ନୟାଗଡ଼ (ବିଶ୍ୱଜିତ ନାୟକ): ନୟାଗଡ଼ ଟାଉନ ଥାନା ପୁଲିସ ଆଜି ନୟାଗଡ଼ ସହରାଞ୍ଚଳ ପାଖ ସିନ୍ଦୁରିଆ ଅଞ୍ଚଳରୁ ୪ଜଣ ବ୍ରାଉନସୁଗାର ବେପାରୀକୁ ଗିରଫ କରିଛି । ସେମାନଙ୍କ ନିକଟରୁ ୮.୧୫୦ଗ୍ରାମ ବ୍ରାଉନସୁଗାର ଜବତ କରାଯାଇଛି । ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରେ ଜଣେ ମହିଳା ଥିବା ବେଳେ ଅନ୍ୟ ତିନି ଜଣ ଯୁବକ ରହିଛନ୍ତି। ଗିରଫ ଅଭିଯୁକ୍ତମାନେ ହେଲେ ଦେଉଳପଲ୍ଲୀ ଗ୍ରାମର ଜଗନ୍ନାଥ ପ୍ରଧାନ , ସିନ୍ଦୁରିଆ ଗ୍ରାମର ସେକ୍ ସମସେଦ୍, ସେକ୍ ଇମ୍ରାନ୍ ଅଲ୍ଲୀ ଏବଂ ମହିଳା ଜଣଙ୍କ ଇମ୍ରାନ ଅଲ୍ଲୀର ଭଉଣୀ ବୋଲି ପୁଲିସ ସୂଚନା ଦେଇଛି। ନୟାଗଡ ଅଂଚଳରେ ଦିନକୁ ଦିନ ନିଶାଡୀଙ୍କ ସଂଖ୍ୟା ବଢିବାରେ ଲାଗିଥିବା ବେଳେ ସେଥିରୁ ଯୁବପିଢ଼ିଙ୍କ ସଂଖ୍ୟା ମାତ୍ରାଧିକ । ଏହାକୁ କିପରି ରୋକାଯାଇପାରିବ ଏହା ପ୍ରତି ନୟାଗଡ଼ ଏସପି ଙ୍କ କଡା ନିର୍ଦ୍ଧେଶ ଥିବା ବେଳେ ନୟାଗଡ ଟାଉନ ଥାନା ପୋଲିସ ଆଗାରୁ ଚାରା ବିଛାଇ ଥିଲା । ଗିରଫ ଅଭିଯୁକ୍ତ ମାନେ ସିନ୍ଦୁରିଆ ଅଞ୍ଚଳରେ ବ୍ରାଉନସୁଗାର ବ୍ୟବସାୟ କରୁଥିବା ବେଳେ ପୋଲିସ ଖବର ପାଇ ଚଢ଼ାଉ କରିଥିଲା । ଚଢ଼ାଉ ସମୟରେ ସେମାନଙ୍କଠାରୁ ବ୍ରାଉନସୁଗାର ସହ ଦୁଇଟି ମୋଟର ସାଇକେଲ ଓ ୨୭୦୦ ଟଙ୍କା ଜବତ କରାଯାଇଛି। ସମସ୍ତ ୪ ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଥିବା ଟାଉନ ଥାନା ଅଧିକାରିଣୀ ପ୍ରଜ୍ଞା ପାରମିତା ଜେନା ସୂଚନା ଦେଇଛନ୍ତି ।