ନୟାଗଡ଼(ବିଶ୍ଵଜିତ ନାୟକ) -ନୟାଗଡ଼ ସ୍ୱୟଂ ଶାସିତ ମହାବିଦ୍ୟାଳୟରେ ଆଜି ସାମ୍ବାଦିକ ଏକାଦଶ ଓ ମହାବିଦ୍ୟାଳୟ କର୍ମଚାରୀ ଏକାଦଶ ମଧ୍ୟରେ ଏକ ବନ୍ଧୁତ୍ୱପୂର୍ଣ୍ଣ ଫୁଟବଲ ମ୍ୟାଚ ଅନୁଷ୍ଠିତ ହୋଇଯାଇଛି । ନୟାଗଡ଼ ବିଧାୟକ ଡ. ଅରୁଣ କୁମାର ସାହୁ ଏହି ଖେଳରେ ରେଫରୀ ଭାବେ ଖେଳ ପରିଚାଳନା କରିଥିଲେ । ନୟାଗଡ଼ ସାମ୍ବାଦିକ ଭବନ ପକ୍ଷରୁ ବରିଷ୍ଠ ସାମ୍ବାଦିକ ପ୍ରଦୀପ୍ତ ରଥ ଗୋଲ କିପର ଦାୟିତ୍ୱ ନିର୍ବାହ କରିଥିବା ବେଳେ ମହାବିଦ୍ୟାଳୟ ପକ୍ଷରୁ ସ୍ମୃତିରଞ୍ଜନ ମାନସିଂ ଗୋଲକିପର ଦାୟିତ୍ୱ ଗ୍ରହଣ କରିଥିଲେ । ଏହି ବନ୍ଧୁତ୍ୱ ପୂର୍ଣ୍ଣ ମ୍ୟାଚର ପ୍ରଥମାର୍ଦ୍ଧରେ ଉଭୟ ଦଳ ପରସ୍ପରକୁ ଗୋଟିଏ ଲେଖାଏଁ ଗୋଲ ଦେଇଥିଲେ । ଦ୍ୱିତୀୟାର୍ଦ୍ଧରେ ମହାବିଦ୍ୟାଳୟ କର୍ମଚାରୀ ପକ୍ଷରୁ ସାମ୍ବାଦିକଙ୍କୁ ୩ଟି ଗୋଲ ଦିଆଯାଇଥିଲା । ଫଳରେ କର୍ମଚାରୀ ଏକାଦଶ ୪-୧ ଗୋଲରେ ସାମ୍ବାଦିକ ଏକାଦଶକୁ ପରାଜୟ କରିଥିବା ସୂଚନା ମିଳିଛି । ଏହି ମ୍ୟାଚରେ ଅତିଥି ଭାବେ ନୟାଗଡ଼ ପୈାର ପରିଷଦ ଅଧ୍ୟକ୍ଷା ନିରୂପମା ଖଟେଇ, ଉପାଧ୍ୟକ୍ଷ ଗୁରୁପ୍ରସାଦ ଜେନା ପ୍ରମୂଖ ଉପସ୍ଥିତ ରହିଥିଲେ । ସେହିଭଳି ଭାବେ ନୟାଗଡ଼ ସ୍ୱୟଂ ଶାସିତ ମହାବିଦ୍ୟାଳୟ ଅଧ୍ୟକ୍ଷ ସୁରେଶ କୁମାର ପ୍ରଧାନ ଏବଂ ନୟାଗଡ଼ ସାମ୍ବାଦିକ ସଂଘ ସଭାପତି ବୈଦ୍ୟ ଭୂଷଣ ମହାପାତ୍ର ଉଭୟ ଦଳ ଦାୟିତ୍ୱ ନିର୍ବାହ କରିଥିଲେ ।