ସଫେଇ ଅଭିଯାନରେ ସାମିଲ ହେଲେ ପ୍ରଶାସନ ଓ ଛାତ୍ରଛାତ୍ରୀ
ଭଞ୍ଜନଗର ରୁ ( ଉଦୟନାଥ ପଣ୍ଡା ) ଶାସକ ପ୍ରଶାସକ : ବିଶ୍ଵ ପରିବେଶ ଦିବସ ପାଳନ ଅବସରରେ ଗଞ୍ଜାମ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଆଜି ଜୁନ୍ ମାସ ୪ ତାରିଖ ଗୁରୁବାର ଦିନ ଭଞ୍ଜନଗର ପୌରପରିଷଦ ଆନୁକୂଲ୍ୟରେ “ଆମ ଗଞ୍ଜାମ ସ୍ବଚ୍ଛ ଗଞ୍ଜାମ” କାର୍ଯ୍ୟକ୍ରମ ବହୁ ଆଡ଼ମ୍ବରରେ ପାଳନ କରାଯାଇଅଛି। ଜିଲ୍ଲାପାଳଙ୍କ ନିର୍ଦ୍ଦେଶ ଅନୁଯାୟୀ ଏହି ସ୍ୱଚ୍ଛତା କାର୍ଯ୍ୟକ୍ରମ ଏଣିକି ପ୍ରତି ସପ୍ତାହରେ ପାଳନ କରାଯିବ।
ଏହି କ୍ରମରେ ଆଜି ଜୁନ୍ ମାସ ୪ ତାରିଖ ଗୁରୁବାର ଦିନରେ ଭଞ୍ଜନଗର ପୌରପରିଷଦ ତରଫରୁ ସ୍ଥାନୀୟ ଏଲ୍.ଆଇ.ସି (LIC) ଅଫିସ ସମ୍ମୁଖରେ ଏକ ବ୍ୟାପକ ସଫେଇ କାର୍ଯ୍ୟକ୍ରମ ହାତକୁ ନିଆଯାଇଥିଲା।
କାର୍ଯ୍ୟକ୍ରମରେ ପ୍ରମୁଖ ବ୍ୟକ୍ତିତ୍ୱଙ୍କ ଯୋଗଦାନ ମଧ୍ୟରେ
ଉକ୍ତ ଅଭିଯାନରେ ଭଞ୍ଜନଗର ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରୀଯୁକ୍ତ ରଞ୍ଜନ କୁମାର ଦେ, ପୌରପରିଷଦ କାର୍ଯ୍ୟନିର୍ବାହୀ ଅଧିକାରୀ ମୁରଲୀକୃଷ୍ଣ ପଣ୍ଡା, କନିଷ୍ଠ ଯନ୍ତ୍ରୀ ଦିଲ୍ଲୀପ କୁମାର ମିଶ୍ର ଏବଂ କନିଷ୍ଠ ପରିମଳ ବିଶେଷଜ୍ଞ ଅମ୍ରିତା କୁମାରୀ ନାୟକ ପ୍ରମୁଖ ଉପସ୍ଥିତ ରହି ସଫେଇ କାର୍ଯ୍ୟର ନେତୃତ୍ୱ ନେଇଥିଲେ। ଏହି ସ୍ୱଚ୍ଛତା ଅଭିଯାନରେ ପୌର ପରିଷଦର ସମସ୍ତ କର୍ମଚାରୀ, "ବିପଦର ବନ୍ଧୁ" ସଂଗଠନର ସଦସ୍ୟ, ସ୍ବଚ୍ଛକର୍ମୀ ଓ ସଫେଇ କର୍ମୀମାନେ ସକ୍ରିୟ ଭାବେ ଅଂଶଗ୍ରହଣ କରିଥିଲେ। ଏହା ସହିତ ସ୍ଥାନୀୟ ଉପେନ୍ଦ୍ରଭଞ୍ଜ ଉଚ୍ଚବିଦ୍ୟାଳୟର ପ୍ରଧାନ ଶିକ୍ଷକ ଶ୍ରୀଯୁକ୍ତ ମଦନମୋହନ ରଥ, ଏନ୍.ସି.ସି (NCC) ପ୍ରଶିକ୍ଷକ ତଥା ଉକ୍ତ ବିଦ୍ୟାଳୟର ଶିକ୍ଷକ ଶ୍ରୀ ଶ୍ୟାମାପ୍ରସାଦ ମିଶ୍ରଙ୍କ ସମେତ ସମସ୍ତ ଜାତୀୟ ସମରଶିକ୍ଷାର୍ଥୀ ବାହିନୀର ଛାତ୍ରଛାତ୍ରୀ ଏବଂ ବହୁ ଶିକ୍ଷକ-ଶିକ୍ଷୟିତ୍ରୀ ଓ ସ୍ଥାନୀୟ ଜନସାଧାରଣ ସାମିଲ ହୋଇଥିଲେ।
ସମସ୍ତଙ୍କ ସାମୂହିକ ପ୍ରଚେଷ୍ଟାରେ LIC ଅଫିସ ସମ୍ମୁଖ ପରିତ୍ୟକ୍ତ ପରିବେଶକୁ ସମ୍ପୂର୍ଣ୍ଣ ସ୍ୱଚ୍ଛ କରାଯିବା ସହିତ ଜନସାଧାରଣଙ୍କ ମଧ୍ୟରେ ପରିବେଶ ସୁରକ୍ଷା ଓ ସ୍ୱଚ୍ଛତା ନେଇ ସଚେତନତା ସୃଷ୍ଟି କରାଯାଇଥିଲା। ଏହି ସଫଳ ଆୟୋଜନ ପାଇଁ ଅଞ୍ଚଳବାସୀ ପୌର ପ୍ରଶାସନର ଏହି ପଦକ୍ଷେପକୁ ବେଶ୍ ପ୍ରଶଂସା କରିଛନ୍ତି।
