ବାଲେଶ୍ୱର : ମେଡିକାଲ ରୋଡ଼ ନିକଟସ୍ଥ ଠ୨ ମଲରେ ଚଳିତ ଜୁନ ମାସ ୧୭ ଓ ୧୮ ତାରିଖରେ ଓଡ଼ିଶା ମିଲେଟ୍ ମିଶନ ଆୟୋଜନ କରିଛି ଏକ ଆକର୍ଷଣୀୟ ଇଭେଂଟ ସିରିଜ୍ ଯାହା ବାଲେଶ୍ୱରର ସ୍ଥାନୀୟ ଲୋକମାନଙ୍କୁ ଯୋଗାଇଛି ଭରପୂର ମନୋରଞ୍ଜନ । ଓଡ଼ିଶା ସରକାରଙ୍କ ମହତ୍ୱାକାଂକ୍ଷୀ କାର୍ଯ୍ୟକ୍ରମ ଭାବରେ ପରିଚିତ ‘ଓଡ଼ିଶା ମିଲେଟ୍ ମିଶନ’ ରାଜ୍ୟରେ ମିଲେଟ୍ସର ପ୍ରଚାର ପାଇଁ ବିଭିନ୍ନ ଅଭିନବ ତଥା ଆକର୍ଷଣୀୟ ଉପାୟ ଅବଲମ୍ବନ କରୁଛି ।
ଏହି ପ୍ରୟାସର ଏକ ଅଂଶ ଭାବରେ, ‘ଓଡ଼ିଶା ମିଲେଟ ମିଶନ’ ମିଲେଟ୍ସର ଉପକାରିତା ସମ୍ପର୍କରେ ସଚେତନତା ସୃଷ୍ଟି କରିବା ପାଇଁ ରାଜ୍ୟର ପ୍ରମୁଖ ୨୦ଟି ସହରରେ ଆୟୋଜନ କରୁଛି ଏକ ମନୋରଞ୍ଜନଧର୍ମୀ କାର୍ଯ୍ୟକ୍ରମ ଯାହାର ନାମ ରହିଛି ‘ଓଡ଼ିଶାର ମିଲେଟ ବିଷୟରେ ଜାଣନ୍ତୁ’ । ମନୋରଞ୍ଜନ ମାଧ୍ୟମରେ ଲୋକମାନଙ୍କୁ ସେମାନଙ୍କ ଦୈନନ୍ଦିନ ଖାଦ୍ୟରେ ମିଲେଟ୍ସକୁ ଅନ୍ତର୍ଭୁକ୍ତ କରିବାର ବାର୍ତା ଉପରେ ଗୁରୁତ୍ୱ ପ୍ରଦାନ କରିବା ହେଉଛି ବାଲେଶ୍ୱରରେ ଆୟୋଜିତ ଏହି ରଙ୍ଗାରଙ୍ଗ କାର୍ଯ୍ୟକ୍ରମର ମୂଳ ଲକ୍ଷ୍ୟ ।
ଟିଭି ଏବଂ ଚଳଚ୍ଚିତ୍ରର ଲୋକପି୍ରୟ ହାସ୍ୟାଭିନେତ୍ରୀ ଚାନ୍ଦିନୀ ଏବଂ ଖ୍ୟାତନାମା ଗାୟକ ମନଦୀପ ଓ କୁଲଦୀପ ଏହି କାର୍ଯ୍ୟକ୍ରମରେ ଯୋଗ ଦେଇ ଲୋକମାନଙ୍କୁ ମନୋରଞ୍ଜନ କରିବା ଲାଗି ଆମନ୍ତ୍ରିତ ହୋଇଥିଲେ । ଓଡ଼ିଆ ଏବଂ ହିନ୍ଦୀ ସଂଗୀତର ଚିତାକର୍ଷକ ପରିବେଷଣ ଉପସ୍ଥିତ ଦର୍ଶକମାନଙ୍କୁ ମନ୍ତ୍ରମୁଗ୍ଧ କରିବା ସହିତ ସେମାନଙ୍କୁ କାର୍ଯ୍ୟକ୍ରମ ଶେଷ ପର୍ଯ୍ୟନ୍ତ ଏକ ରୋମାଂଚକର ବାତାବରଣ ମଧ୍ୟରେ ସମ୍ମୋହିତ କରି ରଖିଥିଲେ ।
