ଭୁବନେଶ୍ୱର : ଅବଶ୍ୟ କିଛି ବଡ କଥା ନୁହେଁ କି ଗୁରୁଚଣ୍ଡାଲ ଦୋଷ ନୁହେଁ | କେହି ସାଧାରଣ ଲୋକ କରିଥିଲେ କେହି ଧରି ନଥାନ୍ତେ | ହେଲେ ସାର ମାନ୍ୟବର ମନ୍ତ୍ରୀ ଯେହେତୁ, ସେ କରିଛନ୍ତି ବୋଲି ଟିକେ ଆଖିକୁ ଖଟକା ଲାଗିଲା | କ୍ୟାମେରା ଆଗରେ ଛୋଟିଆ କଥାଟେ ଆଖିକୁ ଆସିଲା ବୋଲି ଲେଖୁଛୁ |
ରାଜଭବନରେ ଅଭିଷେକ ହଲରେ ଚାଲିଥାଏ ରେଡକ୍ରସ ପୁରସ୍କାର ପ୍ରଦାନ ଉତ୍ସବ | ଉପସ୍ଥିତ ଥାଆନ୍ତି ସ୍ୱାସ୍ଥ୍ୟମନ୍ତ୍ରୀ ନବ ଦାସ, ଉଚ୍ଚ ଶିକ୍ଷାମନ୍ତ୍ରୀ ଡ଼ ଅରୁଣ ସାହୁ, ଗଣଶିକ୍ଷା ମନ୍ତ୍ରୀ ସମୀର ଦାଶଙ୍କ ସମେତ ଅନ୍ୟ ମାନ୍ୟଗଣ୍ୟ ନିମନ୍ତ୍ରିତ ଅତିଥି ଓ ବ୍ୟକ୍ତି ବିଶେଷ | ମହାମହୀମ ରାଜ୍ୟପାଳ ମହୋଦୟ ଆସିଲେ | ଆଉ ସାଙ୍ଗେ ସଂଗେ ସଂଗେ ଜାତୀୟ ସଂଗୀତ " ଜନଗଣ ମନ ..." ବାଜି  ଉଠିଲା | ସମସ୍ତେ ସାବଧାନ ପୋଜିସନରେ ଠିଆ ହୋଇ ଜାତୀୟ ସଂଗୀତ ଗାନ କରୁଥିଲେ | ହେଲେ ଗଣଶିକ୍ଷା ମନ୍ତ୍ରୀ ସମୀର ଦାଶ ନୀରବରେ ଠିଆ ହୋଇଥିଲେ , କିଂତୁ ନିଆରା ଢଙ୍ଗରେ ହାତ ପଛକୁ ରଖି | ସେତକ ଖଟକା ଲାଗିଲା | ଅବଶ୍ୟ ମନ୍ତ୍ରୀ ମହୋଦୟଙ୍କ ଖଟକା ଲାଗିଲା କି ନାହିଁ ସେ ଜାଣିଥିବେ |