ପାରଳାଖେମୁଣ୍ଡି/ ବାଳକୃଷ୍ଣ ପାଣିଗ୍ରାହୀ: ୪ ଦଫା ମୁଖ୍ୟ ଦାବୀକୁ ନେଇ ପାରଳାଖେମୁଣ୍ଡି ଠାରେ ଗଜପତି ମୋଟର ଟ୍ରାନସପୋର୍ଟ ଶ୍ରମିକ ସଂଘର ଧର୍ମଘଟ ଆନ୍ଦୋଳନ ଯୋଗୁଁ ଆଜି ସକାଳ ୬ଟା ଠାରୁ ପାରଳାଖେମୁଣ୍ଡି ଠାରେ ଅନିର୍ଦ୍ଦିଷ୍ଠ କାଳ ପର୍ଯ୍ୟନ୍ତ ଯାତ୍ରୀବାହୀ ବସ ଚଳାଚଳ ସମ୍ପୁର୍ଣ୍ଣ ବନ୍ଦ ହୋଇଯାଇଛି । ଧର୍ମଘଟର ପ୍ରଭାବ ବସ ଚଳାଚଳ ଉପରେ ପଡିବା ଯୋଗୁଁ ବସ ଗୁଡିକ ୬୮ଟି ବିଭିନ୍ନ ଗନ୍ତବ୍ୟ ପଥକୁ ଯାଉଥିବା ସମ୍ପୁର୍ଣ୍ଣ ବନ୍ଦ ହୋଇଯାଇଛି । ନୂଆବସଷ୍ଟାଣ୍ଡ ଠାରେ ସମସ୍ତ ଯାତ୍ରୀବାହୀ ବସ ଗୁଡାକ ଅଟକି ରହିଛି । ବହୁ ସଂଖ୍ୟାରେ ଯାତ୍ରୀମାନେ ସେମାନଙ୍କ ଗନ୍ତବ୍ୟ ସ୍ଥଳକୁ ଯିବାକୁ ବସ ନପାଇ କିଏ ବସ ଷ୍ଟାଣ୍ଡରେ ତ କିଏ ବିଭିନ୍ନ ବସ ରହିବା ବିଶ୍ରାମଗାର ଠାରେ ତ ଆଉ କିଏ ଗାଡି ଖୋଜିବା ପାଇଁ ଏପଟେ ସେପଟେ ବହୁ ସଂଖ୍ୟାରେ ବୁଲୁଥିବା ଏବଂ ଅସୁବିଧାର ସମ୍ମୁଖୀନ ହେଉଥିବା ଦେଖାଦେଇଥିଲା । ଏହି ଧର୍ମଘଟରେ ପ୍ରାୟ ୩୫୦ ଜଣ ବସ କର୍ମଚାରୀ ସାମିଲ ଥିବା ବେଳେ ଏହାକୁ ଜିଲ୍ଲାର ସିପିଏମ , ସିପିଆଇ,ସିଆଇଟିୟୁ, ଡିଵାଇଏଫଵାଇ, ଏଓଟିଡବ୍ଲୁଏଫ ଏବଂ ଏଆଇଟିୟୁ ସି ପ୍ରଭୃତି ଦଳ ପକ୍ଷରୁ ସମର୍ଥନ ଓ ସହଯୋଗ କରାଯାଇଛି । ଧର୍ମଘଟ ସମ୍ପର୍କରେ ସଂଘର ସଭାପତି ଡି.ଜଗନ୍ନାଥ ରାଓ ଏବଂ କାର୍ଯ୍ୟକାରୀ ସଭାପତି ସୁନିଲ କୁମାର ପଟ୍ଟନାୟକ ଏବଂ ସମ୍ପାଦକ ନରସିଂହ ମାଲବିଶୋଇ ସାମ୍ୱାଦିକ ମାନଙ୍କୁ ସୂଚନା ଦେଇ କହିଛନ୍ତିଯେ ଏହି ନୁଆ ବସଷ୍ଟାଣ୍ଡ ଠାରେ ଦୁଇଟି ମଦ ଦୋକାନ ଥିବା ଯୋଗୁଁ ଏଠାକୁ ବହୁ ବ୍ୟକ୍ତି ମଦ ପିଇବାକୁ ଆସି ମଦ ପିଇବା ପରେ ବିଶୃଙ୍ଖଳା କରିବା ପରେ ଯାତ୍ରୀମାନେ ହଇରାଣ ହରକତ ଓ ଭୟଭୀତ ହୋଇ ପଡୁଛନ୍ତି ତେଣୁ ଏଠାରେ ମଦ ବିକ୍ରିକୁ ସମ୍ପୁର୍ଣ୍ଣ ବନ୍ଦ କରାଯାଉ , ବସରେ ଯିବା ଯାତ୍ରୀମାନଙ୍କ ନିମନ୍ତେ ବିଭିନ୍ନ ଗନ୍ତବ୍ୟ ସ୍ଥଳକୁ ଯିବା ପାଇଁ ସହଜେ ଜାଣିବା ପାଇଁ ଡାକବାଜି ଯନ୍ତ୍ର ଯୋଗେ ଘୋଷଣା ବ୍ୟବସ୍ଥା କରାଯିବା ସହ ଟିକଟ କାଉଣ୍ଟର ଖୋଲିବା ଏବଂ କର୍ମଚାରୀ ସଂଘ ମାଧ୍ୟମରେ ଯାତ୍ରୀଙ୍କ ସୁବିଧା ଦୃଷ୍ଟିରୁ ଟିକଟ ବ୍ୟବସ୍ଥା କରାଯାଉ,ବସ ଗୁଡିକରେ କିରୋସିନି ବ୍ୟବହାର କରି ଚଳାଇବା ବନ୍ଦ କରାଯାଉ କାରଣ ଧରାପଡିଲା ବେଳେ ମାଲିକ ଛାଡିପଡି ବସ ଡ୍ରାଇଭର, କଣ୍ଡକ୍ଟର,ଚେକର ଓ ହେଲ୍ପର ଧରାପଡି ଥାନାକୁ ଯାଉଛନ୍ତି, ବସଷ୍ଟାଣ୍ଡରେ ସ୍ୱଚ୍ଚତା ଯାତ୍ରୀମାନଙ୍କ ନିରାପତ୍ତା ପ୍ରତି ପଦକ୍ଷେପ ଗ୍ରହଣ କରାଯିବା ସହ ଏଥିରେ ବ୍ୟତୀକ୍ରମ ଓ ବାଧା ସୃଷ୍ଟି କରୁଥିବା ବ୍ୟକ୍ତି ବିଶେଷଙ୍କ ପ୍ରତି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଆମର ଦାବୀ ବୋଲି କହି ଏହା ସମାଧାନ ନ ହେଲେ ଆନ୍ଦୋଳନ ଚାଲୁ ରହିବ ଏବଂ ବ୍ୟାପକ କରାଯିବ କହିଥିଲେ । ମଧ୍ୟାହ୍ନରେ ଏ ସମ୍ପର୍କରେ ଉପଜିଲ୍ଲାପାଳ ଓ ନିର୍ବାହୀଯନ୍ତ୍ରୀ ସଂଘ ସହିତ ଆଲୋଚନା କରାଯିବା ଜଣାଯାଇଛି ।
