ମଧ୍ୟ ସହଜେ କରିପାରୁଛନ୍ତି ।
ନିର୍ମାଣ ଚେକ୍-ଡେମର ଗଛିତ ଜଳକୁ ଚାଷୀମାନେ ସହଭାଗିତାରେ ମୋଟର-ପମ୍ପ ଲଗାଇ ପାଇପ ସାହାଯ୍ୟରେ ପାଣି ନେଇ ନିଜ ନିଜର ଚାଷ ଜମିକୁ ଜଳ ସେଚିତ କରି ପାରୁଛନ୍ତି । ଏ ସମ୍ପର୍କରେ ଗ୍ରାମର ଚାଷୀ ବୃନ୍ଦାବନ ଦଣ୍ଡସେନା କିଭଳି ଜଳ ବିଭାଜିକା ପ୍ରକଳ୍ପ ଦ୍ବାରା ଉପକୃତ ହୋଇ ପାରିଛନ୍ତି ତାହା କହିଥିଲେ ।
ଏହି ଜଳ ବିଭାଜିକା ପ୍ରକଳ୍ପ ଦ୍ୱାରା ଗଛିତ ପାଣିର ଉପଯୋଗ କରି କିଭଳି ବିଭିନ୍ନ ପନିପରିବା ଚାଷ କରି ଉପକୃତ ହୋଇ ପାରିଛନ୍ତି , ସେ ସମ୍ପର୍କରେ ଲାବନ୍ୟଗଡ଼ ଗ୍ରାମର କାଲା ଚନ୍ଦ୍ରମା କହିଛନ୍ତି ।
ଲାବନ୍ୟଗଡ଼ ଅଞ୍ଚଳରେ ଜଳ ବିଭାଜିକା ପ୍ରକଳ୍ପ ମାଧ୍ୟମରେ ବହୁତ ଗୁଡିଏ ପୋଖରୀ ଖୋଳାଯାଇଛି , ନିକଟସ୍ଥ ଅଞ୍ଚଳରେ ଥିବା ପାହାଡ଼ରୁ ବର୍ଷା ସମୟରେ ପାଣି ବିଭିନ୍ନ ନାଳ ଦେଇ ଚାଲି ଯାଉଥିଲା । ସେହି ପାଣିକୁ ସଂରକ୍ଷିତ ରଖିବା ପାଇଁ ଚାଷୀଙ୍କ ଚାଷ ଜମି ପାଖ ଅଞ୍ଚଳରେ ପୋଖରୀ ଖୋଲା ଯାଇଛି । ପୋଖରୀରେ ବର୍ତ୍ତମାନ ବହୁ ପରିମାଣର ବର୍ଷାଜଳ ଗଛିତ ଅଛି । ବର୍ଷା ନ ହେଲେ ମଧ୍ୟ ଚାଷୀଙ୍କୁ ପାଣିର ଅଭାବ ପଡୁନାହିଁ । ପୁର୍ବରୁ ଚାଷ ଜମି ଗୁଡାକ ପାଣିର ଅଭାବରେ ମରୁଡି ପ୍ରାୟ ହୋଇ ପଡୁଥିଲା । ଏବେ କିନ୍ତୁ ଜିଲ୍ଲା ଜଳ ବିଭାଜିକା ପ୍ରକଳ୍ପ ଦ୍ବାରା ପୋଖରୀ ଗୁଡାକ ହେବା ଫଳରେ ସେହି ପୋଖରୀ ରେ ଗଛିତ ଥିବା ଜଳରେ ଚାଷ କାର୍ଯ୍ୟ ବେଶ ଭଲ ହୋଇପାରିଛି । ଧାନ , ମାଣ୍ଡିଆ , ପନିପରିବା ବ୍ୟତିତ ଚାଷୀ ପୋଖରୀରେ ମାଛ ଚାଷ ମଧ୍ୟ କରି ବେଶ ଭଲରେ ଅଛନ୍ତି ବୋଲି ଗ୍ରାମର ଚାଷୀ ରାଜୁ ଦଳ ବେହେରା କହିଛନ୍ତି ।
ଏତଦ୍ ବ୍ୟତିତ ଜଳ ବିଭାଜିକା ପ୍ରକଳ୍ପ ପକ୍ଷରୁ ଚାଷୀ ମାନଙ୍କୁ କ୍ଷେତରେ ଭଲରେ ଏବଂ ଉପଯୁକ୍ତ ପରିମାଣରେ ପାଣି ସହଜେ ନେଇ ଜଳସେଚିତ କରିବା ପାଇଁ ବନ୍ଧ ଗୁଡ଼ିକରୁ ପକ୍କା ସିମେଣ୍ଟ ସୁଇସ ନାଳ ମଧ୍ୟ ନିର୍ମାଣ କରାଯାଉଛି । ଧାନ ଚାଷ ସହ ଚାଷୀମାନେ ଧାନ ବିଲ ପାର୍ଶ୍ୱରେ କଦଳୀ ଚାଷ ମଧ୍ୟ କରୁଛନ୍ତି ।
ଚାଷୀ ମାନଙ୍କୁ ସରକାରଙ୍କ ଏସବୁ ସୁବିଧା ଜଳ ବିଭାଜିକା ପକ୍ଷରୁ ଯୋଗାଇ ଦିଆଯିବା ସହ ବିଭିନ୍ନ ସମୟରେ ବିଭାଗୀୟ ଅଧିକାରୀ ତଥା ଏପିଡି ବିଭୂତି ଭୂଷଣ ମିଶ୍ର , ପିଆଇଏ ସନ୍ତୋଷ କୁମାର ଅଧିକାରୀ , ମୃତ୍ତିକା ସଂରକ୍ଷଣ ସମ୍ପ୍ରସାରଣର ଅବନୀ କାନ୍ତ ପାତ୍ର , ଏବଂ ଡବ୍ଲ୍ୟୁଏମଟି ଈଂଜିନିଅର ସୀମା ବିଶ୍ୱାସ ପ୍ରମୁଖ କ୍ଷେତ ଓ ପ୍ରକଳ୍ପ ଅଞ୍ଚଳକୁ ଯାଇ ଜଳର ସୁବିନିଯୋଗ , ସହଭାଗିତାରେ ଚାଷ , କ୍ଷେତ ହୁଡା଼ରେ ବିଭିନ୍ନ ପନିପରିବା ଚାଷ କରିବ ଏବଂ ରକ୍ଷଣା-ବେକ୍ଷାଣ ଉପରେ ଆବଶ୍ୟକ ପରାମର୍ଶ ମଧ୍ୟ ଦେଉଛନ୍ତି ବୋଲି କହିଛନ୍ତି ବିଭାଗୀୟ ଅଧିକାରୀ(ଏପିଡି) ବିଭୂତି ଭୂଷଣ ମିଶ୍ର ।
