ଜଗତସିଂହପୁର/ରମେଶ ମହାନ୍ତି -ବାଲିକୁଦା-ଏରସମା ନିର୍ବାଚନ ମଣ୍ଡଳୀର ଏରସମା ତହସିଲ୍ ନିକଟସ୍ଥ ବସଷ୍ଟାଣ୍ଡ ଠାରେ ମଙ୍ଗଳବାର ଅପରାହ୍ନରେ ଏକ ବିଶାଳ ସମ୍ବର୍ଦ୍ଧନା ସମାବେଶ ଅନୁଷ୍ଠିତ ହୋଇଯାଇଛି।ଏହି ସମାବେଶରେ ଜଗତସିଂହପୁର ଜିଲ୍ଲାର ସମସ୍ତ ୪ଗୋଟି ନିର୍ବାଚନ ମଣ୍ଡଳୀରୁ ବିଜୟୀ ହୋଇଥିବା ବିଜେଡି ବିଧାୟକ ଓ ସାଂସଦ ଡା.ରାଜଶ୍ରୀ ମଲ୍ଲିକ,ବାଲିକୁଦା- ଏରସମା ବିଧାୟକ ଓ ମନ୍ତ୍ରୀ ରଘୁନନ୍ଦନ ଦାସ,ଜଗତସିଂହପୁର ବିଧାୟକ ପ୍ରଶାନ୍ତ ମୁଦୁଲି,ଜିଲ୍ଲାର ବରିଷ୍ଠ ତିର୍ତ୍ତୋଲ ବିଧାୟକ ବିଷ୍ଣୁ ଦାସ,ପାରାଦ୍ବୀପ ବିଧାୟକ ସମ୍ବିତ ରାଉତରାୟ ପ୍ରମୁଖଙ୍କୁ ୧କି.ମି ଦୂରରୁ ଏକ ପଟୁଆରରେ ସ୍ୱାଗତ ସମ୍ବର୍ଦ୍ଧନା କରାଯାଇ ବାଜା ବଜାଇ ବାଣ ଫୁଟାଇ ସଭା ସ୍ଥଳକୁ ପାଛୋଟି ନିଆଯାଇଥିଲା।ବାଲିକୁଦା -ଏରସମା ନିର୍ବାଚନ ମଣ୍ଡଳୀରୁ ପ୍ରଥମ ଥର ବିଧାୟକ ହୋଇ ଜଳସମ୍ପଦ ଓ ସୂଚନା ଓ ଲୋକସମ୍ପର୍କ ଭଳି ୨ଗୋଟି ଗୁରୁତ୍ବପୂର୍ଣ୍ଣ ବିଭାଗରେ ମନ୍ତ୍ରୀ ହୋଇଥିବା ରଘୁନନ୍ଦନ ଦାସ ମୁଖ୍ୟ ଅତିଥି ଭାବେ ଯୋଗଦାନ କରି ସର୍ବପ୍ରଥମେ ବିପୁଳ ଭୋଟରେ ତାଙ୍କୁ ବିଜୟୀ କରାଇଥିବା ଉପସ୍ଥିତ ଜନସାଧାରଣଙ୍କୁ କୃତଜ୍ଞତା ଜଣାଇବା ସହ ଜଗତସିଂହପୁର ଜିଲ୍ଲାକୁ ରାଜ୍ୟରେ ୧ନଂ ଜିଲ୍ଲାରେ ପରିଣତ କରିବାକୁ ଚେଷ୍ଟା କରିବେ ବୋଲି ପ୍ରତିଶ୍ରୁତି ଦେଇଥିଲେ।ଏରସମା ବ୍ଲକ ସଭାପତି ପୀତବାସ ଗୋଛାୟତଙ୍କ ସଭାପତିତ୍ବରେ ଅନୁଷ୍ଠିତ ଏହି ଉତ୍ସବରେ ମନ୍ତ୍ରୀ ଶ୍ରୀ ଦାସଙ୍କୁ ଏରସମା ଓ ବାଲିକୁଦା ବ୍ଲକର ବିଭିନ୍ନ ଅନୁଷ୍ଠାନ ଓ ବ୍ୟକ୍ତିବିଶେଷଙ୍କ ପକ୍ଷରୁ ଶୁଭେଛାର ସୁଅ ଛୁଟିଥିଲା। ମନ୍ତ୍ରୀ ଶ୍ରୀ ଦାସଙ୍କୁ ଏହି ସମ୍ବର୍ଦ୍ଧନା ଶାରଳା (ଆଇ ଟି ଆଇ) ଏରସମା,ଶ୍ରୀ ଜଗନ୍ନାଥ ମହାବିଦ୍ୟାଳୟ କୋଠି,ଆଞ୍ଚଳିକ ଯୁବ ପରିଷଦ ଏରସମା,ଭିମଭୋଇ ଆଞ୍ଚଳିକ ଭିନ୍ନକ୍ଷମ ମହାସଂଘ,ଏରସମା ବ୍ଲକର ଶିକ୍ଷକ ସଂଘ,ବୈଦେହୀ ମହିଳା ସଂଗଠନ ଢିଙ୍କିଆ,ଏରସମା ବିକାଶ ସ୍ୱୟଂ ସହାୟକ ସଂଘ,ଏରସମା ଫ୍ରେଣ୍ଡସ୍ କ୍ଲବ୍,ଜଗନ୍ନାଥ ଆକୁଆ କଲଚର, ଏରସମା ପ୍ରାଥମିକ ଶିକ୍ଷକ ସଂଘ,ଏରସମା ବରିଷ୍ଠ ନାଗରିକ ସଂଘ, ପ୍ରମୁଖଙ୍କ ପରି ଅନେକ ମାନ୍ୟଗଣ୍ୟ ବ୍ୟକ୍ତି ଫୁଲତୋଡା ଦେଇ ମନ୍ତ୍ରୀଙ୍କୁ ବିପୁଳ ସମ୍ବର୍ଦ୍ଧନା କରିଥିଲେ।ଏହି ସମ୍ବର୍ଦ୍ଧନା ସମାବେଶରେ ଜଗତସିଂହପୁର ଜିଲ୍ଲା ବିଜେଡ଼ି ସଭାପତି ଅମରେନ୍ଦ୍ର ଦାସ,ରାଜ୍ୟ ବିଜେଡି ସାଧାରଣ ସମ୍ପାଦକ ସାରଦା ଜେନା,ଏରସମା ବ୍ଲକ ଅଧ୍ୟକ୍ଷ ପ୍ରଣବ ସ୍ୱାଇଁ,ବାଲିକୁଦା ବ୍ଲକ ଅଧ୍ୟକ୍ଷା ମଧୁସ୍ମିତା ସାହୁ,ସଭାପତି ରତ୍ନାକର ନାୟକଙ୍କ ସମେତ ହଜାର ହଜାର ସଂଖ୍ୟାରେ ଜନସାଧାରଣ ଉପସ୍ଥିତ ଥିଲେ।