ଗୁହାରି କରି କରି ପ୍ରସାଶନ କଲାନି, ଗାଁ ଲୋକେ କଲେ
ପଥର, କାଠ, ମାଟିରେ ୮୦ ଫୁଟର ପୋଲ ନିର୍ମାଣ କଲେ ଗାଁ ଲୋକେ
ଏତେଦିନ ନିଘୋଡ଼ ନିଦରେ ଶୋଇଲା ପ୍ରଶାସନ, ଏବେ ତା ଆଖି ଖୋଲି ଦେଖୁ
ନୂଆପଡ଼ା,(ଅମିତ ପୁରୋହିତ) : ଏକତା ହିଁ ବଳ । ଗାଁ ଲୋକେ ଏକତ୍ରିତ ହୋଇ କୌଣସି ଅସାଧ୍ୟ କାମକୁ ହାସଲ କରିବାକୁ ଲକ୍ଷ୍ୟ ରଖିବେ, ତେବେ ତାହା ନିଶ୍ଚୟ ସଫଳ ହୋଇଯିବ । ଏମିତି ଏକ ଅସାଧ୍ୟ କାମକୁ ସୁନାବେଡା ଅଭୟାରଣ୍ୟର ଦୁର୍ଗମ ଜଙ୍ଗଲ ପାହାଡ ଘେରା କାଙ୍କେରମଂଜି ଓ ହଲୁଆପାଲି ଗାଁର ବନବାସୀ ମିଶି ସାଧ୍ୟ କରି ଦେଖାଇଛନ୍ତି । ଦୁଇ ଗାଁ ଲୋକେ ୩ ଦିନର ଶ୍ରମଦାନ କରି ବହୁ ପ୍ରତିକ୍ଷିତ କାଙ୍କେରମଂଜି-ହଲୁଆପାଲି ନାଲା ଉପରେ ପଥର, କାଠ ଓ ମାଟି ପକାଇ ପ୍ରାୟ ୮୦ ଫୁଟର ଏକ କାଠ ପୋଲ ନିର୍ମାଣ କରିବାରେ ସଫଳ ହୋଇଛନ୍ତି । ଏବେ ଏହି ରାସ୍ତାରେ ସୁନାବେଡା ଓ ସୋସେଙ୍ଗ ପଞ୍ଚାୟତର ଗ୍ରାମବାସୀ ସହଜରେ କମ ସମୟ ଭିତରେ ଜିଲ୍ଲା ମୁଖ୍ୟାଳୟରେ ପହଂଚି ପାରୁଛନ୍ତି । ସେହିପରି କେରମେଲି, ଟାନୱାଟ ପଞ୍ଚାୟତ ସମେତ ସଦର ବ୍ଲକର ଲୋକେ ସିଧାସଳଖ ଭାବେ ସୁନାବେଡା ଓ ସୋସେଙ୍ଗ ପଞ୍ଚାୟତକୁ ଯାତାୟତ କରୁଛନ୍ତି । ଏବେ ଦୁଇ ଗାଁର ଆଦିବାସୀଙ୍କ ମହତ କାମକୁ ଲୋକେ ଭୁୟସୀ ପ୍ରଶଂସା କରିଛନ୍ତି ।
ସ୍ୱାଧିନତାର ୭୩ ବର୍ଷ ପରେ ବି ସୁନାବେଡା ଅଭୟାରଣ୍ୟବାସୀ ମୌଳିକ ସୁବିଧା ସୁଯୋଗରୁ ବଂଚିତ ହୋଇ ରହିଛନ୍ତି । ବନବାସୀ ମାନଙ୍କ ପାଇଁ ଗମନା ଗମନ, ପାନୀୟ ଜଳ, ଶିକ୍ଷା, ସ୍ୱାସ୍ଥ୍ୟ, ବିଜୁଳି ଭଳି ମୌଳିକ ସୁବିଧା ସାତ ସପନ ହୋଇ ରହିଛି । ପ୍ରତି ବର୍ଷ ବର୍ଷା ଋତୁ ଆସିଗଲେ, ଅଭୟାରଣ୍ୟବାସୀଙ୍କ ପାଇଁ ଦୁଃଖ ଆହୁରୀ ଦ୍ୱିଗୁଣିତ ହୁଏ । ଅଭୟାରଣ୍ୟର ଅନେକ ନଦୀ, ନାଳରେ ପାହାଡ ଉପର ବନ୍ୟା ଜଳ ପ୍ରବାହିତ ହୁଏ । ଅନେକ ଗାଁରେ ବ୍ରିଜ ଅଭାବ ହେତୁ ବନବାସୀ ଦିନ, ସପ୍ତାହ, ମାସ ଧରି ଜଳବନ୍ଦୀ ଜୀବନ ଅତିବାହିତ କରନ୍ତି । ସେଥି ମଧ୍ୟରୁ ସଦର ବ୍ଲକ କେରମେଲି ପଞ୍ଚାୟତର କାଙ୍କେରମଂଜି-ହଲୁଆପାଲି ମଧ୍ୟସ୍ଥ ବଙ୍ଗାଘାଟି ନାଳା ଅନ୍ୟତମ । କାଙ୍କେରମଂଜି ଗାଁ ମୁଣ୍ଡରେ ରହିଛି ବଙ୍ଗାଘାଟି ନାଲା । ବର୍ଷା ୬ ମାସ ଏହି ନାଳା ଉପରେ ୩ ଫୁଟ ରୁ ୬ ଫୁଟ ପର୍ଯ୍ୟନ୍ତ ପାଣି ପ୍ରବାହିତ ହୋଇଥାଏ । ପାହାଡ ପାଣିର ବେଗ ତିବ୍ର ରହିବା ସହ ପଥରିଆ ରାସ୍ତାରେ ପାଣି ଭିତରେ ଅତିକ୍ରମ କରିବାକୁ କାଷ୍ଟକର ହୋଇଥାଏ । କାଙ୍କେରମଂଜି ଗାଁ ଲୋକେ ନାଲାକୁ ଅତିକ୍ରମ କରି ନିଜ ଚାଷ ଜମିକୁ ଯାଇ ପାରିନଥାନ୍ତି । ଅନେକ ସମୟରେ ଚାଷବାସ ନଷ୍ଟ ହେବାର ସମ୍ଭବନା ରହିଛି । ଚାଷୀ ନିଜ ଚାଷ ଜମିକୁ ଚାଷ କାମରେ ଯାଇଥିବା ବେଳେ ନାଳାରେ ପାଣି ବଢିଗଲେ, ଦିନ ଦିନ ଧରି ନାଲା ଆରପାରିରେ ଜଳବନ୍ଦୀ ହୋଇ ଭୋକ ଉପବାସରେ ଜୀବନ ଅତିବାହିତ କରନ୍ତି । ସୁନାବେଡା ଓ ସୋସେଙ୍ଗ ପଞ୍ଚାୟତବାସୀ ଜିଲ୍ଲା ମୁଖ୍ୟାଳୟକୁ ଯିବା ଆସିବା କରିବା ପାଇଁ ଦୁଃଖ ଭୋଗିଥାନ୍ତି । ଏହି ଦୁଇ ପଞ୍ଚାୟତବାସୀଙ୍କୁ ୩୦ କିମି ବଦଳରେ ୮୦ କିମି ଦୂରତା ଅତିକ୍ରମ କରି ନୂଆପଡ଼ାକୁ ଯିବା ଆସିବା କରନ୍ତି । ଗର୍ଭବତୀ, ରୋଗୀଙ୍କୁ ହସ୍ପିଟାଲ ପହଂଚିବାରେ ବିଲମ୍ବ ଘଟିଲେ ମୃତ୍ୟୁ ମୁଖରେ ପଡିଥାନ୍ତି । ଅଭୟାରଣ୍ୟବାସୀ ଅନେକ ଥର ରାଜ୍ୟ ସରକାର ଓ ଜିଲ୍ଲା ପ୍ରଶାସନକୁ ଜଣାଇଥିଲେ ବି କୌଣସି ସୁଫଳ ମିଳିନଥିଲା । ଶେଷରେ କାଙ୍କେରମଂଜି ଓ ହଲୁଆପାଲି ଗାଁ ଲୋକେ ମିଶି ନାଲା ଉପରେ ବ୍ରିଜ ନିର୍ମାଣ କରିବାକୁ ସ୍ଥିର କରିଥିଲେ ।
ଗତ ୧୯ ତାରିଖରେ କାଙ୍କେରମଂଜି ଓ ହଲୁଆପାଲି ଗାଁ ଲୋକଙ୍କ ମଧ୍ୟରେ ଏକ ବୈଠକ ବସିଥିଲା । ସେଠାରେ ଦୁଇ ଗାଁ ଲୋକେ ମିଶି ବଙ୍ଗାଘାଟି ନାଲା ଉପରେ ଏକ ଅସ୍ଥାୟୀ ବ୍ରିଜ ନିର୍ମାଣ କରିବାକୁ ସ୍ଥିର କରିଥିଲେ । ୨୦ ତାରିଖ ସକାଳେ ଦୁଇ ଗାଁର ଶତାଧିକ ପୁରୁଷ ଓ ମହିଳା ଏକତ୍ରିତ ହୋଇ ଗଏଁତି, ରଫା, ଝୁଡି ଧରି ବାହାରି ଥିଲେ । ନାଲା ନିକଟରେ ପୋଲ ନିର୍ମାଣ କାମ ଆରମ୍ଭ ହୋଇଥିଲା । ବାଉଁସ ଓ କାଠରେ ବାଡ ତିଆରି କରି ସେଥି ଭିତରେ ପଥର ଭର୍ତ୍ତି କରି ପିଲର ନିର୍ମାଣ କରିଥିଲେ । ପିଲର ଉପରେ ବଡ ବଡ କାଠ ପକାଇ ତା ଉପରେ ଛୋଟ ଛୋଟ କାଠ ଓ ବାଉଁସ ବିଛାଇ ଥିଲେ । ତାରି ଉପରେ ଗଛର ଡାଳ ପକାଇ ମାଟି ପକାଇ ରାସ୍ତା ନିର୍ମାଣ କରିଥିଲେ । ଦୁଇ ଗାଁ ଲୋକଙ୍କ ୩ ଦିନର ଶ୍ରମଦାନ ପରେ ପ୍ରାୟ ୮୦ ଫୁଟ ଲମ୍ବର ପଥର, କାଠ ଓ ମାଟି ପକାଇ ଏକ ଅସ୍ଥାୟୀ ବ୍ରିଜ ନିର୍ମାଣ କରିବାରେ ଲୋକେ ସକ୍ଷମ ହୋଇଥିଲେ । ଗାଁ ଲୋକଙ୍କ ଏଭଳି ଉଦ୍ୟମକୁ ଜିଲ୍ଲାବାସୀ ଉଚ୍ଚ ପ୍ରଶଂସା କରିଛନ୍ତି । ଶ୍ୟାମସୁନ୍ଦର ମାଝି, ଲଲିତ ମାଝି, ମନଧର ମାଝି, ବଜତ ମାଝି, ଶୁଶିଲ ମାଝି, ଗୁଡୁ ପହରିଆ, ଇନ୍ଦ୍ରା ମଝି, ଶୁକମନୀ ମାଝି, ପଦ୍ମାବତୀ ମାଝି, ନୃପତି ମାଝି, ଧନମତି ମାଝି, ରଜନୀ ମାଝି ପ୍ରମୁଖ ସାମିଲ ହୋଇଥିଲେ ।
