ଭୁବନେଶ୍ୱର : ୧୯୯୪ମସିହାରେ ଚାକିରୀ କ୍ଷେତ୍ରରେ ରାଜ୍ୟ ସରକାରଙ୍କ ଦ୍ୱାରା ଦିଆଯାଇଥିବା ୨୭% ଆରକ୍ଷଣ ସରକାରଙ୍କର ଅବହେଳାରୁ ଉପଲବ୍ଧ ହୋଇପାରୁନାହିଁ । ରାଜ୍ୟରେ ବାସ କରୁଥିବା ୫୨ ପ୍ରତିଶତ ପଛୁଆବର୍ଗ ଚାକିରୀ କ୍ଷେତ୍ରରେ ୧୧.୨୫ ପ୍ରତିଶତ ଆରକ୍ଷଣ ପାଉଛନ୍ତି । ରାଜ୍ୟରେ ଶିକ୍ଷାନୁଷ୍ଠାନ ରେ ନାମଲେଖା ନିମନ୍ତେ ଓବିସିଙ୍କ ପାଇଁ ଆଦୌ ଆରକ୍ଷଣ ନାହିଁ । ରାଜ୍ୟରେ ଓବିସି କମିଶନ କାର୍ଯ୍ୟକ୍ଷମ ନାହିଁ । ସରକାର ଓବିସି ବର୍ଗିକରଣ ଉପରେ ଆଦୌ ଚିନ୍ତା କରୁନାହାଁନ୍ତି । ଓଡ଼ିଶା ଓବିସି ଅର୍ଥ ଓ ବିକାଶ ନିଗମକୁ ଗତ ଦଶବର୍ଷ ହେବ କାର୍ଯ୍ୟକ୍ଷମ କରାଯାଉନାହିଁ । ରାଜ୍ୟରେ ଓବିସି ବର୍ଗଙ୍କ ପାଇଁ ଆବାସିକ ଶିକ୍ଷାନୁଷ୍ଠାନ ନାହିଁ । ରାଜ୍ୟରେ ଓବିସି ଜନଗଣନା ହୋଇନାହିଁ । ଆରକ୍ଷଣ ଜନିତ ସମସ୍ୟାର ସମାଧାନ ପାଇଁ ସରକାର ସର୍ବୋଚ୍ଚ କୋର୍ଟଙ୍କ ଆଦେଶାନୁସାରେ ଉଚିତ୍ ପଦକ୍ଷେପ ନେଉନାହାଁନ୍ତି । ଏହି ସବୁ ସମସ୍ୟା ଉପରେ ସରକାରଙ୍କ ଦୃଷ୍ଟି ଆକର୍ଷଣ କରିବା ପାଇଁ ଓଡ଼ିଶା ପଛୁଆବର୍ଗ ବିକାଶମଞ୍ଚ ଆସନ୍ତା ୧୦.୯.୨୦୧୮ରିଖରେ ଲୋୟର ପି.ଏମ୍.ଜି.ରେ ଧାରଣା, ପ୍ରତିବାଦ ସଭା ଏବଂ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କାର୍ଯ୍ୟକ୍ରମ କରାଯିବ । ପ୍ରାୟ ସକାଳ ୧୧ ଘଟିକା ସମୟରେ ରେଳ ଷ୍ଟେସନ୍ ସମ୍ମୁଖରୁ ରାଲି ବାହାରି ଲୋୟର ପିଏମ୍ଜିରେ ଅନ୍ୟାନ୍ୟ କାର୍ଯ୍ୟକ୍ରମ କରାଯିବ ବୋଲି ମଞ୍ଚର କାର୍ଯ୍ୟକାରୀ ସଭାପତି ଶ୍ରୀ ଧୂଳେଶ୍ୱର ମାଣିଆ ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି । ଉକ୍ତ ସଭାରେ ପ୍ରାୟ ୧୫୦୦ରୁ ଊଦ୍ଧ୍ୱର୍ ଓବିସି ନେତୃବୃନ୍ଦ ଓ କର୍ମୀ ଯୋଗ ଦେବେ । ଉକ୍ତ ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ମଞ୍ଚର ସାଧାରଣ ସମ୍ପାଦକ ସରୋଜ କୁମାର ବେହେରା ଓ କୋଷାଧ୍ୟକ୍ଷ ଶ୍ରୀଧର ଦାସ ଉପସ୍ଥିତ ଥିଲେ ।
