ଭୁବନେଶ୍ୱର : ବୁମ ମୁହଁରେ ଲାଗିଲେ ଲଗାତାର ଲଗାମଛଡା ବୟାନବାଜି ମହଙ୍ଗା ପଡିଛି ସୁର ବାବୁଙ୍କୁ | ଦଳୀୟ ଶୃଙ୍ଖଳା ଭଙ୍ଗ ଓ ଦଳ ବିରୋଧୀ ମନ୍ତବ୍ୟ ପାଇଁ ଅଡ଼ୁଆରେ ପଡିଛନ୍ତି କଂଗ୍ରେସ ବିଧାୟକ ସୁରେଶ ରାଉତରାୟ | ନିକଟରେ ବିଜେଡି ସଭାପତି ନବୀନ ପଟ୍ଟନାୟକଙ୍କ କଥାରେ ପିସିସି ସଭାପତି ନିଯୁକ୍ତି ହୁଏ ବୋଲି ସୁରବାବୁ ଦେଇଥିବା ମନ୍ତବ୍ୟକୁ ଦୃଷ୍ଟିରେ ରଖି ପିସିସି ସଭାପତି ଜାରି କରିଛନ୍ତି କାରଣ ଦର୍ଶାଅ ନୋଟିସ | କଂଗ୍ରେସ ବିଧାୟକ ସୁରେଶ ରାଉତରାୟଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ଦସ୍ତଖତରେ | ହେଲେ ପିସିସି ସଭାପତି ଜାରି କରିଥିବା ଅତ୍ୟନ୍ତ ଗୋପନୀୟ ଚିଠିଟି ସୋସିଆଲ ମିଡ଼ିଆରେ ଭାଇରାଲ ହେଉଛି |
ସୂଚନାଯୋଗ୍ୟ ଯେ ଯେଉଁ ପ୍ରଶ୍ନ ବା ପ୍ରସଙ୍ଗ ଉପରେ ଅନ୍ୟ କେହି ନେତା ବା ବ୍ୟକ୍ତି ବାଇଟ ଦେବାକୁ କୁଣ୍ଠାବୋଧ କରନ୍ତି, ସେ ସବୁ ପ୍ରସଙ୍ଗରେ ସୁରବାବୁ ଅନର୍ଗଳ କହିବାରେ ମାହିର | ଆଉ ସୁରବାବୁବଙ୍କ ଏହି ଗୁଣର ଫାଇଦା ଉଠାଇ ଅନେକ ସମୟରେ ଅନେକେ ନିଜ ନିଜ ଆବଶ୍ୟକର ପ୍ରତିକ୍ରିୟା ବି କୁହାଇ ନିଅନ୍ତି, ଯେଉଁଥିପାଇଁ ସୁର ବାବୁଙ୍କୁ ଅପଦସ୍ତ ହେବାକୁ ପଡେ ବା ମତ ବଦଳାଇବାକୁ ପଡିଥାଏ |