ଆୟୋଜକମାନେ ଓଡ଼ିଶା ମିଲେଟ୍ ମିଶନ ସମ୍ବନ୍ଧରେ ଦର୍ଶକମାନଙ୍କୁ ପରିଚିତ କରାଇବା ସହିତ ସେହିଦିନର କାର୍ଯ୍ୟକ୍ରମର ଉଦେ୍ଧଶ୍ୟ ସମ୍ପର୍କରେ ଅବଗତ କରାଇଥିଲେ । ଏହାପରେ ସ୍ଥାନୀୟ ଲୋକଙ୍କ ଦ୍ୱାରା କିଛି କାର୍ଯ୍ୟକ୍ରମ ଅନୁଷ୍ଠିତ ହେବ ଯାହା ଉପସ୍ଥିତ ଦର୍ଶକଙ୍କୁ ଆକର୍ଷିତ କରିଥିଲେ । ପରେ ଏକ ହାସ୍ୟ ଅଭିନୟ ଅନୁଷ୍ଠିତ ହୋଇଥିଲା ଯାହା ମାଧ୍ୟମରେ ଲୋକମାନଙ୍କ ଅସ୍ୱାସ୍ଥ୍ୟକର ଖାଦ୍ୟାଭ୍ୟାସ ଉପରେ ଆଲୋକପାତ କରାଇଥିଲେ ।
ଉପସ୍ଥିତ ଦର୍ଶକଙ୍କ ମଧ୍ୟରେ ଉତ୍ସାହ ତଥା ଉଦ୍ଧୀପନାକୁ ବଜାୟ ରଖିବା ପାଇଁ ଓଡ଼ିଶା ମିଲେଟ୍ ମିଶନ ବିଭିନ୍ନ ପ୍ରକାରର କୌତୂକିଆ ତଥା ପ୍ରତିଯୋଗିତାମୂଳକ ଖେଳର ପରିକଳ୍ପନା କରିଛି ଯାହା ଅଂଶଗ୍ରହଣକାରୀଙ୍କୁ ବାନ୍ଧି ରଖିଥିଲା । ଏହି ରୋମାଂଚକର ପ୍ରତିଯୋଗିତାର ବିଜେତାମାନେ ବହୁ ଆକର୍ଷଣୀୟ ଉପହାର ପାଇବାର ସୁଯୋଗ ଲାଭ କରିଥିଲେ ଯାହା ସେମାନଙ୍କର ଆନନ୍ଦ ଓ ଆକାଂକ୍ଷାକୁ କରିଥିଲା ବହୁଗୁଣିତ ।
ଆଂଚଳିକ ଭାବଧାରାକୁ ନେଇ ଓଡ଼ିଶା ସରକାରଙ୍କ ଦ୍ୱାରା ପ୍ରସ୍ତୁତ ହୋଇଥିବା ଏହି କାର୍ଯ୍ୟକ୍ରମଗୁଡ଼ିକ କେବଳ ବିଶାଳ ଦର୍ଶକଙ୍କ ଧ୍ୟାନ ଆକର୍ଷଣ କରିବା ଲାଗି ଏକ ଶକ୍ତିଶାଳୀ ପ୍ଲାଟଫର୍ମ ନୁହେଁ; ଅଧିକନ୍ତୁ ସାମଗ୍ରୀକ ସ୍ୱାସ୍ଥ୍ୟ ତଥା ରାଜ୍ୟବାସୀଙ୍କ ସୁସ୍ଥତା ଉପରେ ସ୍ଥାୟୀ ପ୍ରଭାବ ପକାଇବାରେ କ୍ଷମତା ରଖେ ।