ଏନଟିଟିପିପି ଝାରସୁଗୁଡାରେ ପ୍ରଥମ ପର୍ଯ୍ୟାୟ ସମାପ୍ତ ; ୬୦ ଜଣଙ୍କୁ ପ୍ରମାଣପତ୍ର ଓ ସିଲାଇ ମେସିନ ବଣ୍ଟନ
ଝାରସୁଗୁଡା, : ସମାବେଶୀ ବିକାଶ, ସମୁଦାୟ କଲ୍ୟାଣ ଓ ସ୍ଥାୟୀ ଜୀବିକା ସୃଷ୍ଟି ପ୍ରତି ନିଜ ପ୍ରତିବଦ୍ଧତାକୁ ପୁନରୁଚ୍ଚାରଣ କରି ଏନଏଲସି ଇଣ୍ଡିଆ ଲିମିଟେଡ୍ (ଏନଏଲସିଆଇଏଲ) ପକ୍ଷରୁ ଏନଏଲସି ତଲାବିରା ଥର୍ମାଲ ପାୱାର ପ୍ରକଳ୍ପ (ଏନଟିଟିପିପି) ଅଧୀନରେ ପ୍ରକଳ୍ପ ପ୍ରଭାବିତ ଓ ବିସ୍ଥାପିତ ପରିବାରଙ୍କ ପାଇଁ ଚାଲିଥିବା କୌଶଳ ବିକାଶ ପ୍ରଶିକ୍ଷଣ କାର୍ଯ୍ୟକ୍ରମର ପ୍ରଥମ ପର୍ଯ୍ୟାୟ ସଫଳତାର ସହ ସମାପ୍ତ ହୋଇଛି।
ଏହି ପ୍ରୟାସ ଅନ୍ତର୍ଗତ ତରେଇକେଲା, କୁମ୍ଭାରି ଓ ତୁମ୍ବେକେଲା ଗ୍ରାମର ୬୦ ଜଣ ଯୁବକ-ଯୁବତୀ “ସେଲ୍ଫ ଏମ୍ପ୍ଲୟଡ୍ ଟେଲର” ବୃତ୍ତିମୂଳକ ପ୍ରଶିକ୍ଷଣ ସଫଳତାର ସହ ସମାପ୍ତ କରିଛନ୍ତି। ଏହି ପ୍ରଶିକ୍ଷଣ କାର୍ଯ୍ୟକ୍ରମ ଭାରତ ସରକାରଙ୍କ କୌଶଳ ବିକାଶ ଓ ଉଦ୍ୟମିତା ମନ୍ତ୍ରଣାଳୟ ଅଧୀନରେ ଥିବା ଆପାରେଲ, ମେଡ୍-ଅପ୍ସ ଆଣ୍ଡ ହୋମ ଫର୍ନିସିଂ ସେକ୍ଟର ସ୍କିଲ୍ କାଉନସିଲ୍ ସହଯୋଗରେ ପରିଚାଳିତ ହୋଇଥିଲା।
ଏହି ଅବସରରେ ଏନଟିଟିପିପିର କାର୍ଯ୍ୟନିର୍ବାହୀ ନିର୍ଦ୍ଦେଶକ ଓ ପ୍ରକଳ୍ପ ମୁଖ୍ୟ ସନ୍ତୋଷ ସି.ଏସ୍. ସଫଳ ପ୍ରଶିକ୍ଷୁମାନଙ୍କୁ ପ୍ରମାଣପତ୍ର ସହ ସିଲାଇ ମେସିନ ବଣ୍ଟନ କରିଥିଲେ। ସେ ଯୁବମାନଙ୍କୁ ଅର୍ଜିତ କୌଶଳକୁ ସଠିକ ଭାବେ ବ୍ୟବହାର କରି ସ୍ୱାବଳମ୍ବୀ ହେବା ସହ ସ୍ଥାୟୀ ଜୀବିକା ସୃଷ୍ଟି ପାଇଁ ଆଗେଇ ଆସିବାକୁ ଉତ୍ସାହିତ କରିଥିଲେ।
ଏହାସହ ପ୍ରକଳ୍ପ ପ୍ରଭାବିତ ଅଞ୍ଚଳର ଆଉ ୬୦ ଜଣ ଯୁବକ-ଯୁବତୀଙ୍କୁ ନୂତନ ବ୍ୟାଚ୍ ଭାବେ ପ୍ରଶିକ୍ଷଣ କାର୍ଯ୍ୟକ୍ରମରେ ଔପଚାରିକ ଭାବେ ସାମିଲ କରାଯାଇଥିଲା। ନୂତନ ପ୍ରଶିକ୍ଷୁମାନଙ୍କୁ ସ୍ୱାଗତ କିଟ୍ ବଣ୍ଟନ କରାଯାଇଥିଲା।
ଏନଏଲସିଆଇଏଲର ବ୍ୟାପକ କୌଶଳ ବିକାଶ ଯୋଜନା ଅନ୍ତର୍ଗତ ମୋଟ ୩୦୦ ଜଣ ଯୁବକ-ଯୁବତୀଙ୍କୁ “ସେଲ୍ଫ ଏମ୍ପ୍ଲୟଡ୍ ଟେଲର” ବୃତ୍ତିରେ ପ୍ରଶିକ୍ଷଣ ଦିଆଯିବାକୁ ଲକ୍ଷ୍ୟ ରହିଛି। ଏହାଛଡ଼ା ଇଲେକ୍ଟ୍ରିସିଆନ୍ ବୃତ୍ତିରେ ମଧ୍ୟ ୩୦ ଜଣ ଯୁବକଙ୍କୁ ସଫଳତାର ସହ ପ୍ରଶିକ୍ଷଣ ଦିଆଯାଇଛି।
କାର୍ଯ୍ୟକ୍ରମରେ ଏନଏଲସିଆଇଏଲର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ସେମାନଙ୍କ ମଧ୍ୟରେ ଉପମହାପ୍ରବନ୍ଧକ (ଅର୍ଥ) ପ୍ରଶାନ୍ତ କୁମାର ବାରିକ, ଉପମହାପ୍ରବନ୍ଧକ (ମାନବ ସମ୍ପଦ) ଶରତ ଚନ୍ଦ୍ର ବେହେରା ଓ ଅନ୍ୟାନ୍ୟ ଅଧିକାରୀ ଓ ସ୍କିଲ୍ କାଉନସିଲ୍ ପ୍ରତିନିଧିମାନେ ଯୋଗ ଦେଇଥିଲେ।
ଏପରି କାର୍ଯ୍ୟକ୍ରମ ମାଧ୍ୟମରେ ଏନଏଲସି ଇଣ୍ଡିଆ ଲିମିଟେଡ୍ ତାହାର ସିଏସଆର୍ ଓ ପୁନର୍ବାସନ-ପୁନସ୍ଥାପନ ପ୍ରୟାସକୁ ଆହୁରି ସୁଦୃଢ କରୁଥିବା ସହ ପ୍ରକଳ୍ପ ପ୍ରଭାବିତ ଲୋକଙ୍କ ପାଇଁ ଜୀବିକାମୂଳକ ସୁଯୋଗ ସୃଷ୍ଟି କରୁଛି।
