ମହିଳା ନ୍ୟାୟ, ସୁରକ୍ଷା ଓ ଥାନାର ବିଭିନ୍ନ ସମସ୍ୟା ଉପରେ ଗୁରୁତ୍ୱପୂର୍ଣ୍ଣ ଆଲୋଚନା
ବିଜେପୁର: ମହିଳାଙ୍କ ସୁରକ୍ଷା, ନ୍ୟାୟ ପ୍ରଦାନ ଓ ପୋଲିସ ବ୍ୟବସ୍ଥାକୁ ଅଧିକ ସଂବେଦନଶୀଳ କରିବା ଉଦ୍ଦେଶ୍ୟରେ ରାଜ୍ୟ ମହିଳା କମିଶନର ସଦସ୍ୟ ଶ୍ରୀମତୀ ମୁକ୍ତା ସାହୁ ରବିବାର ବିଜେପୁର ଥାନାକୁ ପରିଦର୍ଶନ କରିଛନ୍ତି। ଏହି ଅବସରରେ ସେ ବିଜେପୁର ଥାନାଧିକାରୀ ସୁଶାନ୍ତମଣି ମହାନ୍ତିଙ୍କ ସହ ବିସ୍ତୃତ ଆଲୋଚନା କରି, ମହିଳାମାନେ କିପରି ଅସୁବିଧା ସମୟରେ ଶୀଘ୍ର ଓ ସଠିକ୍ ନ୍ୟାୟ ପାଇପାରିବେ, ସେନେଇ ଗୁରୁତ୍ୱ ଦେଇଥିଲେ।ପରିଦର୍ଶନ ସମୟରେ ଶ୍ରୀମତୀ ସାହୁ ଥାନାର କାର୍ଯ୍ୟପ୍ରଣାଳୀ, ମହିଳା ଡେସ୍କର ସ୍ଥିତି, ଅଭିଯୋଗ ଗ୍ରହଣ ପ୍ରକ୍ରିୟା ଓ ପୀଡ଼ିତାଙ୍କ ସହ ପୋଲିସର ବ୍ୟବହାର ସମ୍ପର୍କରେ ଖବର ନେଇଥିଲେ। ବିଶେଷ କରି ଘରୋଇ ହିଂସା, ଯୌନ ଉତ୍ପୀଡ଼ନ, ଦାହେଜ ସମ୍ପର୍କିତ ମାମଲା ଓ ପାରିବାରିକ ବିବାଦ ଭଳି ସଂବେଦନଶୀଳ ମାମଲାରେ ପୋଲିସ କିପରି ତୁରନ୍ତ ପଦକ୍ଷେପ ନେଉଛି, ତାହା ଉପରେ ଆଲୋଚନା କରିଥିଲେ।
ଆଲୋଚନା ସମୟରେ ଶ୍ରୀମତୀ ମୁକ୍ତା ସାହୁ କହିଥିଲେ ଯେ, ମହିଳାମାନେ ଥାନାକୁ ଆସିଲେ ଭୟ ବା ସଂକୋଚ ଅନୁଭବ କରିବା ଉଚିତ୍ ନୁହେଁ। ପୋଲିସ ଅଧିକାରୀମାନେ ମହିଳା ପୀଡ଼ିତାଙ୍କ ସହ ସମ୍ମାନଜନକ, ସଂବେଦନଶୀଳ ଆଚରଣ କରିବା ଅତ୍ୟନ୍ତ ଆବଶ୍ୟକ। ଯେଉଁ ସମୟରେ ଜଣେ ମହିଳା ଅସୁବିଧାରେ ପଡ଼ନ୍ତି, ସେହି ସମୟରେ ପୋଲିସ ଓ ପ୍ରଶାସନର ତୁରନ୍ତ ସହଯୋଗ ତାଙ୍କ ପାଇଁ ବଡ଼ ସହାୟତା ହୁଏ ବୋଲି ସେ ଉଲ୍ଲେଖ କରିଥିଲେ।
ବିଜେପୁର ଥାନାଧିକାରୀ ଶ୍ରୀ ସୁଶାନ୍ତମଣି ମହାନ୍ତି ମହିଳା କମିଶନ ସଦସ୍ୟଙ୍କୁ ଥାନାର ସମସ୍ୟା ଓ ସୀମିତ ସାଧନ ସତ୍ୱେ କିପରି ପୋଲିସ କାର୍ଯ୍ୟ କରୁଛି, ସେ ବିଷୟରେ ଅବଗତ କରାଇଥିଲେ ଆବଶ୍ୟକ ସୁବିଧା ଓ ଲୋକସଂଖ୍ୟା ଅନୁପାତରେ ମାମଲା ଚାପ ଭଳି ବିଭିନ୍ନ ସମସ୍ୟା ଉପରେ ମଧ୍ୟ ଆଲୋଚନା କରିଥିଲେ।ଶ୍ରୀମତୀ ସାହୁ ଏହି ଅବସରରେ କହିଥିଲେ ଯେ, ମହିଳା କମିଶନ ସଦା ମହିଳାଙ୍କ ପାଖରେ ଅଛି ଓ କୌଣସି ମାମଲାରେ ପୋଲିସ ଯଦି ଅବହେଳା କରେ, ତେବେ ପୀଡ଼ିତାମାନେ କମିଶନର ଦ୍ୱାରସ୍ଥ ହୋଇପାରିବେ। ମହିଳାଙ୍କୁ ଆଇନ ସଚେତନତା ଦେବା, ଅଭିଯୋଗ ପ୍ରକ୍ରିୟାକୁ ସହଜ କରିବା ଓ ଦୂର ଅଞ୍ଚଳରେ ଥିବା ମହିଳାଙ୍କୁ ନ୍ୟାୟ ମିଳିବାକୁ ସୁନିଶ୍ଚିତ କରିବା ହେଉଛି କମିଶନର ମୁଖ୍ୟ ଲକ୍ଷ୍ୟ ବୋଲି ସେ କହିଥିଲେ।ଏହି ପରିଦର୍ଶନ ମାଧ୍ୟମରେ ବିଜେପୁର ଅଞ୍ଚଳରେ ମହିଳା ସୁରକ୍ଷା ଓ ନ୍ୟାୟ ପ୍ରଦାନ ବ୍ୟବସ୍ଥାକୁ ଆହୁରି ସୁଦୃଢ଼ କରିବା ପାଇଁ ପୋଲିସ ଓ ମହିଳା କମିଶନ ମଧ୍ୟରେ ସମନ୍ୱୟ ବଢ଼ିବ ବୋଲି ସ୍ଥାନୀୟ ବୁଦ୍ଧିଜୀବୀ ମହଳ ଆଶା ପ୍ରକାଶ କରିଛନ୍ତି।
